MuJanuary 2021 Lizavu lyaKutwaminyina lyalowele mukanda wauhya waLivwise Kuwaha Kuyoya Haya Myaka a wakuzachisa hakulinangula Mbimbiliya. Uno mwevwile ngachilihi hakwivwa mutambi kana? Matthew wamulifuchi lyaCanada ambile ngwenyi: “Ngwawahililile chikuma. Kuwahilila chami chatohweleleko omu ngwapwile nakwivwilila kuvihande najivindiyo jakulumbununa ovyo vatungililile chinoma kana nomu vachesekele. Ngwafwililile kumona mukanda kana nakuputuka kuuzachisa.”

 Mukanda waLivwise Kuwaha Kuyoya Haya Myaka uli najila yayihya yakutwaminyinamo vilongesa vyaMbimbiliya. Oloze echi keshi chikiko chihandwa kaha chili hali ou mukanda wauhya namikanda tunazachisanga kunyimako. Kachi nge munazachisa lyehi mukanda wakupulita waLivwise Kuwaha Kuyoya Haya Myaka, kaha munamono ngwenu uli nakwivwakana mweka. Hakusaka tutachikize kanawa chihandwa chiliho, tushimutwilenu chikuma hajila vanatungilamo ou mukanda.

 Mapapilo amalemu. Mwomwo ika vazachishilile mapapilo amalemu? Mukanda waLivwise Kuwaha Kuyoya Haya Myaka uli namivwimbimbi yamwaza yakuzomboka 600. Mivwimbimbi kana yinavulu chikuma, kuhambakana yize yapwile mumukanda waNayitunangula. Omu mumukanda nawa muli namahanya amavulu, haze kaheshi vasona chipwe mivwimbimbiko. Echi chanehele ukalu uno, mwomwo kachi nge lipapilo lyalilelu, kaha mutu nahase kumona mivwimbimbi yili kusali yalipapilo likwavo. Hakusaka kuhonesa ukalu kana, vandumbwetu vamuLipatimende lyaKupulita lyaMukaye Kosena (IPD) haWallkill, New York, muU.S.A., vesekele miyachi yamapapilo yiwana yize tuli nakuzachisanga hakupulita mikanda yetu. Komiti Yakusoneka Mikanda yaLizavu lyaKutwaminyina yakekesele muyachi himuyachi wamapapilo vazachishile, ngocho vasakwileho uze wapwile namapapilo aze nawalingisa mutu ahone kumona vyuma vili kusali. Numba tuhu ndando yawawa mapapilo yatohwele kafwe jipaseti 16 kuhambakana nandando yamapapilo tweji kuzachisanga kumikanda yikwavo, oloze ali nakukafwa vilongesa vyaMbimbiliya vatange kanawa lifwo hilifwo lyamukanda waLivwise Kuwaha Kuyoya Haya Myaka, chakuzeneka kutanguka namivwimbimbi yili nakusoloka kusali yalipapilo.

 Lamikiso yakulihandununa yalipapilo lyahelu. Lipapilo lyahelu lyou mukanda wauhya lili nakwivwakana mujila yeka yakulihandununako namikanda yetu yikwavo, mwomwo vanalilamika mujila yeka. Muchishishisa chakuzachisa lipapilo lyahelu lyakuvyakuma nganomu veji kutunganga mapapilo ahelu amikanda yetu yikwavo, oloze vanazachisa lipapilo lyahelu lyakufuvalala, echi chikiko chinalingisa mukanda kana upwenga wakulipwila. Jila vanatungilamo lipapilo lyahelu lyou mukanda nayilingisa mukanda utwaleho lika kusoloka kanawa numba nge vanauzachisa mapapa kakavulu. Chipwe ngocho, jila vanalamikilamo mukanda kana yandando chikuma kuhambakana jila veji kuzachisanga hakulamika mikanda yeka. Shikaho mitango yazachililile hamwe mangana valande vyuma vyakuzachisa handando yayindende.

 Uno mwomwo ika vasakwililile kuzachisa vyuma vyandando yayinene? Ndumbwetu umwe azachila kulipatimende lya IPD alumbunwine ngwenyi: “Tunatachikiza ngwetu ou mukanda navakauzachisa kanawa, ngocho tuli nakufwila ukatwaleho kusoloka kanawa chamokomoko nakuuzachisa mapapa kakavulu.” Eduardo uze azachila muofesi yakupulita hamutango wamuBrazil ambile ngwenyi: “Tunawahilila chikuma hakumona omu liuka lyaYehova linazachisa vinoma vyakukola mangana usoloke kanawa, nakupwa wakukola, kaha wamwaza vene nakuukwata oku nawa vali nakuzachisa kanawa jimbongo jaliuka.”

