Mwaka himwaka, vandumbwetu vazata mulimo washimbu yosena vamukaye kosena veji kuvasanyikanga kuShikola yaNgileyate Yakulinangula Mbimbiliya yize yeji kupwilanga haWatchtower Educational Center muPatterson, muNew York. a Kushikola kana, vaka-shikola veji kuvanangulanga mwakuzachila kanawa milimo vavahana muliuka lyaYehova. Shikola kana yeji kuvakafwanga nawa vatachikize mwakukolezezela nakujikijisa vikungulwilo najiofesi jamitango mukaye kosena.

 Chikupu vene Shikola yaNgileyate yapwa yamukaye kosena. Chakutalilaho, Shikola yaNgileyate yakusokesa 147 yapwileko mu 2019 yapwile navaka-shikola 56 vakufuma kumafuchi 29. Kushikola kana, veji kusanyikanga vandumbwetu vaze vazata mulimo wakulipwila washimbu yosena. Vaze vazachila haMbetele, natulama vakujinguluka, navamishonali chipwe vapayiniya vakulipwila.

 Shimbu kanda shikola kana yiputuke, veji kuvangilanga kuwahishila chimweza vyuma. Chakutalilaho Lipatimende LyahaChikota Lyatala haKutambwojoka (WHQ Travel), lyeji kulanjilanga chimweza jitikiti jakunyinyina ndeke javaze naveza kushikola. Omu kwapwile Shikola yaNgileyate yakusokesa 147, muka-shikola himuka-shikola vamufwetelelele jimbongo jajindola ja U.S $1,075 hakuya kushikola kuPatterson nakukinduluka. Vaka-shikola vaze vafumine halitungu lyaSolomon vanyinyine ndeke mapapa kawana numba vahete kushikola, kaha hakukinduluka vanyinyine ndeke mapapa katatu hakutambuka tunda yajikilomita jakuzomboka 35,400 numba vahete. Ngocho muka-shikola himuka-shikola, vamufwetelelele jimbongo jajindola ja U.S $2,300 hakutambuka tunda kana. Hakusaka vahone kuzachisa jimbongo jajivulu chikuma, vandumbwetu vamuLipatimende LyahaChikota Lyatala haKutambwojoka veji kuzachisanga polongalamu yahakopyuta mangana vatonde jindeke jize jili nandando yayindende. Kaha nge vanalande lyehi jitikiti kujindeke kana, eyi polongalamu yeji kutwalangaho lika kutondatonda havyalumingo vyavivulu chipwe vene hatukweji mangana vamone nge ndando yajitikiti kana yinatepuluka. Vandumbwetu vamwe vaze veji kuzachisanga chikuma jindeke veji kuvahanga wana, kaha vakiko veji kukundwizanga wana kana kuLipatimende LyahaChikota Lyatala haKutambwojoka mangana liuzachise.

 Vaka-shikola vavavulu, veji kusakiwanga mapapilo akuvetavisa kwingila muUnited States. Ngocho Lipatimende Lyatala haJishimbi LyahaChikota Chetu lyeji kukafwa vaka-shikola vatambule mapapilo kana. Hakutambula lipapilo kana nakusonekesa, tweji kufwetanga jimbongo jajindola ja U.S kafwe $510 hamutu.

 Uno tweji kunganyalanga ngachilihi kuvyuma veji kuvanangulanga? Hendra Gunawan, kalama wakuSoutheast Asia uze atwama muchikungulwilo muze mwatwama ndumbwetu umwe napuwenyi vaze vayile kuShikola yaNgileyate, ambile ngwenyi: “Hakavanga, muchikungulwilo chetu kamwapwile vapayiniya vashimbu yosenako. Oloze twima yavandumbwetu vaze vafumine kuShikola yaNgileyate namuchima wavo wakulisuula, vyalingishile vandumbwetu vavali vaputuke kuzata upayiniya. Kutwala muze, ndumbwetu umwe wapwevo wamuchikungulwilo chetu ayile nakuShikola yaVaka-Kwambulula Wangana.”

 Sergio Panjaitan uze azachila haMbetele yakuSoutheast Asia hamwe navandumbwetu vaze vayile kuShikola yaNgileyate, ambile ngwenyi: “Vyuma valinangwile kushikola kavyanganyalishile vakiko kahako, oloze nayetu vili nakutunganyalisa. Valinangwile vyuma vyavivulu chikuma, oloze muchishishisa chakulimona kupwa vavalemu chikuma veji kulwezangako vakwavo vyuma valinangwile. Echi cheji kutukolezezanga nakutulingisa nayetu nawa tukolezeze vakwetu.”

 Uno jimbongo jakuzachisa kushikola kana jeji kufumanga kulihi? Jeji kufumanga kumawana veji kukundwizanga kumulimo wamukaye kosena. Mawana amwe veji kuwahananga kuzachisa jijila jatwama ha donate.pr418.com. Tweji kumisakwililanga chikuma hamawana enu mweji kuhananga aze nawa tweji kuzachisanga kushikola eyi yamukaye kosena.