Mbimbiliya yahajikilile chimweza ngwayo mumakumbi ano nakusolokanga jijita, namindenda, namisongo yachihita nayuma vyeka “vyakwivwisa vatu woma.” (Luka 21:10, 11) Awa mazu aupolofweto anatwalengaho lika kutesamo mumwaka wamulimo wa 2022. a Chakutalilaho jita yamuUkraine yinatwaleho lika nakulingisa chiyoyelo chavatu vavavulu chipwenga muukalu. Halwola yaputukile jita, vatu mukaye vachipwile lika nakulipika namusongo waCOVID-19. Kaha nawa vatu vavavulu vanamononga ukalu wakulijila wakufwana nge mindenda mulifuchi lyaHaiti napeho yanyamanganda muCentral America, namuPhilippines namafuchi akusulo yaAfrica. Uno Vinjiho JaYehova vanakafwe ngachilihi vaze vapwanga muukalu kana?

 Mumwaka wamulimo wa 2022, liuka lyatu lyakafwile vatu vapwile muukalu wakulijila wakuheta ku 200. Jimbongo josena twazachisanga hakukafwa vatu vapwanga muukalu jahetanga kafwe kujimiliyoni jajindola 12. b Tala omwo vazachisanga jimbongo jaliuka hakukafwa vatu muukalu uvali.

 Ha 14 August, 2021, kusulo yaHaiti kwahichile mundenda waunene chikuma (magnitude 7.2.) Chaluvinda Vinjiho vatatu vafwile, vamapwevo vavali nawalunga umwe, vaze vayovokele vavijile mwomwo yamundenda kana. Ndumbwetu walunga Stephane ambile ngwenyi, “Vatu vavavulu munganda vafwile kaha kwapwilenga vipeji vyavivulu muchalumingo hatukweji vavali.” Ndumbwetu mukwavo walunga Eliezer ambile ngwenyi, “Vinjiho vavavulu kavapwile najizuvo, nauvwalo, najisapato navyuma vyeka vyakulikafwa navyoko. Vatu vayoyelenga muchiwomawoma hatukweji vavavulu mwomwo yatumindenda twatundende tuze twahichilenga cheka.”

 Liuka lyetu lyakafwile vatu washiwashi. Mutango wamuHaiti wahanyine vyakulya vyakuzomboka jitani 53 najimbalaka, najimatileji, najisola jakuhakisa kakahya kakezi mujishinga. Kaha nawa mumwaka wamulimo wa 2022, twawahisanga nakutungulula jizuvo jakuzomboka 100. Kaha vazachisanga jimbongo jajindola jakuzomboka hamiliyoni yimwe hakukafwa vatu vapwanga muukalu.

 Vandumbwetu vanawahilila chikuma. Lorette ambile ngwenyi: “Mundenda wenyekele zuvo yetu nakusekasana chetu katwapwile navyakulyako. Oloze liuka lyaYehova lyatukafwile, hakutuhana vyuma vyosena vize twasakiwile.” Micheline ambile ngwenyi: “Mundenda wenyekele zuvo yetu muze ngwatwaminenga navana vami vamalunga vavali. Kangwatachikijile navyakulingako ngocho ngwalombele kaha Yehova angukafwile kaha angukumbulwile kuhichila muliuka lyenyi. Oholyapwa tuli nakutwama jino muzuvo yamwaza yakukola. Ngocho ngunakufwila kukilikita noho nanguhashila, mangana ngusolole kusakwilila chami kuli Yehova.”

 Kukafwa chetu vachimwene nakuli vakulwane jafulumende. Mukulwane wambongi yaL’Asile ambile ngwenyi: “Ngunamisakwilila chikuma hakwiza washi nakukafwa vatu. Nguli nakumyalisa chikuma hakuwana nge munavumbika fulumende, ngunawahilila chikuma hakutachikiza ngwami kamweshi nakufwila jimbongoko, oloze muli nakufwila kukafwa vatu. Munakuvakafwa mwomwo mwavazanga.”

 Ha 24 January,2022, Peho yaNyamanganda vavuluka ngwavo Ana yahuhwile muMozambique kufumaho yahetele nakuMalawi. Eyi peho yanehele vula yayinene chikuma, napeho yize yapwile nakutambuka kafwe jikilomita 100 muola yimwe (62 mph). Yenyekele jitambo jakakahya kakezi nakupuzula vyalo nakuneha mavaji amanene chikuma.

