Kaposhi Kakutalila waJune 1, 1912 ambile ngwenyi, “Chasoloka nge vatu vavavulu vaze veji kutanganga mikanda yetu vatachikiza vatu vaze vapwa tupuputa. Vanahase kutanga mikanda yatupuputa hawana wakanyombo . . . . Eyi mikanda yatupuputa vayitunga muvasona vakwalala-kwalala mangana tupuputa vayitange kanawa.” Ou Kaposhi Kakutalila atwalilileho ngwenyi: “Tupuputa vavavulu vanawahilila hakwivwa mujimbu ngwavo kalinwomu Kalunga akisule vatu vosena mukaye.”

 Halwola vasonekele mazu kana, lifuchi hilifuchi lize lyazachisa lilimi lyaChingeleshi lyapwile najila yalyo yakusonekelamo vasona vatupuputa vamulilimi kana. Chipwe ngocho, Vinjiho jaYehova vaputukile lyehi kunangula muchano wamuMbimbiliya muvasona vatupuputa vakwalala-kwalala. Kaha vachili lika nakulinga ngocho. Oholyapwa tuli jino namikanda yamuvasona vatupuputa mumalimi akuzomboka 50. Uno veji kuyitunganga ngachilihi?

 Chuma chatete kulinga hakutunga mikanda yatupuputa shina kusoneka mazu muvasona vatupuputa. Michael Millen uze azachila kuLipatimende Lyakuwahisa Mikanda Shimbu Kanda Vayilovole muPatterson, New York alumbunwine ngwenyi, “Kunyima twazachishilenga polongalamu yize vatungile kuvatu veka hakusoneka mazu muvasona vatupuputa, oloze kayahashilenga kusoneka mumalimi osena aze twasakilengako. Oholyapwa tuli nakuzachisa polongalamu yaWatchtower Translation System yize yeji kutukafwanga kusoneka vasona vatupuputa mumalimi amavulu amuno mukaye. Ngwafwelela ngwami mukaye kosena kakweshi polongalamu nayilyeseka nayeyiko.”

 Mumikanda yavasona vatupuputa mwatwama namazu akulumbununa mivwimbimbi. Chakutalilaho, muvwimbimbi wahalipapilo lyahelu lyamukanda waLivwise Kuwaha Kuyoya Haya Myaka vaulumbununa ngwavo: “Lunga ali nakutambuka mujila yakulijinga yize yinahichi kumilundu najipili, kuze nawa kuli mwila wamwaza.” Kapuputa walijina lyaJamshed uze apwa muka-kuzachila kaha nawa payiniya ambile ngwenyi, “Ngwamona awa mazu akulumbununa muvwimbimbi kupwa wana waulemu chikuma.”

 Kachi nge vanasoneka lyehi, veji kuyitumanga kujiofesi jamitango jize jeji kufuulanga vasona vatupuputa. Eyi mitango yeji kufuulanga vasona hamapapilo akukola aze kawatuvika hakuwafuula matomekako chipwe matomeka kujimuka mwomwo yakuyizachisa chikumako. Kufumaho, veji kulamikanga awa mapapilo nakuwatuma kuzachisa jila veji kutuminangamo mikanda kuvikungulwilo chipwe kuzachisa posito ofesi kachi nge posito ofesi kana yeji kwitavisanga kutumina vyuma tupuputa hawana wakanyombo. Lwola lumwe mitango yeji kulongesanga vyuma mangana mikanda yavandumbwetu vatupuputa chipwe vaze kavamona kanawako yihete washi mangana vakayizachise hakukunguluka chachikungulwilo.

 Kuzata mulimo waunene ngana chasakiwa jimbongo jajivulu nalwola lwaluvulu. Chakutalilaho, lwola lyeji kumbatanga likina lyetu lyakupulitila mikanda lyahaWallkill, New York hakupulita jiMbimbiliya 50,000 javatu vosena, lukiko lwola lyeji kumbatanga hakutunga jiMbimbiliya jivali kaha jamuvasona vatupuputa. Mbimbiliya yaChingeleshi yimwe yamuvasona vatupuputa yatwama muvihanda 25, kaha jimbongo jakulanda vyuma vyasakiwa hakutunga evi vihanda javula mapapa 123 kuzomboka jimbongo veji kuzachisanga hakutunga Mbimbiliya yimwe yavatu vosena. Hakutunga kaha mapapilo ahelu akuhaka hali evi vihanda 25 veji kuzachisanga jimbongo jajindola ja U.S 150.

