Yesu alwezele tumbaji twenyi ngwenyi: “Namukapwanga muvinjiho jami . . . kuvihela vyakwakusuku vyahamavu.” (Vilinga 1:8) Makumbi ano, Vinjiho jaYehova vali nakutesamo mulimo kana. Chipwe ngocho, kujingalila jimwe kuhakilako vene nakujingalila kuze kwatwama vatu vavavulu chikuma, kanda kuchihete mujimbu wamwaza. Kaha nawa mumafuchi amwe mwatwama Vinjiho vavandende. (Mateu 9:37, 38) Chuma muka tuli nakulinga mangana twambulile vatu vavavulu?

 Hakusaka mangana twononoke lushimbi lwaYesu lwakwambulula, Komiti yaMulimo yaLizavu lyaKutwaminyina lyaVinjiho jaYehova, yeji kutumanga vamishonali vamuwande vayenga kuvihela kuze kunakusakiwa kukafwa mukaye kosena. Oholyapwa tuli navamishonali vamuwande 3,090 mukaye kosena. a Kaha vavavulu vanapunga mumashikola akulinangula Mbimbiliya. Shikola yimwe shina, Shikola yaVaka-Kwambulula Wangana. Vamishonali veji kulisuulanga kuseza membo avo nakuya nakuzachila kumafuchi eka. Hakuwana nge vapwa vakuhya kushipilitu, nakuhita mushikola yakulinangula Mbimbiliya, nakupwa nauhashi wauvulu, ava vamishonali vakushishika vali nakwambulula mujimbu wamwaza nakuhana chakutalilaho chamwaza kutumbaji vavahya.

 Chihanda Chazakama Vaze Vazata Mulimo Wakulipwila Muwande chaLipatimende lyaMulimo chahajiofesi jamitango josena, cheji kuzachilanga hamwe naKomiti yaMutango mangana vazakame vamishonali, hakuvatondela kwakusavala, nakuvazakama nge vanaviji, nakuvahana jimbongo jajindende jakulikafwa najo navyuma vyeka. Mumwaka wamulimo wa 2020, Vinjiho jaYehova vazachisanga jimbongo jajindola (U.S.) jakuheta kafwe kujimiliyoni 27 hakuzakama vamishonali. Kuvazakama mujila kaneyi, chili nakukafwa vamishonali vazate mulimo wakwambulula natwima nakujikijisa vandumbwavo muvikungulwilo muze vatwama.

 Uno vamishonali vamuwande vanalingisa ngachilihi mulimo wakwambulula uzovoloke? Ndumbwetu Frank Madsen wamuKomiti yaMutango waMalawi ambile ngwenyi: “Hakuwana nge vamishonali veji kwambululanga mujimbu natwima, kaha nawa vakwechi uhashi wauvulu, ngocho echi chinalingisa vikungulwilo viputuke kwambulwila kuvihela kuze kakwavula kuheta vatuko, kwakufwana nge kujizuvo jize jatwama muvipango nakuvihela kuze vahanjika malimi eka. Kaha nawa muchima wavo wakufwila kulinangula malimi navisemwa vyeka unakolezeza chikuma vandumbwetu. Kaha nawa vali nakukafwa vakweze vafwile kulitomena kuzata mulimo washimbu yosena. Chikupu vene twasakwilila chikuma Yehova hakutuhana vamishonali vamuwande.”

 Ndumbwetu umwe wamuKomiti yaMutango wakulifuchi lyeka ambile ngwenyi: “Vamishonali veji kusololanga hatoma nge vatu jaYehova mukaye kosena vapwa vakulinunga. Kaha navatu vaze kavapwa Vinjihoko vanamono chikupu ngwavo katwalitala havisemwako, oloze vyuma yanangula Mbimbiliya vyeji kutukafwanga tupwenga vakulinunga.”

 Uno vamishonali vamuwande veji kukafwanga ngachilihi vaka-kwambulula vamuvikungulwilo muze vatwama? Ndumbwetu Paulo awahilila chikuma kupwa navamishonali muchikungulwilo. Kaha ambile ngwenyi: “Kungalila yetu kwapwa kuzuma chikuma, oloze echi kachalingisa vamishonali vaze veji kufumanga kujingalila kuze kututa chikuma valitwamine kwambululako. Lwola lwosena nachimene veji kupwanga kukuliwana chakuya muwande. Kaha nawa kakavulu ngweji kuvamonanga vanakuya kumaungeji akukindulukilako nalwola lwamusana chipwe nachingoloshi, numba vene nge kunazumu. Ava vamishonali vanakafwe vatu vavavulu valinangule muchano kuhakilako vene nayami. Veji kuzachisanga uhashi wavo nangolo javo hakuzachila Yehova mukuyoya chavo chosena. Kahechi chili nakukafwa vandumbwetu muchikungulwilo navakiko vafwile kuzachila Yehova noho hakumina ngolo javo.”

 Ndumbwetu Ketti wamuMalawi uze apwa payiniya washimbu yosena, ahanjikile omwo valunga napwevo vavamishonali vamukafwile natanga yenyi. Ambile ngwenyi: “Halwola ava vandumbwetu vavamishonali vejile muchikungulwilo chetu, yami kaha ngwapwile nguChinjiho mutanga. Chipwe ngocho, vangukafwile chikuma, kaha nawa valikachile chikuma natanga yetu. Chakutalilaho chavo chamwaza chakafwile chikuma vana vami mangana vamone ngwavo, kuzachila Yehova cheji kunehanga kuwahilila. Ngweji kusakwililanga chikuma ava vamishonali mwomwo oholyapwa vana vami vatatu vamapwevo vapwa vapayiniya vashimbu yosena. Kaha nawa lunga lyami naputuka kukunguluka.”

 Uno jimbongo tweji kuzachisanga hakukafwa vamishonali jeji kufumanga kulihi? Jeji kufumanga kuwana mweji kuhananga kuzachisa jijila jakulisezaseza, kuhakilako nauze mweji kuhananga kuzachisa donate.pr418.com. Tuli nakumisakwilila chikuma hamuchima wenu wakuhana.