Yehova Kalunga asaka vatu vosena valinangule hali ikiye nahaWangana wenyi chamokomoko nomwo vapwa. (WaChimoteu 1, 2:3, 4) Echi chikiko chalingisa Vinjiho jaYehova valovole jiMbimbiliya namikanda yakukafwa kulinangula Mbimbiliya yavatu vavavulu kuhakilako vene natuveveve. Liuka lyetu linalovola mikanda yayivulu yize vanakopo mujivindiyo a jamumalimi atuveveve, akuzomboka 100. Uno tweji kulovolanga nakupangila ngachilihi eyi mikanda? Uno ou mulimo kana unazovolokanga ngachilihi?

 Mikanda yamulilimi lyatuveveve veji kuyitunganga kulizavu lyavaka-kwalumuna mikanda mukaye kosena. Vaka-kwalumuna mikanda vamulizavu hilizavu veji kuhitulukanga kanawa mukanda navasaka kwalumuna. Kufumaho veji kushinganyekanga omwo navalumwinamo mujimbu kana mulilimi lyatuveveve. Kaha nge vanakumisa, veji kukopanga jino vindiyo. Oholyapwa, mazavu 60 akiko ali nakwalumuna mikanda yakukafwa kulinangula Mbimbiliya mulilimi lyatuveveve shimbu yosena, kaha mazavu 40 eji kulinganga ngocho shimbu jimwe.

 Kunyima vazachishilenga jimbongo jajivulu hakutunga jivindiyo jamulilimi lyatuveveve. Vinoma vyakuzachisa vyakufwana nge jikamela navyuma vyeka vyapwile nandando chikuma kuhambakana omwo vili makumbi ano. Kaha nawa jivindiyo twajikopelelenga mukapete kakukopela kaze twalitungilililenga etu vavene, shimbu jimwe nawa twatungulwilenga jizuvo jamwaka. Shikaho twazachishilenga jimbongo jakuzomboka kujindola 30,000 b hakusaka kupwa navyuma vyosena vize lyasakiwile lizavu hilizavu lyavaka-kwalumuna mikanda mulilimi lyatuveveve.

 Hakusaka kuzachisa kanawa jimbongo jaliuka, liuka lyetu linazate nangolo mangana milimo yizovoloke nakwashiwa. Tunakuzachisa makina amahya aze ali nakuzata kanawa. kaha nawa andando yayindende. Muchishishisa chakuzachisa kapete kakukopela, lizavu lyavaka-kwalumuna lyeji kuhakanga lihina lyamafwo amatamba hambango yamujiofesi javo nakuputuka kukopa jivindiyo. Kachi nge kuli nakusakiwa vaka-kwalumuna vavavulu, vandumbwetu vamalunga chipwe vamapwevo veji kukopelanga chihanda chavo chamukanda kuzuvo chipwe kuofesi, chakuzeneka kuya kukapete kakukopela.

 Tunatungu nawa polongalamu yahakopyuta yize yili nakukafwa vaka-kwalumuna vazate kanawa mulimo wavo. Vyuma kanevi vanalumunako vinakafwe vaka-kwalumuna vazachise kafwe chimbwa chalwola vazachilenga hakulovola mukanda wamulilimi lyatuveveve. Vandumbwetu veji kusakwililanga hakuzovoloka kanechi. Ndumbwetu umwe walijina lyaAlexander ahanjikile ngwenyi: “Oholyapwa vali nakulovola jivindiyo jajivulu jamulilimi lyatuveveve kuhambakanomu chapwile kunyima. Chuma kana chinangwivwisa kuwaha chikuma, kaha ngweji kutalanga eji jivindiyo hakumbi hakumbi.”

 Makumbi ano tweji kuzachisanga jimbongo jakuheta kujindola kafwe 5,000 hakulanda vinoma vyakuzachisa kulizavu limwe lyavaka-kwalumuna. Echi chinatulingisa twalumune jivindiyo jatuveveve mumalimi amavulu.

 Kachi nge lizavu linakumisa kukopa mukanda wamulilimi lyatuveveve, eji jivindiyo jatela kuheta kuvatu vaze vali nakusakiwa jivindiyo kana. Kunyima twalowelenga jitepu jajivindiyo najiDVD, oloze japwilenga nandando chikuma, jalilenga nawa lwola kaha nawa chasakiwilenga kukilikita chikuma. Jivindiyo vakopelenga vajitwalilenga kujikapani mangana vakajifwatule jipwenga jajivulu. Kutwala muze, jitepu jajivindiyo naji DVD vajituminenga kuvikungulwilo. Mumwaka wa 2013 kaha, twazachishile jimbongo jajindola 2,000,000 hakulovola jiDVD jamulilimi lyatuveveve.

