Jivindiyo jahakukunguluka changalila jeji kutukwatanga chikuma kumichima, nakutukafwa twivwishise kanawa muchano wamuMbimbiliya. Kukunguluka chaNgalila cha 2020 chakwamba ngwavo ’Wahililenunga Shimbu Yosena’ chapwanga najivindiyo 114, hajivindiyo kana hali navihande 43 vize vahanjikile kuli vandumbwetu vamuLizavu lyaKutwaminyina navaka-kuvakafwako. Kutala munatachikiza kutohwa chamulimo kana najimbongo jasakiwa kumulimo kana tahi?

 Vandumbwetu kafwe 900 vakumafuchi akulisezaseza vazachisanga lwola lwavo nauhashi wavo kumulimo kanou wakutunga jivindiyo jahakukunguluka. Mulimo wosena ou vauzachile hajola kafwe 100,000 hamyaka yakuzomboka yivali. Hajiola kana hali najola 70,000 jize vazachishile hakutunga Chimweso chamuMbimbiliya chaminyutu 76 chakwamba ngwavo, Nehemiya: “Kuwahilila chaKufuma Kuli Yehova Chinapu Nge hiChihela Chenu Chakukola.”

 Ngana muze mwatachikiza kwapwile nakusakiwa jimbongo jajivulu jakulanda vyuma vyakulikafwa navyo vyavavandumbwetu valisuwile kuzata ou mulimo navyuma vyosena vyasakiwile mangana vakumise mulimo kana.

 Ndumbwetu Jared Gossman wamuLipatimende lyaKutunga jiVindiyo Nakukopa Mazu ahanjikile ngwenyi, “Komiti Yakunangula yaLizavu lyaKutwaminyina yasaka mujivindiyo jetu mupwenganga vyuma vyakufuma kuvisemwa vyakulisezaseza nakujikopela nawa kuvihela vyakulisezaseza. Echi cheji kusololanga hatoma nge twafuma kuvisemwa nakumiyachi yakulisezaseza. Hakusaka kutesamo chuma kana, mazavu 24 akumafuchi 11 akulisezaseza azachililile hamwe. Ngocho twasakiwile jimbongo jajivulu, nakunoneka kanawa vyuma nakuzata mukulinunga.”

 Mulimo wetu wakutunga jivindiyo wasakiwa nawa vinoma vyangolo vyakuzachisa natupete vakuhemena. Chakutalilaho, tupete vakuhemena vazachishile hakutunga vindiyo yakwamba ngwavo, Nehemiya: “Kuwahilila chaKufuma Kuli Yehova Chinapu Nge hiChihela Chenu Chakukola,” vavatungilile hachihela chetu chakukopela jivindiyo chaMt. Ebo kwakamwihi naPatterson muNew York, U.S.A. Hakusaka vazachise kanawa mawana ajimbongo hakutunga echi chimweso mangana chisoloke ngana muze vyapwile vyuma kushikulu, vandumbwetu vazachishile mapulanga amalelu hakutunga tupete vakuhemena mangana vasokele nge muze yasolokele kembwe yaYelusalema. Mbango himbango vayitungishile mapulanga akusuhwa jimita kafwe 6, aze vafwikile mahina akukwita ulombo mangana asoloke nge malolwa. Jimbango kana japwile jajashi kututula, ngocho vajizachishile hakutunga tupete veka vaze vazachishile. Chipwe ngocho twazachishile kafwe jindola 100,000 (U.S.) kuvyuma vyasakiwile hakukopa echi chimweso. a

 Kutachikiza vyuma vyaliwezele hakuwahisa echi kukunguluka changalila, chinatukafwe mangana tuhase kumona kukunguluka kana kupwa chachilemu chikuma. Twafwelela ngwetu milimo vazachile vandumbwetu hakuwahisa eyi polongalamu nayineha kavumbi halijina lyaYehova mukaye kosena. Tunamisakwilila chikuma hamuchima wenu wakulisuula kuhana wana wakukundwiza mulimo wamukaye kosena kuzachisa keyala yetu ya donate.pr418.com najijila jeka.