Kukunguluka changalila cha 2020, chapwile chakulipwila chikuma mwomwo chikiko kukunguluka changalila chatete chize vakopele nakuhaka haInternet. Chipwe ngocho, vandumbwetu vamulifuchi lyaMalawi namuMozambique, vevwililile kukukunguluka kana chakuzeneka kuzachisa Internet. Uno vahashile ngachilihi kulinga ngocho?

 Komiti yaKuwanyisa naKomiti Yakunangula yaLizavu lyaKutwaminyina jetavishile vandumbwetu vamuMalawi namuMozambique vatalise kukunguluka changalila haTV nakuchihaka hachisaji. Mwomwo ika chapwililile chakutamo kulinga chuma kana? Mulifuchi lyaMalawi, kuya haInternet chasakiwa kuzachisa jimbongo jajivulu chikuma. Shikaho Vinjiho vavandende kaha vakiko vanahase kulinga ngocho. Chakutalilaho ndumbwetu William Chumbi wamuKomiti yaMutango waMalawi ambile ngwenyi: “Visaji najiTV vikiko kaha vatelelele kuzachisa vandumbwetu mangana vevwilile kukukunguluka changalila.” Ndumbwetu Luka Sibeko, wamuKomiti yaMutango waMalawi ambile ngwenyi: “Nge kukunguluka changalila kachapwile havisaji nahajiTVko, kachi vandumbwetu vavandende kaha vamulifuchi lyetu vakiko vanganyalile kukukunguluka kana.” Kaha nawa muMozambique, vandumbwetu vavandende kaha vakiko vahashile kulanda makina akuzachisa hakutala kukunguluka kana chipwe kuya haInternet.

 Musongo wachihita waCOVID-19 walingishile kukunguluka chachikungulwilo vaputuke kuchitalisa kujichanelo jahaTV nakuchihaka havisaji. a Vandumbwetu vashimutwilile navaka-jichanelo kana nakulomba lwola lwakutalisa kukunguluka changalila.

 Chipwe ngocho, kachapwile chachashi kuli vandumbwetu vamuMalawiko. Kakavulu, vatu vaze vatondelenga kuzachisa jichanelo jahaTV chipwe javisaji vavahanyinenga kaha ola yimwe. Vahonenenga kuvahana lwola lwalusuku mwomwo vashinganyekelenga ngwavo, kuhaka jipolongalamu jajisuku kujichanelo kana chinahase kwivwisa vatu uli. Oloze vandumbwetu valumbunwinyine vakulwane vajichanelo ngwavo kukunguluka kana nachikafwa vatu vosena mungalila. Vavalwezele nawa ngwavo namulwola luno kuli lushimbi lwakuhona kutambwojoka, tuli nakulwezako vakwetu mujimbu wamwaza wamuMbimbiliya uze nauvakafwa vatwame mukuunda nakupwa vakuwahilila mujitanga javo. Omu vakulwane vajichanelo vevwile mazu kana, vahanyine vandumbwetu lwola lwaluvulu.

 MuMalawi, kukunguluka changalila chapwile kuchanelo yimwe yahaTV neyi yahachisaji jize veji kwivwililangako vatu vosena mulifuchi kana. MuMozambique, kukunguluka changalila vapwile nakuchitalisa kuchanelo yimwe yaTV nakujichanelo 85 javisaji.

 Kaha mumafuchi osena avali, vazachishile jimbongo jajindola 28,227 b hakutalisa kukunguluka changalila haTV, najimbongo jajindola kafwe 20,000 hakuzachisa chanelo yahavisaji. Kuchanelo yayindende yahachisaji vavafwetesele kafwe jindola 15, kaha chanelo yayinene kafwe jindola 2,777.

 Vandumbwetu vazachishile kanawa wana wajimbongo. Chakutalilaho muMalawi, vashimutwilile navakulwane vajichanelo mangana vavafumishileko ndando, kaha vavafumishilileko jipaseti 30. Kaha jimbongo josena jize vavafumishilileko jahetele kujindola 1,711. MuMozambique, vakulwane vajichanelo vatufumishilileko jimbongo mwomwo yakushishika chetu nakufweta nawa jimbongo mulwola lwakutamo.

 Vandumbwetu vawahililile chikuma hakutala nakwivwilila kukukunguluka changalila hali eji jichanelo. Ndumbwetu Patrick uze apwa kalama muMalawi ambile ngwenyi: “Tuli nakusakwilila chikuma vandumbwetu vamuLizavu lyaKutwaminyina havyuma vyosena vanatulingila mulwola luno lwamusongo wachihita.” Ndumbwetu Isaac wamuMalawi naikiye ambile ngwenyi: “Katwapwile namakinako, shikaho twawahililile chikuma hakuwana nge liuka lyaYehova lyalongesele vyuma mangana tuhase kwivwilila kukukunguluka changalila hachisaji. Kahechi chalingishile tanga yami yosena yinganyale. Chuma kana chatukafwile tumone chikupu ngwetu, Yehova azanga vatu jenyi.”

 Muka-kwambulula umwe wamuMozambique uze apwile kukukunguluka changalila halwola lwatete, ambile ngwenyi: “Kutala kukunguluka changalila cha 2020 haTV, changukafwile ngumone ngwami, Yehova apwa Kalunga wangolo josena. Kaha musongo wachihita kawamulingishile ahone kutuhana kulya chakushipilitu muno muzuvo yetuko. Ngwamwene unjiho wakusolola nge vatu Yehova valizanga navakwavo. Ngocho ngunakunyuka ngwami echi hikwitava chamuchano.”

 Ndumbwetu Wyson uze apwa kalama ambile ngwenyi: “Nguli nakusakwilila chikuma ndungo wakushishika hakutuzakama mulwola luno lwamusongo wachihita. Kukunguluka kuzachisa visaji najiTV, chinatukafwe chikuma etu tuli najimbongo jajindende twatwama mulifuchi lyakuhutwa, mangana tuhase kukunguluka nakunganyala chikuma.”

 Komiti yaKuwanyisa naKomiti Yakunangula yinalongesa nawa vyuma mangana kukunguluka changalila cha 2021 chikapwe cheka kujichanelo jahaTV nahavisaji kujingalila jimwe. Uno jimbongo jakuzachisa hakutalisa echi kukunguluka changalila haTV nakuchihaka havisaji jeji kufumanga kulihi? Jeji kufumanga kuwana mweji kuhananga kuzachisa jijila jakulisezaseza, kuhakilako nauze mweji kuhananga kuzachisa jijila jatwama ha donate.pr418.com. Tuli nakumisakwilila chikuma hamuchima wenu wakuhana nakusuuluka.