Ndumbwetu wapwevo Nicole wamyaka yakusemuka 17 wamuColombia ambile ngwenyi, “Ngwazanga Zuvo yetu yaWangana, mwomwo mukiko tweji kuliwanyinanga natanga yami yakushipilitu.” Kutala nayenu mukiko mweji kwivwanga tahi?

 Mukaye kosena, Vinjiho jaYehova veji kuliwanyinanga muJizuvo jaWangana kafwe 63,000. Eji jizuvo kana jeji kutukafwanga tulemese kanawa Kalunga. Oloze jatwama namulimo ukwavo nawa. David wamuColombia uze apwa payiniya washimbu yosena ambile ngwenyi: “JiZuvo jetu jaWangana jeji kulingisanga vatu vazange mujimbu tweji kwambululanga. Vangeji vavavulu veji kulikomokelanga omwo tweji kujilaminangamo kanawa.” Oloze chasakiwa kukilikita. Tweji kuzatanga nangolo tuwahise nakulama jiZuvo jaWangana kupwa jaunyoji. Uno ou mulimo kana tweji kuuzatanga ngachilihi?

 Vikungulwilo vize vyeji kuzachisanga Zuvo yaWangana vikiko vyeji kuzatanga mulimo wakuyiwahisa. Ngocho vandumbwetu vamalunga navamapwevo veji kulamanga Zuvo yaWangana kupwa yaunyoji. Veji kuwahisanga nawa vyuma kuchina navilyenyeka nakuwahisa tuvyuma twatundende tuze tunalyenyeka.

 Hakusaka kukafwa vikungulwilo vizakame kanawa jiZuvo javo jaWangana, Lipatimende Lyatala haMulimo waKutunga (LDC) lyeji kutongolanga vandumbwetu vamalunga vapwenga vaka-kunangula mwakuwahishila vihela vyakulemesela Kalunga. Muka-kunangula mwakuwahishila vihela vyakulemesela Kalunga umwe, eji kuzakamanga vikungulwilo 6 nakuheta ku 10. Eji kuvatambukilanga nakunangula vaka-kwambulula mwakuzakamina zuvo yavo yaWangana. Hanyima yamyaka yitatu, eji kukekesanga jiZuvo jaWangana jize vamuhana nakumona numba nge jinahase kuneha ponde chipwe jili nakusakiwa kujiwahisa.

 Vandumbwetu vamalunga navavamapwevo veji kusakwililanga chikuma hakuvanangula kuli ava vandumbwetu. Ndumbwetu wapwevo Indhumathi wamuIndia ambile ngwenyi: “Vatunangwile kanawa. Twevwile kuwaha kutunangula mwakulamina kanawa zuvo yetu yaWangana.” Ndumbwetu walunga Evans wamuKenya ambile ngwenyi: “Twalinangwile mwakuhonesela ukalu waundende kuzuvo yetu yaWangana, kuchina natukazachisa jimbongo jajivulu chikuma nge ukalu kana unatoho.”

 Jimbongo jeji kusakiwanga hakuzachisa nakuwahisa Zuvo yaWangana mumwaka wamuundu jinahase kupwa jindola a jajivulu, kweseka nakuchihela yili, namyaka yinatwame nakuvulula chavikungulwilo vyeji kuyizachisanga. Uno jimbongo kana jeji kufumanga kuli?

 Mulimo wakuwahisa jiZuvo jaWangana veji kuukundwizanga namawana akulisakila. Ndumbwetu walunga Alexander wamuKazakhstan alumbunwine ngwenyi: “Jimbongo jimwe veji kujizachisanga kuInternet nakuvyuma vyakufwana nge kufwetela meya nakakahya kakezi. Kaha jikwavo veji kujilandanga vyuma vyakufwana nge mapapilo akulipukuchisa kumavoko, namangilavu, naulombo wakukwita hajimbango navyuma vyeka.” Nge jimbongo jimwe jinasaleho, veji kujikundwizanga kumulimo wamukaye kosena mangana vakajizachise kumilimo yeka yayinene yamukaye kosena, yize yinakusakiwa jimbongo jajivulu hakujiwahisa.

