Chuma chimwe chize vanatalililanga vinjiho jaYehova uno mwaka shina kutala Vindiyo 1 yaMujimbu waMulimo Azachile Yesu. Kaha vavavulu vanayitale lyehi. Eyi hivindiyo yimwe hajivindiyo 18 navalovola. Milimo muka vali nakuzata mangana valovole eji jivindiyo, kaha munakundwizanga ngachilihi ou mulimo?

 Hamutango waAustralasia, nge vali nakukopa vihanda vyavindiyo yaMujimbu waYesu, kweji kupwanga vatu kafwe 50 nakuheta ku 80 hakukopa chihanda chimwe. a Vaka-kuhema navaka-kukopa veji kuvahananga vyakulya vyamusana nachingoloshi natuvyakulya tweka. Veji kushinganyekelanga chimweza vyakulya vatela kukalya. Esther uze azachila kuLipatimende Lyatala haVyakulya alumbunwine ngwenyi, “Tweji kulandanga vyakulya kuli vaka-kulanjisa vakulisezaseza mangana tulande vyakulya vyamwaza kaha nawa handando yakutamo. Tweji kwalumunangako nawa vyakulya kuchina navilyenyeka.” Hakumbi hakumbi mutu umwe eji kulyanga vyakulya vyakuheta kujimbongo jajindola $4 (U.S.).

 Vaka-kukopa navaka-kuhema vasakiwa nawa kuvakinga keshi kuvahana vyakulya kahako. Uno kuvakinga kuvyuma muka? Mulifuchi lyaAustralia mwatwama chikuma musana kaha nawa muzuma chikuma, oloze miteleleji yeji kufumanga kulikumbi yinahase kuneha ukalu kumujimba. Hakusaka vaka-kukopa navaka-kuhema vahone kufwa musana, lizavu lyavaka-kukundwiza vaka-kukopa navaka-kuhema lyeji kulemanga jimbalaka, nakuvahana vivanjilo vyahameso, namiluchi nameya. Kevin uze azachila kuLipatimende lyaKutunga jiVindiyo Nakukopa Mazu ambile ngwenyi: “Ava vaka-kukafwa eli lizavu vavavulu vapwa vaka-kufuminyina kujizuvo nakuzachila haMbetele. Kaha veji kuzatanga mulimo kana namilimo yeka namuchima wakulinyisa. Chakuzeneka vakiko katweshi kutesamo mulimo kanouko.”

 Vihanda vimwe vyavindiyo katweshi kuhasa kuvikopela haofesi yamutango hachihela chahaweluka chize twatunga chipwe mukapete kakukopelako. Halwola lwangana vihanda kana veji kuyanga nakuvikopela kuvihela vyeka. Hakusaka kukopa vihanda vyakushikulu vyamuMbimbiliya muze kamwatela kusoloka jitambo jakakahya kakezi, namikwakwa yamakumbi ano najizuvo jamakumbi anoko, vaka-kukopa navaka-kuhema vatela kuya kuvihela vyakwakusuku chikuma. Vatela kulongejeka uvwalo navyuma vyeka navakazachisa nakuvitwala hachihela navaya nakukopela. Shimbu kanda vaputuke kukopa, vaka-kukafwa muka-kutetekela lizavu lyavaka-kukafwa vaka-kuhema navaka-kukopa vatela kumona ngwavo hachihela kana hali jinjenileta, nameya amwaza akunwa navimbushu. Vaka-kukopa navaka-kuhema veji kusavalanga kujizuvo javandumbwetu vakungalila vali nakukopela chipwe mujizuvo jakutambuka najo chipwe kujizuvo javangeji.

 Kukopela kuvihela kana chasakiwa kuzachisa jimbongo jajivulu, nalwola kaha nawa cheji kuzeyesanga chikuma vaka-kuhema navosena vaze navazanamo. Shikaho mu 2023, Lizavu lyaKutwaminyina lyetavishile kulanda mbango yakukopela vindiyo yakuheta kujimbongo jajindola jimiliyoni 2.5 (U.S.). Likina kana lyeji kulingisanga jivindiyo jisoloke kanawa nakusoloka kwijiva nge vanajikopela muweluka. Echi chili nakutukafwa tuhone kuzachisa jimbongo jajivulu hakukopa. Darren WamuKomiti yaMutango waAustralasia ambile ngwenyi: “Kuzachisa mbango yakukopela vindiyo cheji kukafwanga vaka-kukopa vahone kuzeya chikuma nakuvashiwila kukopa cheka vihanda vimwe nge chili nakusakiwa. Chakutalilaho, nge tuli nakukopela muweluka tunahase kupwa kaha nalwola lwalundende lwakukopa omu likumbi lili nakulauka. Oloze kuzachisa eyi mbango yakukopela, tunahase kutunga likumbi lili nakulauka nakweseka kukopa palanga nomu natukopa vize tunakusaka.”

 Hakukopa vindiyo yimwe yaMujimbu waYesu kwasakiwa vandumbwetu vavavulu chikuma. Uno ava vandumbwetu veji kwivwanga ngachilihi hakumona milimo muli nakukilikita muvakafwe?

 Amber uze atambukile tunda yajikilomita jakuzomboka 700 kufuma kumbaka yaMelbourne nakuya akazane mumulimo ou wakukopa ambile ngwenyi: “Omu ngwahetele kuchivaza chajindeke vandumbwetu vahambetele vanguzakamine chikuma. Vaka-Mbetele vavavulu vangusanyikilenga kujizuvo javo tukalile hamwe vyakulya. Kaha omu vapwile nakungukopa, vandumbwami vangusolwelele zangi nakungukafwa nguhone kwivwa woma. Yehova angukiswile chikuma hakuya nakuzata mulimo kanou, ngocho kangwevwile nge ngunalisuulako.”

 Derek uze azachila mulizavu lyavaka-kukopa eji jivindiyo ambile ngwenyi: “Malipatimende amavulu anatukafwe putu vene kumaputukilo amulimo kanou. Ngunawahilila chikuma kuzachila hamwe navandumbwami vaze vanalisuula kuzachisa lwola lwavo navikumba vyavo nangolo javo mangana vakundwize ou mulimo. Vakwechi muchima wakulisuula nalikoji kaha nawa vanatukafwe chikuma. Chikupu vene Yehova natukiswila hamwe. Ngunakunyuka ngwami Yehova eji kwivwanga kuwaha kumona mihako yeji kufumanga hakukilikita chetu najila nawa tweji kuzachilangamo milimo kana.”

 Tunakumisakwila hakukundwiza ou mulimo wakukopa eji jivindiyo kuzachisa wana mweji kuhananga, kuhakilako vene nauze mweji kuhananga kuzachisa donate.pr418.com.