 Twaputukile kupulita mukanda waLivwise Kuwaha Kuyoya Haya Myaka muMarch 2021. Halwola kana kwapwile musongo wachihita waCOVID-19, kahechi chanehele ukalu wauvulu. Hakuwana nge mujiMbetele vakanyishile vatu kutambwojoka, ngocho vandumbwetu vazachila kukupulita kavavakafwilenga kuli vaka-kuzachila haMbetele kufuminyina kujizuvoko, kaha nawa kavahashile kusanyika vandumbwetu vavahya vezenga haMbeteleko. Echi chalingishile vaka-kupulita vakehe, kaha vihela vimwe vyakupulitila nawa vavisokele kweseka najishimbi jafulumende.

 Uno vakumishile ngachilihi ukalu kanou? Omu vihela vyakupulitila vavisokolwele, vandumbwetu vamwe vamumalipatimende eka ahambetele vavalwezele vazateko mulimo wakupulita halwola lwalundende. Joel uze azachila kulipatimende lyaIPD ambile ngwenyi: “Muchima wavandumbwetu wakulisuula nakufwila kulinangula milimo yayihya vyatukafwile tutesemo ou mulimo.”

 Chamokomoko naukalu, tunapulita lyehi jikope jajivulu chikuma jamukanda waLivwise Kuwaha Kuyoya Haya Myaka. Hakusaka kutunga ou mukanda twasakiwile vinoma vyavivulu vyakuzachisa, vimwe shina mapapilo, naulombo navyuma vyeka. Twazachishile jimbongo jajindola jakuheta kujimiliyoni 2.3 jaU.S. hakulanda kaha vyakuzachisa. Hakusaka tuhone kuzachisa jimbongo jajivulu, tunapulitanga kaha mikanda yinasakiwanga muvikungulwilo.

 Uno vaka-kunangula Mbimbiliya navilongesa vyavo vali nakwivwa ngachilihi hali echi chinoma chachihya? Ndumbwetu Paul wamuAustralia ambile ngwenyi: “Ngweji kulivwisanga kuwaha kuzachisa mukanda waLivwise Kuwaha Kuyoya Haya Myaka hakutwaminyina vilongesa vyami. Jila vanasonekelamo ou mukanda yamwaza chikuma kaha vatu vanauzange. Muli mijimbu yayashi kwivwishisa, navihula vize naviheta vatu kumichima, najivindiyo, namivwimbimbi, najichati, navyuma atela kulinga chilongesa. Jila vanautungilamo yinangukafwe nguhotole uhashi wami wakunangula.”

 Chilongesa chaMbimbiliya umwe wamuUnited States ambile ngwenyi: “Ngunazange chikuma ou mukanda wauhya. Mivwimbimbi yeji kungukafwa ngwivwishise vishina vyavinene. Jivindiyo jeji kunguhetanga kumuchima nakufwila kulinga vyuma nangutala.” Ou chilongesa eji kulinangulanga kavali muchalumingo, kaha eji kukungulukanga lwola lwosena.

 Jikope jajivulu chikuma jamukanda waLivwise Kuwaha Kuyoya Haya Myaka navajipulita mumalimi amavulu. Oholyapwa tuli nakuhanjika ngana, Lizavu lyaKutwaminyina linetavisa kulovola ou mukanda mumalimi 710, vanahakilako malimi 340 kutotala vetavishile kulovola mukanda waNayitunangula.

 Uno jimbongo jakuzachisa hakupulita veji kujiwananga kulihi? Veji kuzachisanga wana wajimbongo jakumulimo wamukaye kosena, jimwe jize veji kuhananga kuzachisa donate.pr418.com. Tweji kukusakwililanga hamuchima wove wakuhana, mwomwo weji kutukafwanga tulovole Mikanda yaKukafwa Kulinangula Mbimbiliya vaze vali nakusaka kulinangula hali Yehova nakulivwisa “kuwaha kuyoya haya myaka yosena.”—Samu 22:26.