 Nge jimbongo najisakiwa hakuwahisa Zuvo yaWangana jinavulu chikuma kuhambakana jimbongo jize chikungulwilo cheji kuzachisanga hatukweji vavali chipwe vatatu, kaha vakulwane veji kulwezanga muka-kunangula mwakuwahishila vihela vyakulemesela Kalunga waLDC. Kachi nge lipatimende lyaLDC linetavila kaha veji kuzachisanga mawana ajimbongo amukaye kosena. Mumwaka wamulimo wa 2023 vazatanga milimo yakufwana ngana yakuheta ku 8,793, kaha vazachisanga jimbongo jajindola jakuheta kujimiliyoni $76.6. Milimo yimwe yivali shina yino:

 MuAngola, Zuvo yaWangana yimwe yize yatwamine myaka 15 kufuma hakuyitunga yafwile chikuma. Mwapwile nakusakiwa kuhakamo vinoma vyeka vyakakahya kakezi, kaha nawa yapwile namyaji, miyengo yameya nawa yatuvikile nakulingisa vatu vahachile kuzuvo yaWangana vayayavale ngwavo meya ali nakuya hamembo avo. Ngocho, Lipatimende lyaLDC lyawahishile vyuma mangana vakumise ou ukalu. Vazachishile jimbongo jajindola $9,285. Venya membo aze hayilenga aze meya vasakwililile chikuma kaha nawa valikomokelele hakumona omwo vazachilililemo mulimo kana.

 MuPoland, Zuvo yaWangana yimwe yapwile nakusotowela, kaha nawa lihina lyamumavu (carpet) lyalyenyekele chikuma. Lipatimende lyaLDC lyetavilile kuzachila hali ou ukalu, ngocho vawahishile mulungu nakuhakamo lihina lyeka. Vazachishile jimbongo jajindola $9,757. Ngocho, namuchihita myaka yayivulu chikuma numba jino eyi Zuvo yaWangana yikasakiwe cheka kuyiwahisa.

 Mulimo wakuwahisa weji kutukafwanga tuzachise jimbongo jajindende kaha nawa weji kwalisanga Yehova. Ndumbwetu walunga Shaun wamuTonga ambile ngwenyi: “Mulimo wakuwahisa jiZuvo jaWangana weji kutukafwanga tulemesele Yehova mujiZuvo jaWangana jaunyoji, jamwaza chikuma nakulingisa vatu muchitungilo valise lijina lyenyi. Tweji kwivwanga kuwaha kusanyika vatu vezenga kuZuvo yaWangana.”

 Tuvosena tunahase kukafwa kuwahisa nakulama vihela vyetu vyakulemesela Kalunga kupwa vyaunyoji. Marino wamuAustralia uze apwa muka-kunangula mwakuwahishila vihela vyakulemesela Kalunga ambile ngwenyi: “Tuvosena tunahase kupwa nakutokwa chakwazana mumulimo wakuzakama jiZuvo jaWangana. Kulinga ngocho, nachitukafwa tulame kanawa jimbongo jaliuka mangana vajizachise kaha kuze jili nakusakiwa chikuma.”

 Ndumbwetu walunga Joel wamuIndia azanga chikuma kuwahisa Zuvo yavo yaWangana. Ambile ngwenyi: “Kuzata navandumbwami cheji kungulingisanga ngushinganyeke omwo nachikapwa mulifuchi lyalihya.” Nicole uze twavulukanga hakavanga ambile ngwenyi: “Kalinwomu ngana, ngwapwanga nakufumisa meya muZuvo yaWangana aze apwile nakufuma kumuyengo wameya uze watuvikile kaha vandumbwetu vamalunga vapwile nakuwahisa uze muyengo wameya. Numba tuhu kangwazachile mulimo wakuwahisa uze muyengoko, olozenyi ngwakingile vandumbwetu vahone kusenunuka.”

 Kachi nge muli nakusaka kuzatako mulimo wakuwahisa Zuvo yenu yaWangana, kaha lwezenu vakulwane muchikungulwilo chenu. Kaha nawa mawana ajimbongo mweji kuhananga veji kuwazachisanga kukuwahisa Zuvo yenu yaWangana neji jamukaye kosena. Awa mawana munahase kuwahaka muchikasha chakuhaka wana chipwe kuzachisa donate.pr418.com. Tweji kumisakwililanga chikuma hamuchima wenu wakuhana.