Ndumbwetu umwe ambile ngwenyi, “ngunavandaminanga chuma kana hamyaka 19.” Chuma muka apwile nakuvandamina ou ndumbwetu? Apwile nakuvandamina Mbimbiliya yaVisoneka vyaKaye Kakahya VyachiHelase vyaVaka-Kulishitu mulilimi lyenyi lyaBengali. Vatu vavavulu veji kuhanjikanga mazu kana kachi nge Mbimbiliya yaKaye Kakahya yinalovoka mulilimi lyavo. Uno kutala mwatachikiza mulimo watwama hakwalumuna nakulovola jiMbimbiliya kana tahi?

 Chatete, Komiti Yakusoneka Mikanda yaLizavu lyaKutwaminyina yeji kutetekelanga mulimo wakusakula lizavu lyavaka-kwalumuna. Uno heji kuhitanga myaka yingahi numba vakumise kwalumuna Mbimbiliya? Nicholas Ahladis wamuLipatimende Lyatala haMulimo waKwalumuna Mikanda haWarwick, muNew York ambile ngwenyi: “Chasakiwa kukekesa vyuma vyavivulu, vyuma kana shina, kuvula chavaka-kwalumuna vali nakusakiwa, nakukaluhwa chalilimi, nakumona nawa nge vatu vahanjika lilimi kana navevwishisa chiyoyelo chavatu vavuluka muMbimbiliya, nakukekesa vawane numba nge lilimi kana lyalihandununa namujila veji kulizachishilangamo mumafuchi akwavo. Kakavulu cheji kumbatanga mwaka umwe chipwe yivali chipwe yitatu numba vakumise kwalumuna Mbimbiliya yaVisoneka VyachiHelase vyaVaka-Kulishitu. Kaha nawa cheji kumbatanga myaka yiwana nakuzombokaho numba vakumise kwalumuna Mbimbiliya yosena yamuundu. Oloze cheji kumbatanga lwola lwalusuku chikuma hakwalumuna Mbimbiliya mulilimi lyatuveveve.”

 Kweji kusakiwanga vyuma vyavivulu hakwalumuna Mbimbiliya keshi lizavu lyavaka-kwalumuna kahako. Veji kuzachisanga lizavu lyavandumbwetu vakufuma kumafuchi navisemwa vyakulisezaseza mangana vahituluke muvyuma vanalumuna. Vandumbwetu kana veji kulisuulanga kuzata mulimo kana chakuzeneka kuvafweta. Vyuma veji kuhanjikanga ava vandumbwetu vyeji kukafwanga vaka-kwalumuna valumune Mbimbiliya mujila yakwoloka yayashi kwivwishisa. Ndumbwetu umwe wakuSouth Africa uze eji kunangulanga vaka-kwalumuna Mbimbiliya ambile ngwenyi: “Vaka-kwalumuna vamona mulimo kana kupwa waulemu chikuma mwomwo wapwa waYehova kaha nawa weji kukafwanga vatu vaze veji kutanganga mazu enyi.”

 Nge Mbimbiliya vanayikumisa kuyalumuna, veji kupulitanga mapapilo ayo nakutunga mukanda. Hakusaka kukumisa mulimo kana, malipatimende akupulita eji kuzachisanga vyuma vyavivulu chikuma. Vyuma vimwe shina, mapapilo, naulombo, naviwuva vyaMbimbiliya, nalemba yakulamikisa, namihya, navyuma vikwavo vyavivulu. Mu 2019 vazachishile jimbongo jajindola jakuheta kujimiliyoni 20 ja U.S. hakulanda vyuma kana evi vyasakiwa kumulimo wakutunga Mbimbiliya. Mumwaka kana vandumbwetu vazachila kumakina akuPulita vazachile jiola jakuzomboka 300,000 hakupulita jiMbimbiliya nakujituma.

 Mwomwo ika tweji kuzachishilanga jimbongo jajivulu nalwola lwaluvulu kumulimo kanou? Joel Blue waMulipatimende lyaKupulita Mikanda lyaMukaye Kosena ahanjikile ngwenyi: “Mbimbiliya himukanda waulemu chikuma hamikanda yosena yize tweji kupulitanga, ngocho twasaka yisoloke mujila yize nayineha kavumbi halijina lyaKalunga uze tweji kuzachilanga nakusolola kulema chamujimbu wamwaza tweji kwambululanga.”

 Katwalumuna kaha jiMbimbiliya jaKaye Kakahya jakutanga kuvatu vavavuluko, oloze tweji kwalumunanga neji jakutanga kuvatu vatwama naukalu wakulipwila. Chakutalilaho, Mbimbiliya yaKaye Kakahya yavasona vatupuputa yili mumalimi 10. Cheji kumbatanga jiola 8 hakutunga vihanda vyosena vyaMbimbiliya yavasona vatupuputa, kaha nawa vyasakiwa chihela chachinene chakuvitumbika chakuheta kujimita 2.3. Tweji kutunganga nawa jiMbimbiliya jakuzachisa vafunge mutumenga jize kajatwama naviwuvako hakuwana nge mutumenga vamwe, vakanyisa mikanda yaviwuva.

 Mbimbiliya yaKaye Kakahya yeji kukafwanga vatu veji kuyitanganga. Ivwenu vyuma vyasolokele kuchikungulwilo chazachisa lilimi lyaKiluba chamungalila yaTombe mulifuchi lyaDemocratic Republic of the Congo. Ngalila yaTombe yatwamina kwakusuku kafwe jikilomita 1,700 kufuma kunganda yayinene yamu Congo. Vinjiho jaYehova vakungalila kana vapwile kaha naMbimbiliya yimwe yamulilimi lyaKiluba yize yapwile yayikalu kwivwishisa, ngocho vandumbwetu vosena vamalunga vazachishilenga eyi Mbimbiliya hakuwahisa vihande vyakukukunguluka. Oloze kufuma vene muAugust 2018, mutu himutu wamuchikungulwilo kana ali naMbimbiliya yaKaye Kakahya yamulilimi lyaKiluba yize vanasoneka mujila yayashi kwivwishisa.

 Ndumbwetu umwe wapwevo uze ahanjika lilimi lyaGerman ahanjikile kutalisa kuMbimbiliya yaKaye Kakahya yamulilimi lyenyi ngwenyi: “Makumbi ano kangwamba ngwami ngwatela kutanganga Mbimbiliyako, oloze ngweji kwambanga ngwami, lwola muka ngwatela kutanga vyavivulu chikuma.” Funge umwe asonekela ngwenyi: “Vanguhanyine Mbimbiliya yaKaye Kakahya, kaha yili nakwalumuna kuyoya chami. Kanda lyehi ngwivwishisengaho mazu aKalunga nganomu ngunawevwishisa hakutanga eyi Mbimbiliyako. Ngunakusaka kutachikiza kanawa Vinjiho jaYehova navyuma ngwatela kulinga mangana ngupwenga nguChinjiho.”

 Vosena vaze veji kutanganga Mbimbiliya yaKaye Kakahya veji kusakwililanga chikuma hamawana mweji kuhananga mangana vayilovole. Mawana amwe akukundwiza kumulimo wamukaye kosena veji kuwahananga kuzachisa jijila jatwama ha donate.pr418.com. Tweji kumisakwililanga chikuma hamuchima wenu wakuhana.