Vinjiho jaYehova veji kuzakamanga chikuma vandumbwavo. (WaPetulu 1, 2:17) Etu vavavulu tweji kwivwanga ngana mwandumbwetu wapwevo Tannis wamulifuchi lyaKenya uze ahanjikile ngwenyi: “Ngwazanga kutachikiza vyuma vali nakuhitamo vandumbwetu mukaye kosena.” Uno ndumbu Tannis naVinjiho veka veji kutachikizanga ngachilihi vyuma vili nakusoloka kuli vandumbwavo? Kufuma vene mu 2013, tunazachisanga Chihanda chaMijimbu chahakeyala yetu ya jw.org mangana tutachikize vyuma vili nakusoloka kuli vandumbwetu.

 HaChihanda chaMijimbu heji kupwanga mijimbu yakwoloka yaVinjiho jaYehova yize yeji kuhajikanga hakulovola jiMbimbiliya, nahamulimo wakukafwa vatu vali muukalu wakulijila, nahamulimo wakutungatunga navyuma vyeka vyavilemu. Heji kupwanga nawa mijimbu yakutulweza vandumbwetu vaze vanakase mwomwo yalufwelelo lwavo. Kaha nawa hachihanda kana heji kupwanga namijimbu yakutukolezeza yakupandama kujikapeni jakwambulula naChilika chaKwanuka Kufwa chaMwata. Veya veji kuhehwojolanga mijimbu kana, kaha veji kuyiwahisanga ngachilihi?

 Mijimbu yahaChihanda chaMijimbu veji kuyihakangaho kuli vandumbwetu vamuOfesi yaKwazana Mijimbu chipwe ngwetu OPI. Eli lipatimende kana lyatwama hachikota chaVinjiho jaYehova, kaha veji kulitetekelanga kuKomiti yaKuwanyisa yaLizavu lyaKutwaminyina. Mulipatimende lya OPI mwatwama vandumbwetu vakuzomboka 100 mapwevo namalunga. Vavavulu vapwa vaka-kulisakila kuzachila mulimo wahambetele kujizuvo javo vaze veji kusonekanga, nakuhehwojola, nakufunjejeka, nakwalumuna. Veka vapwa vaka-kushimutwila navilolo jafulumende, namilongeshi, navatu vatanga chikuma navaka-kwazana mijimbu. Lipatimende lya OPI veji kulikafwanga kumaLipatimende aKwazana Mijimbu chipwe ngwetu PID akuzomboka 80 ahamitango yamukaye kosena.

 Hakuwahisa mujimbu, vandumbwetu vamulipatimende lya OPI veji kuzachilanga hamwe chikuma navandumbwetu vamumalipatimende a PID. Nge vandumbwetu vanamono ngwavo mujimbu vanevu uli nakusakiwa kuulweza vatu, veji kuhehwojolanga kanawa nakuwana mashina namasongo amujimbu kana. Echi chasakiwa kwihwojola, nakuhanjika navaze valinangula chikuma, namilimo yeka. Nge vanawane lyehi mashina namasongo, veji kusonekanga jino mujimbu, nakuuhituluka kanawa, nakuhakamo mivwimbimbi nakuutuma kuKomiti yaKuwanyisa vaukekese namone nge vatela kuwitavisa vautume hakeyala nyi chiku.

 Uno vandumbwetu veji kwivwanga ngachilihi hakupwa naChihanda chaMijimbu? Ndumbwetu wapwevo Cheryl wakuPhilippines ambile ngwenyi, “Ngwazanga kutanga mijimbu yili nakuhanjika haliuka lyaYehova navatu jenyi, shimbu kanda ngulinge vyuma vyeka.”

 Vaka-kutanga mijimbu vavavulu veji kuhanjikanga chihandwa chatwama hamijimbu yahaChihanda chaMijimbu chaha jw.org namijimbu yeka. Tatiana uze atwama muKazakhstan ambile ngwenyi: “Ngwazanga chikuma mijimbu yaha jw.org, kaha ngwayifwelela hakuwana nge yakwoloka kaha nawa yatwama namashina namasongo. Ndumbwetu wapwevo Alma wamuMexico ambile ngwenyi: “Mijimbu yahaChihanda chaMijimbu yeji kutukolezezanga kuhambakana mijimbu yayipi tuli nakwivwanga kweka.

 Mijimbu yahaChihanda chaMijimbu yapwa chikupu yakwoloka kaha nawa yeji kuzamisanga lufwelelo lwetu. Bernard uze atwama muKenya ambile ngwenyi: “Mijimbu yahaChihanda chaMijimbu yinangulingisa ngumonenga vandumbwami vamukaye kosena kupwa vatanga jami chamokomoko nokwo vatwama. Ngweji kuvulukanga majina avo mukulomba naukalu vali nakuhitamo.” Ndumbwetu wapwevo Bybron uze atwama muKenya, ambile ngwenyi: “Ngweji kwivwanga kuwaha chikuma nge ngunamono chihande chili nakuhanjika ngwavo vanalovola Mbimbiliya mulilimi likwavo. Vihande kana vyeji kungukafwanga ngumone ngwami Yehova katala vatu kumesoko.”

 Namijimbu yili nakuhanjika hali vandumbwetu vaze vali nakuyanjisa yinahase kutukolezeza. Ndumbwetu Jackline wamuKenya ambile ngwenyi: “Kushinganyeka hakumika chavo chinazamisa lufwelelo lwami. Nge nguli nakutanga mijimbu yavo, ngweji kufwilanga kutachikiza vyuma vyeji kuvakafwanga vomike. Kaha ngweji kutachikizanga jino ngwami kulomba, nakutanga Mbimbiliya nakwimba myaso, vize vatu kavamona kupwa vyavilemuko vikiko vyeji kukafwanga vandumbwetu vomike.”

 Ndumbwetu Beatriz wamulifuchi lyaCosta Rica amona mijimbu yize yeji kuhanjikanga haukalu kupwa yayilemu. Ambile ngwenyi: “Mijimbu yahaChihanda chaMijimbu yeji kungukafwanga ngutachikize omwo liuka lyeji kukafwanga washi vandumbwetu vali muukalu, kaha nawa mujila yazangi. Chuma kana cheji kungukafwanga ngukunyuke ngwami chikupu vene eli hiliuka lyaYehova.”

 Twawahilila chikuma kutachikiza mijimbu yayihya yili nakuhanjika hali vandumbwetu vamukaye kosena. Chakuzeneka wana uze mweji kuhananga kumulimo wamukaye kosena kachi katwahasa kutambula mijimbu kanako. Wana kana kakavulu mweji kuuhananga kuzachisa jijila jatwama ha donate.pr418.com. Tuli nakumisakwilila hamuchima wenu wakuhana.