Lizavu lyaKutwaminyina lili nakufwila kuzachisa mawana ajimbongo mangana vatunge vihela vize navitukafwa tuzate kanawa mulimo wakwambulula Wangana. Chakutalilaho, mumwaka wamulimo wa 2023, mauka ajishimbi aze veji kuzachisanga hajiofesi jamitango jaVinjiho jaYehova azachishile jimbongo jajindola jimiliyoni 500 hakulanda, nakutunga, nakutungulula, nakuwahisa jiZuvo jaWangana najiZuvo jaKukunguluka Chachinene mukaye kosena. a Jimbongo kana jinaliwezela kujimbongo jize vikungulwilo mukaye kosena vanazachisanga hakuzakama jiZuvo jaWangana.

 Kaha nawa eji jimbongo vali nakujizachisa kukutunga nakuzakama mitango yize yeji kutukafwanga tulongese kanawa nakukundwiza mulimo wakwambulula mukaye kosena. Tunakehesako milimo tweji kuzatanga hamitango mangana tuzachise jimbongo kukutunga nakutungulula jiZuvo jaWangana najiZuvo jaKukunguluka Chachinene. Chipwe ngocho, kuli nakusakiwa jimbongo jajivulu mangana tuwahise vyuma vinalyenyeka hamitango chipwe kuyitungulula chipwe kunungulula mitango yimwe. Mwomwo ika milimo kana yinapwila yayilemu? Uno mitango yeji kukundwizanga ngachilihi mulimo waulemu wamuwande? Twivwenu vyavivulu.

 Jiofesi jamitango jajivulu jinatwame myaka 30 chipwe 40 kufuma haze vajitungile. Nicholas wamuLipatimende Lyatala haMulimo waKutunga Mukaye Kosena ahanjikile ngwenyi: “Nazuvo yize veji kuwahisanga kuswakumwe yeji kupwanga naukalu mukuya chamyaka. Ngocho, kutungulula cheji kukafwanga zuvo yipwenga cheka kanawa nakutwalaho kuyizachisa.”

 Vihela vyajimbetele nawa vinakusakiwa kuvyalumuna alumunako mwomwo yakwalumuka chavyuma muliuka. Vaka-kwambulula vanavulilako mukaye kosena kufuma halwola vatungile mitango yayivulu. Ngocho kuli nakusakiwa vaka-kuzata hajimbetele vavavulu hakuzakama ava vaka-kwambulula vali nakuvula ngana. Echi chinalingisa mitango yize yatelemo halwola kana yipwenga yayindende oholyapwa.

 Kupwa vakukingiwa hichuma chikwavo chachilemu. Omu tuli nakuyoyela mumakumbi ano akukuminyina, tuli nakumona ukalu wakulijila wauvulu chikuma. (Luka 21:11) Shikaho, kuzachisa jijila jajihya jakutungilamo halwola tuli nakutungulula evi vihela vyetu, nachilingisa vihela kana vipwenga vyakukingiwa omu vandumbwetu vali nakuzachilaho. Nachilingisa nawa evi vihela vikapwe vyakutamo kuzachilaho mulimo wakulongesa vyuma vyakukafwa vaze vali muukalu nakutwalaho lika kukundwiza milimo yamuliuka nge kunasoloka ukalu wakulijila.

 Mumwaka wamulimo wa 2023, Lizavu lyaKutwaminyina lyalwezanga vandumbwetu vazate milimo yakutalisa kukutungatunga hamitango 43. Echi chili nakulumbununa nge vazachile ou mulimo kafwe hachimbwa chaJimbetele mukaye kosena. Talenu havyakutalilaho vyavindende vize vinasolola kulema chamulimo vali nakuzata.

 Angola. Ndumbwetu Matt WamuKomiti yaMutango waAngola ambile ngwenyi: “Tuli nakutokwa chakumona omu upolofweto wahali Hangai 2:7 uli nakutesamo mujila yakulipwila. Mumyaka 10 kaha vaka-kwambulula vanavulilako najipaseti 60. Hakusaka kuzakama kanawa ava vandumbwetu, kwasakiwile vaka-mbetele vavavulu. Chipwe ngocho, kukeha chaofesi yetu yamutango chatuhonesele kusanyika vandumbwetu vavavulu. Echi chalingishile vandumbwetu vahaMbetele vapwenga namilimo yayivulu chikuma nakuzata nawa jola jajivulu chikuma.”

 Vandumbwetu vamwe vavalwezele vakekese vyuma vatela kulinga mangana vatohwese ofesi yamutango. Hakavanga vashinganyekele ngwavo chuma nachikafwa washiwashi shina kutungulula mutango wamwaka. Oloze hanyima yakukekesa kanawa vawanyine nge kutungulula kayeshi kupwa jila yamwaza yakuzachishilamo mawanako. Ngocho, vashinganyekele kulanda zuvo yapwile hakamwihi namutango nakuyitungulula. Matt ambile ngwenyi, “Omu vandumbwetu valwezele Komiti yaMutango vyakulanda nakutungulula zuvo yamwaka, twashinganyekele ngwetu kayeshi kutamo kuyizachisa kumilimo natusakako. Oloze oholyapwa tunamono ngwetu zuvo kana yinatemo kuyizachisa. Chikupu vene, Yehova nakisula kunoneka kana.”

 Mutango waAngola naukasakiwa kuutohwesako cheka kulutwe. Chipwe ngocho, eyi zuvo yayihya, natujizuvo twatundende tuze vanatungu najizuvo jakufwetela, vinalingisa mutango upwenga nachihela chachinene mangana ukundwize kanawa mulimo wamuwande uze uli nakuzovoloka.