 Tuveveve vasakwililile chikuma havyuma kana. Chipwe ngocho, kachapwile chachashi kuzachisa eji jivindiyo lwola lwosena, chikumanyi omu jitepu jajivindiyo naji DVD javulile. Shimbu jimwe kwasakiwile jiDVD jajivulu hakukopa mukanda umwe kaha wamuMbimbiliya. Ndumbwetu wamuBrazil walijina Gilnei ambile ngwenyi: “Omu twasakilenga kutanga chisoneka, twavangililile kutonda tepu yavindiyo yakwoloka numba tutonde cheka chisoneka. Chapwile chachikalu chikuma.” Ndumbwetu wapwevo walijina lyaRafayane uze azachishilenga jiDVD jamulilimi lyatuveveve ambile ngwenyi: “Chapwilenga chachikalu kulinga chilongesa chauka, mwomwo lwola lwaluvulu twalwenyekelelenga hakutonda visoneka namikanda yeka.” Kahomu vandumbwetu vapwile nakwambululanga, vambachilenga jiDVD chipwe jitepu jajivindiyo jajivulu, jize vatalishilenga haTV yamwenya zuvo wakuwahilila. Vandumbwetu vamwe vambachilenga namakina avo akuhakamo jiDVD. Nakushimbula chiku, kwejile makina akuhakamo jiDVD amashi kumbata, kaha vandumbwetu vavavulu vawazachishilenga. Bobby wamuUnited States, ambile ngwenyi: “Kachi nge uli nakusaka kutangila mutu chisoneka chimwe kaha musaka umutangile chikwavo, kakavulu chasakiwilenga kuzachisa DVD yeka. Echi chambachilenga chikuma lwola nakutulingisa tuhone kuzachisa kanawa Mbimbiliya hakushimutwila.”

 Mu 2013 liuka lyaYehova lyalowele JW Library Sign Language app yize yalingishile vandumbwetu vatutulule nakutalisa jivindiyo jamulilimi lyatuveveve hajishinga chipwe hajitambuleti javo. App kana vavangilile kuyilovola muLilimi lyaTuveveve LyakuAmerica. Kaha mu 2017 vayilingishile chipwenga chachashi kuyizachisa kumalimi osena atuveveve. Vandumbwetu mukaye kosena vawahililile chikuma. Ndumbwetu walunga Juscelino wamuBrazil ambile ngwenyi: “Kangwashinganyekelenga ngwami chuma kana chinahase kusolokako. Ngwatwalileho kushinganyeka omwo Lizavu lyaKutwaminyina lyeji kusolwelanga zangi etu tuveveve nomu vasaka tutachikize muchano ngana mwandumbwetu vosena vaze veji kuhanjikanga. Ngwawahililile chikuma, kaha app kana yangulingishile ngulinangule chikuma Mbimbiliya.”

 Makumbi ano tuli nakulovola jivindiyo jamulilimi lyatuveveve hamakina, nakujihaka hakeyala yetu nahaJW Library Sign Language app. Tuli jino nakwalumuna, nakukopa nakutuma mikanda yamulilimi lyatuveveve mumakumbi amandende kaha, keshi mutukweji chipwe myakako. Mikanda yamumalimi amavulu atuveveve yili nakulovokelanga hamwe namikanda yamumalimi aze veji kuhanjikanga.

 Ivwa mazu vanahanjika vandumbwetu vamwe vatuveveve. Ndumbwetu wapwevo walijina lyaKlízia ambile ngwenyi: “Liuka mukaze lize lyazakama chikuma tuveveve lize lili nakufwila kuvahana kulya chakushipilitu mujila yayashi ngana? Kakweshi chuma numba chimwe mukaye chize tunahase kwesekesa kuvyuma vize liuka lyaYehova linakutulingilako.” Ndumbwetu Vladimir ambile ngwenyi: “Jivindiyo jeji kungukafwanga ngumone ngwami Yehova eji kuzakama etu tuveveve ngana mwavatu vosena vaze kavapwa tuveveveko.”

 Mujivindiyo jetu jamulilimi lyatuveveve mwatwama mazu ano akwamba ngwavo: “Echi chinoma chapwa chakuzachisa kumulimo wakunangula vatu Mbimbiliya mukaye kosena uze vakundwiza namawana akulisakila.” Tweji kusakwililanga chikuma hamawana ove weji kuhananga, amwe aze weji kuhananga kuzachisa donate.pr418.com. Eji jimbongo jeji kutukafwa tulovole Mbimbiliya naMikanda yakukafwa kulinangula Mbimbiliya yavatu vosena kuhakilako nayatuveveve.