Myaso yapwa wana wakufuma kuli Yehova. Yinahase kwalumuna vishinganyeka vyetu, nomu tunakwivwa kaha nawa yinahase kutukunyula. Omu mukiko yapwa namyaso yikwavo yamuliuka lyetu. Kaha chachinenenyi eyi myaso yeji kutupandamisa kuli Yehova.

 Kufuma mu 2014, tunalovola myaso yikwavo yamuliuka yakuzomboka 70, kaha hamyaso kana hali yimwe yili mumalimi akuzomboka 500. Oloze pamo munalihulisanga ngwenu, ‘Veya veji kusonekanga myaso kana, kaha veji kuyilovolanga ngachilihi?’

 Myaso yikwavo yamuliuka veji kuyilovolanga kuli vandumbwetu vamulizavu lyavaka-myaso vamuLipatimende lyaKutunga jiVindiyo Nakukopa Mazu, lize veji kutetekelanga kuKomiti Yakunangula yaLizavu lyaKutwaminyina. MuLizavu lyaVaka-Myaso mwatwama vandumbwetu 13, vaze veji kusonekanga myaso, nakuyikopa, nakunoneka vyuma nakuzata nawa milimo yeka yasakiwa hakutunga myaso. Kaha nawa Komiti Yakunangula yinetavisa vaka-kulisakila kuzachila mulimo wahambetele kujizuvo javo vamwe vakumafuchi akulisezaseza mangana vazatengako milimo yakusoneka myaso nakwimba. Ava vandumbwetu veji kulisuulanga kuzachisa uhashi wavo chakuzeneka kufwila kuvalisa kuvatu.

 Uno mwaso ukwavo wamuliuka veji kuulovolanga ngachilihi? Chakavanga, Komiti Yakunangula yeji kusakulanga Chisoneka haze nahazama mwaso, nomwo vatela kukevwa vaze navakawivwilila. Kufumaho lizavu lyavaka-myaso lyeji kunonekanga vyuma mangana vatunge mwaso, nakuusoneka hamapapilo. Kufumaho veji kukopanga mwaso wakwesekelaho. Komiti Yakunangula yeji kwivwililanga kumwaso kana nakuvahana jindongi jikwavo. Kufumaho, lizavu lyavaka-myaso lyeji kwalumunangako vyuma vimwe kweseka navyuma yinahanjika Komiti Yakunangula nakukopa jino mwaso uvene. Eyi myaso veji kuyikopelanga kuvihela vyakulisezaseza, vihela vimwe shina hamitango, nakujizuvo javandumbwetu vaze vatwama navinoma vyakuzachisa hakukopa.

 Vandumbwetu veji kuzachisanga jipolongalamu jahakopyuta jakulisezaseza hakusoneka nakukopa myaso yikwavo yamuliuka. Mulimo kana wasakiwa nawa kuzachisa vinoma vyakutunga jimbendo, navisaji, navihungo, najimayikolofwoni. Jindando jajimayikolofwoni japutukila hajimbongo jajindola ja U.S 100 nakuheta ku 1000 nakuzombokaho. Mu 2020, twazachisanga jimbongo jajindola ja U.S 116,000 hakulanda vinoma vyakuzachisa hakukopa myaso.

 Vyuma muka veji kulinganga mangana vazachise kanawa awa mawana ajimbongo? Veji kuzachisanga vaka-kulisakila kuzachila mulimo wahambetele kujizuvo javo muchishishisa chakupwa nalizavu lyalinene hambetele lyavaka-myaso. Kaha nawa vandumbwetu veji kuzachisanga polongalamu yahakopyuta yize yeji kutunganga jimbendo jakulisezaseza, muchishishisa chakukungulula vandumbwetu mangana vembenga jimbendo kana.

 Vandumbwetu vazanga kwivwilila kumyaso yikwavo yamuliuka. Tara uze atwama muGermany ambile ngwenyi: “Eyi myaso yeji kungukafwanga nguunde muchima nge ngunalizakamina. Nge nguli nakuyivwilila mulilimi lyami, ngweji kwivwanga nge Yehova nangupakata mukasamba.” Ndumbwetu Dmitry wamuKazakhstan ambile ngwenyi: “Ngwazanga kwivwilila kumyaso yikwavo yamuliuka chakuzeneka kulizakamina ngwami pamo munahase kupwa vyuma vimwe navilimbalaka najindongi jamuMbimbiliya. Myaso kana yeji kungulingisanga nguhake chikuma mangana kuvyuma vyakushipilitu.”

 Delia wamuSouth Africa ahanjikile omwo eji kwivwanga hamyaso yikwavo yamuliuka ngwenyi: “Eyi myaso yili nakuzamisa lufwelelo lwami. Nge ngunahombo chipwe nge nguli muukalu, ngweji kuwananga mwaso uze weji kungukafwanga kweseka naukalu nguli nawo. Kakavulu, kwivwa kaha chivumo chamwaso cheji kungulingisanga nguhone cheka kuhomba chipwe kupihilila.”

 Hamyaso yikwavo yamuliuka, mutu himutu aliho nawenyi unamutuu tulo. Lerato wamuSouth Africa nayikiye ambile ngwenyi: “Mwaso wakwamba ngwavo ‘Palachise Yili Hakamwihi’ nawakwamba ngwavo ‘Kaye Kakahya Kali Nakwiza’ yeji kungulingisanga ngushinganyeke omwo nangukevwa halwola nangukasambilila mama. Lwola lwosena ngweji kwivwililanga kumyaso kana, ngweji kuhumikizanga mama ali nakwiza tulipakate mukasamba.”

 Mwaso ukwavo umwe wamuliuka wakafwile chikuma mwanapwevo wamyaka yakusemuka 16 wamuSri Lanka. Ambile ngwenyi: “Likumbi limwe mulongeshi wetu wasayasi angutenukilile chikuma nakungwamba mazu amapi hameso avakwetu vaka-kashikola mwomwo yakupwa nguChinjiho chaYehova. Ngwevwile woma chikuma kaha ngwahonene navyakuhanjika. Omu ngwakindulukile kuzuvo mama angulwezele ngwivwilile kumwaso wakwamba ngwavo ‘Study Makes You Strong.’ Mwaso kana wangulingishile ngumone ngwami ngwatelelele kuhehwojola nakuwana mwakukumbulwila uze mulongeshi. Kuheta Lichako, ngwashimutwilile namulongeshi wami. Angwivwililile nakuhanjika ngwenyi ‘ngunatachikiza jino kanawa vyuma vafwelela Vinjiho jaYehova.’ Nguli nakusakwilila chikuma liuka lyaYehova hakutuwahishila eyi myaso yakutukolezeza.”

 Uno jimbongo veji kuzachisanga hakulovola myaso kana veji kujiwananga kulihi? Jeji kufumanga kumawana mweji kuhananga akukundwiza mulimo wamukaye kosena, amwe aze mweji kuhananga kuzachisa jijila jakulisezaseza jatwama ha donate.pr418.com. Tuli nakumisakwilila hamuchima wenu wakuhana nakusuuluka.