Jifulumende jajivulu jinalweze vatu vakavangize lushimbi lwakulisosoloka navakwavo nakuhona kulikungulwila hamwe. Vinjiho jaYehova vanakukavangiza jishimbi kana oku nawa vali nakulemesela hamwe Kalunga navakwavo. Jila yimwe vali nakulingilamo ngocho, shina kuzachisa jipolongalamu jahamakina jakufwana nge Zoom mangana valemesele hamwe Kalunga.

 Hakusaka mangana tutwaleho lika kukunguluka mujila yamwaza, Lizavu lyaKutwaminyina lyaVinjiho jaYehova lyetavishile kuzachisa jimbongo jamawana akulisakila mangana valande jiakauti japolongalamu yaZoom jakuzachisa muvikungulwilo. Kunoneka kana chinakafwe chikuma vikungulwilo vimwe vize kavyeshi kuhasa kufwetela polongalamu kana hajimbongo jajindola 15 chipwe 20 numba kuhambakanyisaho. Hakavanga vikungulwilo kana vyapwile nakuzachisa jipolongalamu jakuhona kufwetela jize kajapwile nakuzata kanawako, kaha nawa kwasukaminenga vatu vavandende kaha. Vikungulwilo vyosena vize vili nakuzachisa eyi akauti yaZoom yaliuka, vili nakuchiwana kupwa chachashi kuyizachisa mwomwo polongalamu kana yakukingiwa kaha nawa kunahase kusukama vatu vavavulu chikuma. Oholyapwa vikungulwilo vyakuhambakana ha 65,000 vyamumafuchi akuzomboka 170 vili nakuzachisa akauti kana.

 Chikungulwilo chaKairagi chamuManado kunote yaSulawesi mulifuchi lyaIndonesia chechele kuzachisa polongalamu yahalikina yakuzeneka kufwetela nakuputuka jino kuzachisa polongalamu yaZoom lyalanjile liuka. Ndumbwetu Hadi Santoso ambile ngwenyi: “Navandumbwetu vaze kavatachikiza kanawa mwakuzachishila makinako, vali jino nakulivwisa kuwaha kukunguluka mwomwo kaveshi nakusakiwa kusukama cheka kachi nge vanaputuka kukungulukako.”

 Lester Jijón, Jr., mukulwane muchikungulwilo chaGuayacanes Oeste muGuayaquil mulifuchi lyaEcuador ambile ngwenyi: “Hakuwana nge vandumbwetu vavavulu kavatwama najimbongo jajivuluko, kachi chinavakaluhwila kufwetela polongalamu yaZoom yize nayivalingisa vosena vakunguluke hamwe. Ngocho tunawahilila chikuma hakuwana nge liuka lyetu linalande akauti yaZoom, kaha tuli nakulanyako vakwetu mangana tukunguluke navo chakuzeneka kulizakamina ngwetu vatu navavula chikuma.”

 Johnson Mwanza mukulwane muchikungulwilo chaNgwerere North chamuLusaka mulifuchi lyaZambia asonekele ngwenyi: “Vandumbwetu vavavulu vanahanjikanga ngwavo, ‘eyi polongalamu yaZoom linalande liuka lyetu yinatulingisa tupandame chikuma kuli vandumbwetu nakutulingisa nawa tumone ngwetu chikupu vene Yehova atuzanga nakutuzakama.’”

 Jiakauti japolongalamu kaneyi vali nakujilanda kuzachisa jimbongo veji kulamanga jakukafwa vatu vali muukalu wakulijila. Jimbongo kana jeji kufumanga kuwana wakulisakila veji kuhananga vandumbwetu hakukundwiza mulimo wamukaye kosena. Kakavulu wana kana veji kuuhananga kuzachisa keyala yetu ya donate.pr418.com. Tunamisakwilila chikuma hamuchima wenu wakulisuula kuhana wana uze tweji kuzachisanga nawa kumilimo yikwavo yamukaye kosena yakukafwa vaze vali muukalu.—Wavaka-Kolinde 2, 8:14.