 Uno vaze veji kuzatanga mulimo wakutunga mikanda yamuvasona vatupuputa veji kwivwanga ngachilihi? Nadia uze azachila hamutango waSouth Africa ambile ngwenyi: “Chiyoyelo kachapwa chachashi kuli vandumbwetu vatupuputa chipwe vaze kavamona kanawako, shikaho ngwachimona kupwa hikutokwa kutunga vyuma vize navivakafwa. Echi chasolola nge Yehova avazanga chikuma.”

 Uno kapuputa mwalinganga ngachilihi nge katachikiza kutanga vasona vatupuputako? Mumyaka yinahichi kunyima twalovolanga mbuloshuwa yakwamba ngwavo Linangule Kutanga Vasona vaTupuputa, yize yatwama navasona vatupuputa navasona vakuzachisa vatu vosena. Vayitunga mujila yize nayilingisa kapuputa nauze ali nameso vayizachishile hamwe. Eyi mbuloshuwa yatwama havinoma vyatupuputa, kaha vinoma vimwe shina makina aze eji kukafwanga tupuputa kusoneka muvasona vatupuputa. Mutu uze ali nakulinangula vasona vatupuputa nahase kulisonekela ivene vasona kana kuzachisa awa makina. Echi cheji kukafwanga uze ali nakulinangula akanukenga vasona kana nakuvatachikiza hakuvakwata.

 Uno eyi mikanda yinakafwe ngachilihi vandumbwetu vatupuputa navaze kavamona kanawako? Ernst wamulifuchi lyaHaiti ayilenga kukukunguluka oloze kapwile namikanda yamuvasona vatupuputako. Ngocho alaminyinyine kaha vyuma mumutwe hakuhanjika vihande mushikola nakukumbulula hakukunguluka. Ambile ngwenyi, “Oholyapwa ngunahase kwolola livoko nakukumbulula kala lwola. Ngunapu jino wakulinunga navandumbwami hakuwana nge tuli nakutambula kulya chakushipilitu chochimwe.”

 Jan uze apwa mukulwane muchikungulwilo muAustria, uze kamona kanawako kaha nawa muka-kutwaminyina Chilongesa chaKaposhi Kakutalila naChilongesa chaMbimbiliya chaChikungulwilo, ambile ngwenyi, “Mikanda yetu yayashi kwivwishisa kuhambakana mikanda yeka yamuvasona vatupuputa ngunatangenga. Chakutalilaho, mumikanda yetu chapwa chachashi kuwana nambala yalifwo, nakwinyikila chamwishi kaha nawa yatwama namazu akulumbununa kanawa muvwimbimbi.”

 Seon-ok payiniya wamuSouth Korea, apwa kapuputa kaha nawa kaveveve. Kunyima ou ndumbwetu wapwevo evwishishilenga vyuma nge neza nakukunguluka hakumukwata kumavoko, oloze makumbi ano ali jino nakulitangila yivene mikanda yatupuputa yakukafwa kulilongesa Mbimbiliya. Ambile ngwenyi, “Mikanda yatupuputa yeka yapwa yayikalu kutanga mwomwo mazu amwe auchi, mifunda nawa yakuhenga chipwe pamo mapapilo amalelu chikuma. Oloze Vinjiho jaYehova veji kuzachisanga mapapilo amwaza nakusoneka kanawa mazu, kahechi cheji kungukafwanga ngutange kanawa.” Ahanjikile nawa ngwenyi, “Kunyima ngwalinangwilenga mikanda yahanjika vyamuMbimbiliya kuhichila muli vakwetu. Oloze oholyapwa nguli nakulinangula ukawami. Ngweji kwivwanga kuwaha kuliwahisa vyakukunguluka nakwazanaho chikuma. Ngweji kutanganga mikanda yetu yosena yavasona vatupuputa. Munahase kwamba ngwenu ‘ngwayijilila chikuma.’”

 Ngana mwamikanda yetu yosena yakupulita, namikanda yetu yamuvasona vatupuputa yatwama namazu ano: “Eyi mangazini kayapwa yakulanjisako. Yapwa hichinoma chimwe chakuzachisa kumulimo wakunangula vatu Mbimbiliya mukaye kosena uze vakundwiza namawana akulisakila.” Twasakwililako hakuhana mawana kana kuzachisa jijila vavuluka ha donate.pr418.com. Muchima wenu wakuhanahana uli nakulingisa vatu vavavulu vapwenga nakulya chakushipilitu, kuhakilako vene natupuputa navaze kavamona kanawako.