Mazavu avaka-kwalumuna amavulu kaweshi nakuzachila hajiofesi jamitangoko, oloze ali nakuzachila hajiofesi javaka-kwalumuna mikanda jakwakusuku (RTO). Mwomwo ika kunoneka kana chinapwila chachilemu? Vinoma muka vyasakiwa kuli vaka-kwalumuna numba vazate kanawa milimo yavo haji RTO? Uno kunungulula mazavu avaka-kwalumuna chili nakuvakafwa ngachilihi vazate kanawa mulimo wavo wakwalumuna?

 Kutunga ji RTO chili nakulingisa vaka-kwalumuna vazachile kuvihela kuze vazachisa lilimi veji kwalumunanga. Karin uze eji kwalumunanga mulilimi lyaLow German ambile ngwenyi: “Kufuma vene halwola luze twalukilile ku RTO yamuCuauhtémoc muChihuahua muMexico, tweji kuhanjikanga chikuma lilimi lyaLow German navakwetu vaka-kwalumuna, navatu tweji kuwananga muwande, nomu tweji kuyanga nakulanda vyuma kuvitanda. Tuli jino nakuzachisa chikuma lilimi lyetu. Tuli nakwivwa jindangwishi jize twevwile lyehi kunyima kaha nawa tuli nakuzachisa mazu amahya aze vali nakuzachisa vatu oholyapwa.”

 James uze atwama halizavu lyavaka-kwalumuna mulilimi lyaFrafra muGhana, ambile ngwenyi: “Numba tuhu lwola lumwe ngweji kwanukanga tanga yaMbetele haofesi yamutango, oloze nguli nakulivwisa kuwaha kuzachila ha RTO. Ngweji kwivwanga kuwaha kwambulila vatu mulilimi lyaFrafra nakumona omu mujimbu wamwaza uli nakuvaheta kumichima.”

 Uno vandumbwetu veji kusakulanga ngachilihi kuze nakupwila RTO? Joseph wamuLipatimende Lyatala haMulimo waKutunga Mukaye Kosena haWarwick muNew York, U.S.A, ambile ngwenyi: “Ukalu umwe tweji kumonanga hakusakula kuze nakupwila RTO shina, kuvihela vimwe kakwatwama kakahya kakezi, chipwe meya chipwe Internet yakukafwa vaka-kwalumuna vatambule vyuma vatela kwalumunako. Shikaho hakusakula kuchihela kuze nakupwila RTO, tweji kukekesanga jingalila jajivulu kuze vazachisa lilimi lyavaka-kwalumuna.”

 Kuhaka RTO haZuvo yaKukunguluka Chachinene, chipwe haZuvo yaWangana, chipwe hazuvo yavamishonali, chapwa chachashi kaha nawa kachasakiwa jimbongo jajivuluko, kaha nawa vaka-kwalumuna vanahase kufuminyina kujizuvo javo nakwiza nakuzata. Kachi nge vihela vyosena evi vyauchi, kaha vandumbwetu veji kuvetavisanga kulanda zuvo najiofesi muze navatwamanga vaka-kwalumuna nakuzachila. Kachi nge kuliko vyuma vimwe vinalumuka kutalisa kulizavu lyavaka-kwalumuna lyahachihela kana, kaha chihela valanjile vanahase kuchilanjisa nakuzachisa jimbongo kumilimo yeka yili nakusakiwa chikuma.

 Mumwaka wamulimo wa 2020, twazachisanga jimbongo jajindola jakuheta kujimiliyoni 13 ja U.S kuvyuma vyapwanga nakusakiwa mangana mulimo wahaji RTO utwaleho. Mazavu avaka-kwalumuna ahaji RTO asakiwa jikoputa, najipolongalamu jahamakina jamuliuka, navinoma vyakuzachisa hakukopa mazu, naInternet navyuma vyeka vyakufwana nge meya, nakakahya kakezi. Kopyuta yimwe navinoma vyayo vyosena vanahase kuvilanda kafwe najindola 750 ja U.S. Hajikopyuta kana veji kuhakangaho jipolongalamu, napolongalamu yaWatchtower Translation System yize yeji kukafwanga vaka-kwalumuna vanoneke kanawa milimo yavo nakuwana vinoma vyakuvakafwa hakuhehwojola.

 Vaka-kwalumuna veji kuvahananga nawa vinoma vyakuzachisa hakukopa mangana vakopelenga mujiofesi javo. Vinoma kana vyavakafwile chikuma omu musongo wachihita waCOVID-19 waputukile, mwomwo vaka-kwalumuna vavavulu vahashile kuya navinoma kana kujizuvo javo mangana vatwaleho kukopa mikanda valumwinenga najivindiyo.

 Vaka-kulisakila kuzata mulimo, veji kuhitulukanga muvyuma vanalumuna nakuwahisa haji RTO. Cirstin wamulizavu lyavaka-kwalumuna mulilimi lyaAfrikaans waha RTO yamuCape Town, muSouth Africa ambile ngwenyi: “Vaka-kwambulula vavavulu navapayiniya vashimbu yosena vanalisuula kuzatanga hano ha RTO.”

 Ava vandumbwetu veji kulivwisanga kuwaha kuzata milimo kana. Ndumbwetu umwe wapwevo uze eji kukafwangako milimo ha RTO ambile ngwenyi: “Ngweji kwivwanga kuwaha chikuma kuzachila ha RTO kaha nawa cheji kungukolezezanga.” Vandumbwetu vavavulu muvikungulwilo veji kulisuulanga kuvakopa mazu. Juana wamulizavu lyavaka-kwalumuna mulilimi lyaTotonac munganda yaVeracruz muMexico ambile ngwenyi: “Hakuwana nge twatwama kwakamwihi najingalila jize jazachisa lilimi lyetu, ngocho chili nakutwashiwila kuwana vandumbwetu vaze natuzachisa hakukopa mazu.”

 Uno ji RTO jili nakukafwa vandumbwetu valumune mujila yize nayiheta vatu kumichima tahi? Vatu vavavulu vaze veji kutanganga vyuma tweji kwalumunanga, vanakwambanga ngwavo, eyo. Cédric wamulizavu lyavaka-kwalumuna mulilimi lyaKongo muDemocratic Republic of Congo, ambile ngwenyi: “Jila twalumwinyinengamo mikanda mulilimi lyaKongo, yalingishile vandumbwetu vamwe vambenga ngwavo, ‘lilimi lyaKongo vazachisa mumikanda yetu,’ mwomwo mwapwilenga mazu aze kavazachisa chikuma vatu mulilimi lyaKongoko. Oholyapwa vali nakuhanjika jino ngwavo tuli nakuzachisa mazu amashi aze vali nakuzachisa vatu hakumbi hakumbi.”

 Andile uze atwama mulizavu lyavaka-kwalumuna mulilimi lyaXhosa muSouth Africa naikiye ambile ngwenyi: “Mazu tuli nakuzachisa mumikanda yetu analihandununa nawaze twazachishilenga kunyima. Vanyike vaze vazangilenga kutanga Kaposhi Kakutalila muChingeleshi, vali jino nakumutanga mulilimi lyaXhosa. Kaha vanazange chikuma Mbimbiliya yaKaye Kakahya mwomwo vanayalumuna kuzachisa mazu amashi.

 Jimbongo veji kuzachisanga hakutunga ji RTO, nakujiwahisa, nakuzakama vaze veji kuzachilangaho, jeji kufumanga kumawana mweji kuhananga kuMulimo WamuKaye Kosena, kuhakilako nawaze mweji kuhananga kumulimo kana kuzachisa donate.pr418.com.