Vinjiho jaYehova vali nakuzata mulimo waunene wakukafwa vatu kushipilitu nakumujimba mumafuchi akuzomboka 200. Oloze mafuchi 35 kaha akiko eji kukundwizanga mawana ajimbongo akutamo akuzachisa kumilimo yamungalila yawo. Uno mafuchi akuhutwa eji kutesangamo ngachilihi milimo yamungalila yawo?

 Lizavu lyaKutwaminyina lyaVinjiho jaYehova, lyeji kukekesanga limone vyuma vyakushipilitu navyakumujimba vize vili nakusakiwa kuli Vinjiho jaYehova mukaye kosena. Liuka lyeji kuzachisanga kanawa jimbongo. Kachi nge ofesi yamutango yinatambula jimbongo jajivulu jakuzomboka jize jili nakusakiwa kuzachisa kumilimo yamungalila yavo, yeji kuhanangako jimbongo jimwe kumitango yikwavo yize yinahono kutesamo. Chuma kana chikiko valingilenga naVaka-Kulishitu vakulivanga. ‘Vahanyinengako vakwavo vyuma vyavivulu vapwile navyo.’ (Wavaka-Kolinde 2, 8:14) Hakuwana nge vapwile navyuma vyavivulu, vahanyinengako vakwavo vaze vapwile navyuma vyavindende mangana vateseke hamwe.

 Uno vandumbwetu vaze vanatambulanga mawana ajimbongo akufuma kumitango yikwavo vanevunga ngachilihi? Chakutalilaho, mulifuchi lyaTanzania vatu vavavulu chikuma veji kuyoyelanga hajimbongo jajindende hakumbi hakumbi, kafwe jindola jivali kaha. Ngocho jimbongo jafumine kumitango yikwavo, vajizachishile kukutungulula Zuvo yaWangana yaMafinga. Chikungulwilo chasonekele mukanda ngwacho: “Kufuma vene haze vatungulwile Zuvo yaWangana, vatu vanakwizanga kukukunguluka vali nakuvulilako chikuma. Tunasakwilila chikuma liuka lyaYehova navandumbwetu vamukaye kosena hamuchima wavo wakuhana. Muchima kana unatulingisa tulivwise kuwaha kulemesela Yehova muZuvo yaWangana yamwaza chikuma.”

 Vandumbwetu vamwe muSri Lanka vanapunga naukalu wakuhona vyakulya mwomwo yamusongo wachihita waCOVID-19. Vandumbwetu vamwe shina Imara Fernando namwanenyi Enosh. Tunawahilila hakuwana nge vavakafwanga najimbongo jakufuma kumitango yeka. Vasonekele mukanda wakusakwilila ngwavo: “Twasakwilila vandumbwetu vatusolwelanga zangi mulwola luno lwalukalu. Twapwa vakutokwa chikuma kupwa mutanga kana, kaha tuli nakulomba Yehova atwaleho kuzakama vandumbwetu mukaye kosena mumakumbi ano akukuminyina.”

 Chamokomoko nakungalila vatwama vandumbwetu, vafwila kuhanako vakwavo vyuma vali navyo. Chakutalilaho, Enosh atungile kachikasha kenyi kakuhakangamo mawana mangana nayikiye akafwe vandumbwetu vaze vali muukalu. Ndumbwetu Guadalupe Álvarez nayikiye atwama namuchima kana ou wakuhana. Atwama mungalila yimwe yamuMexico muze chapwa chachikalu vatu kuwana jimbongo, kaha nawa vamwe veji kuvafwetanga jimbongo jajindende. Chipwe ngocho, eji kuhananga wana kweseka noho hakumina ngolo jenyi. Asonekele ngwenyi: “Ngwasakwilila chikuma Yehova hakuwaha chenyi nazangi yenyi yakwilila. Ngunawahilila hakutachikiza ngwami mawana ami navawafutula namawana avandumbwetu vosena mangana akafwe vaze vali muukalu.”

 Vandumbwetu vaze veji kutumanga mawana ajimbongo kumitango yikwavo, veji kuwahililanga kulinga ngocho. Ndumbwetu Anthony Carvalho wamuKomiti yaMutango waBrazil ahanjikile ngwenyi: “Hamyaka yayivulu tunasakiwanga jimbongo jakufuma kumitango yeka mangana tutesemo milimo yamungalila yamutango wetu. Milimo yafukililile chikuma mwomwo yakutukafwa kuli vandumbwetu. Makumbi ano jino tuli najimbongo jajivulu kaha tuli nakuhasa nakukafwako navakwetu veka. Vandumbwetu muBrazil vanatachikiza ngwavo mulimo wakwambulula uli nakusakiwa mukaye kosena, ngocho vali nakuzata nangolo mangana vaukundwize hakupwa tumbaji twaYesu vakulisuula.”

 Jijila muka vanahase kuzachisa Vinjiho jaYehova hakukafwa vandumbwavo vali muukalu? Kavatela kutuma mawana ajimbongo kumitango yakumafuchi eka aze anakalikizako, oloze vatela kukundwiza kumulimo wamukaye kosena. Vanahase kulinga ngocho hakuhaka wana wavo muchikasha chamawana haze vanasoneka ngwavo, “Mulimo WamuKaye Kosena”, chipwe kuzachisa donate.pr418.com. Tweji kumisakwililanga chikuma hamawana enu mweji kuhananga.