 Japan. Mutango wamulifuchi lyaJapan vautungile kafwe myaka 40 kunyima, kaha hamyaka yosena eyi kavazachile mulimo waunene wakuutungululako. Numba tuhu vapwilenga nakukilikita hakuuwahisa, oloze eji jizuvo jashimbwile chikuma kuhambakana myaka jatelele kutwama. Echi chikiko chinalingisa vaputuke kutungulula ou mutango.

 Mukuhita chalwola, chiyoyelo chahaMbetele nawa chinalumukanga. Shimbu kanda mwaka wa 2015 vaka-Mbetele kavaliwahishililenga vavene vyakulyako. Echi chalingishile tupete vakutelekela vamujizuvo hamutango waJapan vapwenga vavandende. Oloze oholyapwa vaka-Mbetele vali nakuliwahishilanga vavene vyakulya. Kutungulula chinalingisa vatohwese ava tupete vakutelekela, nakukafwa vaka-Mbetele chivashiwile kuwahisa vyakulya. Ndumbwetu wapwevo Kumiko uze azachila hamutango waJapan ambile ngwenyi, “Ava tupete vanangukafwe chingwashiwile kuwahisa vyakulya, nakungukafwa ngukundwize echi kunoneka chachihya haMbetele.”

 Milimo veji kuzachilanga hamutango waJapan yakwata chikuma hamulimo wamukaye kosena. (Mateu 28:19, 20) Mutango waJapan himutango umwe hamitango yivali yize yeji kupulitanga Mbimbiliya yamuundu. Shikaho, chuma chimwe navahakaho omu vali nakutungulula mutango shina likina lize nalitetanga mapapilo nakukoka lukungu mangana vaze vazachila kukupulita mikanda vapwenga vakukingiwa. Numba tuhu kulanda nakuhaka likina kana nachisakiwa kuzachisa kafwe jimbongo jajindola miliyoni yimwe, oloze nachikafwa mutango utwaleho lika kupulita nakutuma kulya chakushipilitu kuvihela vyeka.

 Vandumbwetu vazachile nangolo vatwaleho lika kupulita jiMbimbiliya nahalwola vali nakutungulula mutango. Ndumbwetu Trey wamuKomiti yaMutango waJapan ambile ngwenyi: “Halwola twapwile nakutungulula mutango, liuka lyapwile nakulovola jiMbimbiliya jajivulu mumalimi akulisezaseza, kaha nawa vatu vavavulu mukaye kosena vapwile nakusakiwa chikuma jiMbimbiliya. Kunoneka vyuma mangana tuhake likina lyalihya nakutwalaho lika kupulita mikanda, chasakiwile kuzachila hamwe namalipatimende amavulu namuka-kutunga uze twakumwine.” Chamokomoko naukalu wosenou, kufuma mukakweji waMarch nakuheta muAugust 2023, twapulitanga jiMbimbiliya kafwe 220,000 numba tuhu mulimo wakutungulula watohwanga halwola kana. Mulimo wosenou twaukumisanga kuzachisa jimbongo jajindende kaha.

 Chuma chikwavo chachilemu tuli nakutungulwila ou mutango shina, tuli nakufwila kuzachisanga kakahya kakezi kakandende. Ngocho navahakaho jisola jajihya, jize najitukafwa tulamenga jimbonbo jajindola kafwe 120,000 mwaka himwaka. Kaha nawa, hajinjanena navahakaho vivanjilo vitatu vyakulunjika vize navitukafwa tuhone kuzachisa chikuma kakahya kakezi nakutukafwa tulamenga jimbongo jajindola kafwe 10,000 mwaka himwaka. Numba tuhu kulinga vyuma kana omu tuli nakungulula mutango nachisakiwa jimbongo jajivulu chikuma, oloze nachitulingisa tulame jimbongo jajindola jakuhambakana hajimiliyoni 3.5 kuheta halwola luze natukasakiwa kuhakaho jisola najinjanena jeka. Kaha nawa navilingisa chihela chipwenga chamwaza.

 Eyi mitango yivali vanakutungulula yinasolola nge kuli milimo yayivulu yili nakusakiwa kuzata hajiMbetele mangana tutesemo milimo yili nakusakiwa. Chipwe ngocho, kuchili milimo yayivulu. Ndumbwetu Aaron WamuLipatimende Lyatala haMulimo waKutunga Mukaye Kosena ambile ngwenyi: “Numba tuhu tunatesamo milimo yayivulu, oloze kuchili milimo yayivulu chikuma.” Uno milimo kana natuyitesamo ngachilihi? Ou ndumbwetu atwalilileho kuhanjika ngwenyi: “Tuli nakutesamo mulimo kana mwomwo yamawana ajimbongo mweji kuhananga. Kaha nawa tuli nakusakwilila vandumbwetu vaze vanalihanenga kuzata milimo kaneyi navaze vali nakwashiwisako chiyoyelo chavo mangana vakalisuule kuzata mulimo kana kulutwe. Milimo vali nakuzata vandumbwetu namawana vali nakuhana vinasolola chikupu nge Yehova ali nakutukisula.”—Samu 110:3.

 Milimo yosena yakutunga nakutungulula vihela vyakulemesela Kalunga veji kuyikundwizanga kuzachisa mawana mweji kuhananga, amwe aze mweji kuhananga kuzachisa donate.pr418.com. Tuli nakumisakwilila chikuma hamuchima wenu wakuhana.