Mbimbiliya yapolofwetele ngwayo “lifuchi limwe nalikafumbukila lifuchi likwavo” kaha nawa ngwayo ‘kuchikukulwishi chakatwamino kamyaka yino’ nakusoloka ukalu wakulijila wauvulu. (Mateu 24:3, 7) Tunamono omu upolofweto kana unatesamo mumwaka wamulimo wa 2023. a Oloze chamokomoko navikokojola naukalu wakulijila vize vinasolokanga mumafuchi kafwe 100, Vinjiho jaYehova vanasololanga zangi yaYehova. Uno vanayisololanga ngachilihi?

 Mumwaka wamulimo wa 2023, vandumbwetu vamonanga ukalu wakulijila chipwe wakuneha kuvatu wakuhambakana 200. Mauka amujishimbi aVinjiho jaYehova azachisanga jimbongo jajindola jakuhambakana jimiliyoni 10 b jakufuma kuwana wamulimo wamukaye kosena mangana vakafwe vaze vapwanga muukalu. Jimbongo kana jinaliweze hajimbongo jize vandumbwetu vazachisanga hakapanji mangana vakafwe vandumbwavo vamujingalila javo. Talenu omwo vazachisanga wana wenu wajimbongo hakukafwa vaze vapwanga muukalu uvali kaha, haukalu wauvulu uze vahitangamo vandumbwetu.

 Mujingalila jimwe jamuNigeria mweji kupwanga chikuma mavaji. Chipwe ngocho, muOctober 2022 mulifuchi kana mwapwanga livaji lyalinene chikuma lize kanda lyehi lisolokengaho mumyaka 10 yinahichi kunyima. Jihekita jakuhambakana 676,000 (1,670,432 acres) jamande jengilanga mulivaji, kaha nawa vatu vakuhambakana jimiliyoni jivali vasezanga membo avo mwomwo yeli livaji. Mutango wamuNigeria watongolanga washiwashi Jikomiti jaKukafwa Vatu Vali muUkalu Wakulijila mangana jihane vatu vyuma vyakulikafwa navyo nakuvakolezeza kushipilitu.

•   Vaka-kwambulula 7,505 vasezanga membo avo

•   Jizuvo 860 japuzukanga chipwe kulyenyeka

•   Jizuvo jaWangana 90 naZuvo yaKukunguluka Chachinene yimwe vyengilanga mulivaji

 Jimbongo jakuhambakana $250,000 vajizachisanga hakukafwa vaze vali muukalu wakulijila, vajizachisanga hakulanda:

•   Vyakulya vyakufwana nge loso, makunde, navyeka vyakufwana ngana

•   Navyuma vyakufwana nge jimatileji namishikitela

•   Kutunga chipwe kutungulula jizuvo jize jalyenyekanga

 Uno vandumbwetu vazachishile ngachilihi kanawa ou wana wajimbongo? Jila yimwe shina, vavangililile kukekesa kanawa zuvo hizuvo vamone numba nge chikupu vene yili nakusakiwa kuyitungulula. Nge vanamono ngwavo chili nakusakiwa kutunga zuvo yeka, kaha vavatungilililenga zuvo kweseka nangalila yavo.

 Vandumbwetu vaze vakafwile vawahililile chikuma. Ndumbwetu umwe wapwevo ambile ngwenyi: “Livaji linakaluwisa chiyoyelo chetu, mwomwo mande etu najizuvo jetu vyalyenyekanga kaha katwapwanga nakwakutwamako. Twevwile kumuchima hwo omu vandumbwetu vejile likumbi vene lize nakutuhana kwakutwama. Twaunjile michima chikumanyi omu twatambwile vyakulya kufuma kuofesi yamutango. Twahonene mazu akuhanjika omu twamwene chisoneka chaYowano 13:34, 35 nachitesamo mukuyoya chetu. . . . Chikupu vene zangi yamuchano kuyatwama. Ami natanga yami yosena tuli nakusakwilila chikuma vandumbwetu hakwiza nakutukafwa halwola lwakutamo.”