 Peho kana yanehele ukalu kuli vinjiho jaYehova vakuzomboka 30,000, mulifuchi lyaMalawi naMozambique. Ndumbwetu Charles uze azachileko mulimo wakukafwa vaze vapwile muukalu ambile ngwenyi: “Omu ngwamwene vandumbwetu vali nakuyanda, nakumona vyuma vyavo vyosena vize vyalyenyekele changukolele kumuchima nakunguhombesa.” Vyuma vyakaluhwilileko chikuma mwomwo vyakulya vyavindende vize vapwile navyo najimbuto javo vavihungumwine nameya. Kaha nawa jizuvo javatu vavavulu japuzukile. Chaluvinda, ndumbwetu umwe afwishile pwevo lyenyi navana venyi vamapwevo vavali omu wato wakuyovola vatu wavombele.

 Nyamanganda kana evwishile woma. Kafwe nalwola lwa 1:00 nachimene, tanga yaSengeredo yize yatwama munganda yaNchalo muMalawi yevwile chivumo chameya chili nakwiza, tulwiji vavali vazalile chikuma. Ngocho ndumbu Sengeredo ashinganyekele kufuma muzuvo. Chuma alingile chapwile chamangana mwomwo nakushimbula chiku livaji lyejile nakupuzula zuvo. Vikumba vyavo vyosena vyalyenyekele, chipwe kuvihungumuna nalivaji. Eyi tanga yachinyinyine haZuvo yaWangana haze vapwile nakutambuka minyutu 30 kufuma hembo lyavo. Oloze halwola kanelu vatambukileho jihola jivali. Vahetele vanazovo oku nawa vanazeye, oloze kavalemanyineko.

 Mutango wamuMalawi namuMozambique wawahishile vyuma mangana vakafwe vandumbwetu. Valwezele tulama vakujinguluka, natulama muvikungulwilo, vakekese nakumona vyuma vapwile nakusakiwa vandumbwetu nakuvakolezeza kushipilitu nakuvakafwa mujijila jeka. Jikomiti jaKukafwa Vatu Vali muUkalu Wakulijila (DRC) vajilwezele jitwaminyine mulimo wakukafwa vandumbwetu, kaha jakafwile washi vandumbwetu vawane vyakulya navyuma vyeka vyakulikafwa navyo. Vazachishile kafwe jimbongo jajindola 33,000 hakulanda vyuma vyakulikafwa navyo. Kaha jimbongo jajindola jakuheta ku 300,000 vajizachishile hakuwahisa nakukutungulula jizuvo.

 Eji jikomiti jaDRC jazachishile kanawa jimbongo, chapwile chachilemu kulinga ngocho mwomwo jindando janyinyine. Chakutalilaho mutukweji vamaputukilo 7 vazachile mulimo wakukafwa vatu vaze vali muukalu, ndando yaunga wachivwale veji kulyanga chikuma muMalawi, yatohwele kafwe najipaseti 70. Ndando yamaji amuminyau nayikiko yanyinyine. Shikaho hakusaka kuzachisa kanawa jimbongo, ava vandumbwetu valanjilile vyakulya navyuma vyakutungisa jizuvo muMalawi. Kaha nawa valanjilenga vyavivulu halwola lwolumwe. Ngocho echi chalingishile vavatepulwileko ndando, nakuhona kuzachisa jimbongo jajivulu hakufwetela minyau yakututa vyuma kana.

 Mulimo wakukafwa vali muukalu wakwachile chikuma vatu jaYehova kumichima. Ndumbwetu walunga Felisberto wamuMozambique ambile ngwenyi: “Kanda lyehi ngumonengaho liuka limwe nalihana vyuma vyavivulu ngana vyakufwana nge, vinoma vyakutungisa jizuvo, naminyau yakututa vyuma, navakakutunga, navyakulya nakuhana jindongi jamwaza. Vyuma kana vyasolwele hatoma zangi yakulizanga navandumbwetu, yize ahajikile Yesu hali Yowano 13:34, 35.” Zuvo yandumwetu Ester uze apwa tuliwe muMalawi nayikiko yalyenyekele kaha ambile ngwenyi: “Ngwahombele chikuma mwomwo kangwapwile najimbongo jakutungisa zuvo yekako. Shikaho omu vandumbwetu vejile nakungutungila zuvo, ngwevwile nge ngunahete lyehi mupalachise.”

 Omu tuli nakupandama kukaye kakahya natumonanga chikuma ukalu wakulijila. (Mateu 24:7, 8) Chipwe ngocho, tweji kusakwililanga chikuma hamawana ove weji kuhananga, kaha tunafwelela chikuma ngwetu vatu jaYehova navavahananga vyuma navasakiwa vyakuvakafwa. Jijila jakuhanyinamo mawana vanajilumbununa ha donate.pr418.com. Tunakusakwililako hamuchima wove wakuhana.