Tunazachisanga tumatemba twakushindumuna mumulimo wakwambulula kafwe hamyaka 10, kaha tuli nakukunyula vatu. Vatu veji kumonanga etu tumatemba mukaye kosena, kaha veji kutachikizanga venyatwo. Etu tumatemba tweji kusolokanga kanawa kaha nawa twatwashi kutuzachisa. Pamo munahase kwitavila mazu ahanjikile ndumbwetu wapwevo Asenata wamuPoland uze ambile ngwenyi: “Etu tumatemba vatutunga mujila yayashi kaha nawa tweji kusolokanga kanawa. Twapwa twatwashi kutuzachisa.”

 Kutala mwalihulisaho lyehi omwo twaputukile tumatemba kana tahi?

 Mu 2001, Lizavu lyaKutwaminyina lyetavishile vandumbwetu vamuFrance vaputuke kwesejeka jijila jakulisezaseza jakwambulwilamo kuvihela vyasanga, kuhakilako vene nakuzachisa matemba akushindumuna. Vatungile tumatemba twakulisezaseza. Chakutalilaho, vaputukile kuzachisa vyola natumatemba twakushindumuna mangana vambachilemo nakutanjika mikanda. Kutwala muze mutango waFrance wasakwile muyachi wamatemba uze vazachile hamyaka yayivulu.

 Vandumbwetu muFrance vawahililile chikuma hakuwana nge vyuma vesekele vyazachiwile. Kaha kuheta mu 2011, Lizavu lyaKutwaminyina lyetavishile veseke kuzachisa tumatemba twakushindumuna najimesa hakwambulwila kuvihela vyasanga munganda yaNew York, mu U.S.A. Vapayiniya vaze vazanyine mukweseka kanechi, vamwene ngwavo tumatemba twakushindumuna twapwile nanganyo yayinene, kaha nawa twapwilenga twatwashi kutambuka natwo. Ava vapayiniya nawa, vahanjikile jijila jimwe jize vanahase kutungilamo etu tumatemba twakushindumuna. Tumatemba twakulivanga tuze vatungishile mapulanga twapwile twatulemu, ngocho chavakaluwilile kutambukanga natwo chikumanyi nge vali nakusuluka chipwe kunyina hajindondelo. Shikaho vatungile twatulelu. Chipwe ngocho katwalelukile chikuma nakulingisa peho yituhololeko. Vatohweseleko nawa tufumbo mangana chipwenga chachashi kutushindumuna namumikwakwa muze kamweshi kanawako. Kaha nawa kunyima yatumatemba kana vahakileko kachikasha kakandende kakutulikila mikanda yikwavo.

 Echi kweseka kana chafukililile. Shikaho kuheta mumwaka wa 2012 Lizavu lyaKutwaminyina lyetavishile kuzachisa tumatemba twakushindumuna mukaye kosena. Ngocho valivwasanyine nakapani yakutunga tumatemba yitunge twatuvulu chikuma, kuzachisa vinoma vyavilelu vyakukola.

 Hamyaka yinahichimo, vanalumunangako tuvyuma twatundende kumatemba akushindumuna. Chakutalilaho, mumwaka wa 2015 vatungile lihina lyakufwika hakalitemba lize lyapwile nalipapilo lyandundu kulutwe, kuchina mikanda nayizova navula. Dina wamulifuchi lyaGeorgia evwile kuwaha hakuhakako eli lihina. Ambile ngwenyi, “Kalitemba kakushindumuna kali jino nauvwalo wako uze naukinga mikanda kuchina nayizova.” Kaha mu 2017 valowele jiposita jamangineti mumalimi amwe. Ndumbwetu walunga Tomasz wamuPoland ambile ngwenyi: “Kunyima chapwilenga chachikalu kulamununa jiposita jize twalamikilenga. Shikaho eji jiposita jamangineti jinalingisa chipwenga chachashi.” Kuheta nawa mu 2019, valumwineko nawa vinoma vazachishile hakutunga etu tumatemba najila yakututungilamo, mangana tupwenga twakukola chikuma.

 Tumatemba twakushindumuna twosena tuze veji kutumanga kuvikungulwilo mukaye kosena, veji kututunganga kukapani yimwe kaha. Oholyapwa ngana, kalitemba kamwe vali nakukalanda najimbongo jajindola 43 ja U.S., kufumisako jimbongo veji kuzachisanga hakututuma navyuma vyeka vyasakiwa. Jimbongo josena tunazachisa hakulanda tumatemba twakushindumuna jinahambakana hajimbongo jajindola ja U.S. jimiliyoni 16, kaha vanatumu lyehi tumatemba twakushindumuna twakuzomboka ha 420,000 kuvikungulwilo mukaye kosena.

 Hakusaka vazachise kanawa mawana ajimbongo, veji kulandanga tumatemba twakushindumuna twatuvulu halwola lwolumwe. Kaha nawa, vikungulwilo vinahase jino kuwota tuvihanda twakumatemba akushindumuna twakushishisa tuze natufwa muchishishisa chakuwota tumatemba twatuhya.

 Vaka-Kwambulula mukaye kosena veji kulivwisanga kuwaha kuzachisa tumatemba twakushindumuna. Ndumbwetu wapwevo Martina wakuGhana ambile ngwenyi: “Jijila jajivulu tweji kuzachisanga hakwambulula jasakiwa yetu kuya kuli vatu. Oloze chuma ngwazanga kutalisa kuli eyi jila yakwambulula kuzachisa tumatemba twakushindumuna shina, vatu vakiko veji kwizanga kuli yetu. Navatu vaze vali nakulihichila tunahase kuvambulila.”

 Mulifuchi limwe lyamuAfrica, lunga umwe ambachile mikanda yamulilimi lyenyi kukalitemba kakushindumuna. Omu mwahichile chalumingo chimwe akindulukile nakwamba ngwenyi: “Ngwatanganga mikanda yosena yize ngwambachile. Ngwawanangamo mijimbu yayilemu chikuma, shikaho nguli nakuya nakulwezako vatu mungalila yami.” Kufuma hachihela vapwile nakuya kungalila yenyi yapwile kafwe tunda yajikilomita 500. Omu mwahichile tukweji vavali, akindulukile cheka nakwamba ngwenyi: “Vatu vamungalila yami vatanganga mikanda yosena ngwambachile, kaha vawahililanga chikuma kwivwa mijimbu yilimo. Ngocho vali nakusaka kupwa Vinjiho jaYehova. Oloze vali navihula vyavivulu. Chakutalilaho, vanatachikiza ngwavo hakuvambapachisa vatela kuvajimika mumeya, oloze kwimbo lyetu kakwatwama kalwijiko. Uno twatela kukeza kuno numba mukatumbapachise tahi?” Ava vaka-kwambulula valwezele payiniya uze atachikiza kuhanjika lilimi lyayou lunga, kaha kufuma vene haze vanatwalengaho lika kulinangula Mbimbiliya.

 Tuli nakwivwa kuwaha chikuma kumonomu vali nakuzachisa tumatemba twakushindumuna hakwambulula mujimbu wamwaza “hamavu hosena, nakupwa unjiho kuli vaka-mafuchi osena.” (Mateu 24:14) Uno jimbongo jakulanda tumatemba twakushindumuna jeji kufumanga kulihi? Jeji kufumanga kumawana amukaye kosena, amwe aze mweji kuhananga kuzachisa donate.pr418.com. Tweji kumisakwililanga chikuma hamuchima wenu wakuhana.