Mukakweji waJuly naAugust 2020, vandumbwetu vamukaye kosena navakatala polongalamu yoyimwe yakukunguluka changalila havyalumingo vyovimwe, kahelu nalukapwa lwola lwatete kulinga ngocho. Hakusaka mangana vatale polongalamu kana, kwapwanga nakusakiwa kuyalumuna mumalimi akuhambakana 500. Kakavulu kunoneka mulimo kana nakuuzata cheji kumbatanga mwaka umwe chipwe kuhambakanaho. Oloze mwomwo yamusongo wachihita wacoronavirus, vaka-kwalumuna vapwanga kaha natukweji vawana vakwalumuna echi Kukunguluka chaNgalila cha 2020 chakwamba ngwavo, ’Wahililenunga Shimbu Yosena’.

 Ou mulimo waunene ngana vauzachile kumalipatimende avali hachikota chaVinjiho jaYehova, Lipatimende Lyatala haMulimo waKwalumuna Mikanda naLipatimende Lyatala haMulimo waVyakulandalanda Mukaye Kosena. Lipatimende Lyatala haMulimo waKwalumuna Mikanda lyamwene ngwalyo, mazavu avaka-kwalumuna atelelele kupwa navinoma vyavivulu vyakuzachisa vyakufwana nge jimayikolofwoni jangolo mangana vatesemo mulimo kana. Kaha Lipatimende Lyatala haMulimo waVyakulandalanda Mukaye Kosena lyalanjile, jimayikolofwoni 1,000 nakujituma kuvihela vyakwalumwina mikanda kafwe 200.

 Hakusaka vazachise kanawa jimbongo jaliuka, eli lipatimende lyalanjile jimayikolofwoni jajivulu halwola lumwe nakujihaka hachihela chimwe, kufumaho jino vajitumine kuvihela vyakwalumwina mikanda vyamukaye kosena. Hakuwana nge valanjile jimayikolofwoni jajivulu halwola lwolumwe, ngocho jimbongo josena vazachishile hakulanda nakutuma mayikolofwoni yimwe jahetele kafwe kujindola 170. Kaha echi chalingishile vazachise jimbongo jajindende.

 Lipatimende Lyatala haMulimo waVyakulandalanda Mukaye Kosena lyapwile namulimo wakulanda nakutuma vinoma kana mukakweji waApril naMay 2020. Halwola kana vakakusekasana kavapwile nakuzata kanawako mwomwo yamusongo wachihita. Chipwe ngocho, kusongo yakakweji waMay vatumine vinoma vyosena kujiofesi javaka-kwalumuna mikanda, najiofesi jamutango nakuvihela vyeka vyakwalumwina mikanda.

 Jay Swinney uze eji kutetekelanga Lipatimende Lyatala haMulimo waVyakulandalanda Mukaye Kosena ambile ngwenyi, “Malipatimende ahambetele azachililile hamwe navaka-kusekasana vaze valiwezele mumulimo kana. Shipilitu yaYehova yikiko kaha yatukafwile tuzate kanawa mukulinunga nakuzachisa kanawa jimbongo jamawana akulisakila hakulanda vyuma vapwile nakusakiwa vandumbwetu.”

 Nicholas Ahladis wamuLipatimende Lyatala haMulimo waKwalumuna Mikanda, ambile ngwenyi: “Vaka-kwalumuna vaze vakanyishile kutambwojoka mwomwo yamusongo wacoronavirus vawahililile chikuma kutambula evi vinoma. Numba tuhu ava vandumbwetu kavapwile nakuzachila kuvihela vyovimwe navakwavoko, oloze vinoma vavatuminyinyine vyavakafwile vahase kuzachila hamwe mangana valumune, nakukopa vihande, navimweso namyaso mumalimi akuzomboka 500.”

 Shikaho, vakumishile ou mulimo wakulanda vyuma namilimo yeka mangana valumune Kukunguluka chaNgalila cha 2020 chakwamba ngwavo: ‘Wahililenunga Shimbu Yosena’ chize nachinganyalisa vandumbwetu mukaye kosena. Ngocho wana wenu wajimbongo mweji kuhananga kuzachisa keyala ya donate.pr418.com najijila jeka ukiko tunazachisa hakulanda vyuma kanevi.