 Vatu vamungalila kana vamwene omu twakafwile vandumbwetu. Mwangana wamungalila yaSabagreia, munganda yaBayelsa, ahanjikile ngwenyi: “Muno mukaye mwatama mauka chipwe jichachi jajivulu, oloze enu Vinjiho jaYehova, yenu kaha munalingi chuma chakufwana ngana. . . . Liuka [lyenu] hiliuka limwe lyamwaza muno mukaye.”

 MuFebruary 2023, MuChile mwepukile kakahya mapapa 400 nakwenyeka vyuma vyavivulu chikuma. Kakahya kana kochele musenge wajihekita jakukuhambakana 430,000 (1,062,553 acres), kuhakilako vene najizuvo jimwe jajilemu jamuChile jalyenyekele. Kafwe vatu vakuheta 8,000 vavatwalile kuvihela vyeka nakutwamako. Haze vene kwasolokele ukalu kanou, ofesi yamutango yaputukile kuwahisa vyuma mangana vakafwe vandumbwetu.

•   Vaka-kwambulula 222 vavalwishile nakuvatwala kuvihela vyeka

•   Jizuvo 20 jawemene

 Jimbongo jakuhambakana $200,000 vajizachishile hakukafwa vaze vali muukalu wakulijila, vajizachishile hakulanda:

•   Vyakulya nameya

•   Maji amumakina, navyuma vyakuzachisa kuunyoji, navitumbo

•   Kutunga cheka jizuvo jalyenyekele

 Tanga yimwe yalinyengele chikuma omu vyuma vyavo vyosena vyalyenyekele, kuhakilako vene nazuvo nakusekasana chavo. Kavapwile najila yeka yakuyoyelamoko. Hamakumbi amandende kufuma haze yawemene zuvo, eyi tanga yevwilenga kupihya chikuma kumuchima hakumona haze yapwile zuvo yavo jino hapimbi. Oloze omu vaputukile kuvatungila zuvo yeka, vaputukile kuunda muchima. Kumona zangi yavandumbwetu vaze valisuwile kwiza nakuvakafwa chavalingishile vaunde michima. Chuma kana chakwachile eyi tanga kumuchima nakuvalingisa valiweze hamukana wavavandumbwetu mangana vayenga nakutungila zuvo ndumbwetu weka.

 Mulimo wakukafwa vandumbwetu vali muukalu wakwachile vandumbwetu vavavulu kumichima. Ndumbwetu umwe walunga ambile ngwenyi: “Kulongesa chaYehova chakuhakako Jikomiti jaKukafwa Vatu Vali muUkalu Wakulijila chakulipwila chikuma. Omu mwahichile likumbi limwe kaha kufuma haze wasolokele ukalu, vatwalile vyakulikafwa navyo kuli vandumbwetu vaze vapwile kuze kwasolokelele ukalu. Cheji kutukolezezanga kutanga mijimbu yomu mulimo wakukafwa vatu vali muukalu uli nakutambuka mukaye. Oloze nge yove vali nakukafwa mwivwa nawa mweka. Nachikulingisa usakwilile chikuma liuka nomu vandumbwetu vali nakulondezeza vilinga vyaYehova; nomu vandumbwetu vali nakusaka tupwenga vakulikangula kumujimba nakushipilitu namuvishinganyeka mangana tuzame lika kushipilitu. Tunalimwena zangi yaYehova.”

 Omu tuli kukukuma chakatwamino kamyaka yino, ukalu wakulijila nauvulilako lika. (Luka 21:10, 11) Chipwe ngocho, Mwangana wetu wazangi Kulishitu Yesu ali nakuzachisa chikungulwilo chavaka-Kulishitu mangana asolole ngwenyi mwapwanga nayetu “makumbi osena palanga nakuchikukulwishi chakatwamino kamyaka yino.” (Mateu 28:20) Wana wenu uze mweji kukundwizanga kumulimo wamukaye kosena kuzachisa donate.pr418.com najijila jeka, kuhakilako vene nakulisuula kuzachisa lwola lwenu nangolo jenu, vili nakusolola nge muli nakukundwiza Wangana naMwangana wawangana kana. Tuli nakumisakwilila chikuma hamuchima wenu wakuhana.