Hamyaka yakuzomboka 130, Vinjiho jaYehova makumbi ano vanalikungulwinga hamwe hakukunguluka changalila mwaka himwaka. Kukunguluka kana chinakupwanga navihande vyakulisezaseza vyakuzomboka ha 40, kweji kupwanga nawa namyaso navihande vyakwihojola najivindiyo. Hakusaka vatu vaze naveza kukukunguluka vanganyale, vatela ‘kwivwa nakumona’ kanawa. (Luka 2:20) Uno mawana enu veji kuwazachisanga ngachilihi mangana vatu vanganyale kukunguluka changalila chamokomoko nokwo vatwama?

 Vivaza vyavivulu vyakumafuchi akusulo vyatwama lyehi nevi vinoma kana. Uno mwomwo ika tweji kuhakilangamo vinoma vyetu kachi nge tunafwetela vihela kana? Ndumbwetu David, uze azachila kuLipatimende lyaBroadcasting lyahaChikota chetu ambile ngwenyi: “Vihela vimwe tweji kufwetelanga, kavavitunga mujila yize nayilingisa vatu vatwame hajiola 6 nakwivwilila kaha kupolongalamuko. Chakutalilaho, muvihela veji kuhemenanga ngunja, vinoma vyavo veji kuvizachisanga hakuvilika tumazu twatundende nakwimbisa myaso yayihi. Havisaji vyavo vyamivwimbimbi, veji kusololanga kaha ngunja vanengisa, navyuma vanakukulisa nakukindulwisaho vyuma vyasolokanga. Oloze etu twasaka vatu vatale jivindiyo jajisuku nakwivwishisa kanawa vihande vyosena vanakuhanjika kuutenda.”

 Chihela hichihela chakukungulukila changalila chapwa chakulipwila. Shikaho visaji vyamivwimbimbi vatela kuvitokejeka kweseka nachihela kana. Kachi nge vanasakula vihela vyakukungulukila, malipatimende atala vyabroadcasting hajiofesi jamitango, veji kukekesanga kanawa chihela vanawane omwo vatu navakatwama, nakuvula chavaze navakakunguluka nakutohwa chachihela. Kaha vandumbwetu vamalunga veji kusakulanga kanawa haze nahakapwila visaji vyamivwimbimbi navyamazu, nakumona mujila vahase kuvitokejekelamo. Kaha nawa veji kukekesanga vamone vinoma vingahi navisakiwa, mangana vosena vaze navakakunguluka vakamone nakwivwilila kanawa kujipolongalamu kana.

 Cheji kupwanga chachikalu kutokejeka vinoma vyavisaji vyamivwimbimbi namazu hakukunguluka changalila kachi nge navakachivwilila mumalimi amavulu. Kachi nge polongalamu kana navakayivwilila mumalimi amavulu halwola lwolumwe vandumbwetu vaze navalumuna vatela kuvangila kumona vindiyo nakwivwa vyuma vanahanjika numba vavyalumune. Kaha vyuma vanalumuna veji kuvitumanga jino hachanelo yize yili kuvatu vaze vazachisa lilimi kana. Hakuwana nge tuli navinoma vyakulipwila vyakuzachisa, chili nakutukafwa tutalise vindiyo yimwe mumalimi akulisezaseza 8 halwola lwolumwe. David ambile ngwenyi “Kutokejeka makina mujila kaneyi chapwa chachikalu. Shikaho vatu vaze veji kulisuulanga kuzata mulimo kana vasakiwa kuvanangula chikuma.”

 Jiofesi jamitango jajivulu jatwama namakina akuzachisa hakutalisa jivindiyo nakulovola mazu aze veji kuzachisanga mwaka himwaka. Kumitango kana, vandumbwetu veji kulongesanga vyuma mangana vatwale makina kana kuvihela kwosena kuze nakupwila kukunguluka changalila. Mutango waUnited States weji kuzachisanga jimbongo jajindola $200,000 a mwaka himwaka hakutwala makina kuvihela kuze kweji kupwilanga kukunguluka changalila. Echi cheji kutukafwanga tuzachise jimbongo jajindende kuhambakana jize natuzachisa hakulanjilako vinoma vikwavo najakuviwahishisa. Steven, uze apwile nakutetekela vaka-kuzachila kumakina hakukunguluka changalila muCanada, ambile ngwenyi, “Lizavu lyetu lyazachililile kumakina lyazachile nangolo vahone kujimbalisa numba vene chuma chimwe chakuzachisa kumakina kana. Twavilaminenga nakuvitulika, nakuvilongejeka kanawa mangana vakavizachise hakukunguluka nachikavangizaho.”

 Kufwetela makina akuzachisa chapwa chandando chikuma, kaha nawa makina kana kawapwa angolo chipwe kavawalama kanawako. Echi chikiko cheji kutulingisanga tulande makina aze tuli nakusakiwa. Oholyapwa ngana, likina lyakutalila mivwimbimbi lyakuhaka mukachi kazuvo (indoor LED video wall) lyajimita jitanu musuku, kaha muwihi jimita jitatu vali nakulilanda kafwe najimbongo jajindola $24,000, kaha nawa tambo yamayikolofwoni yimwe vali nakuyilanda najimbongo jajindola $20. Ngocho lipatimende lyaBroadcasting lyeji kuzachilanga hamwe naLipatimende lyaKulanda Vyuma “nakulava jimbongo” shimbu kanda valande makina. (Luka 14:28) Chakutalilaho, veji kulihulisanga ngwavo, vatu vangahi navanganyala kumakina kana? Uno kulanda makina amahya hijila yize nayitukafwa tahi? Kutala tuli nakwakulamina awa makina chipwe navinoma vyakuzachisa hakuwawahisa, navandumbwetu vatachikiza kanawa kuwawahisa tahi?

 Hakusaka makina ashimbule nakuzachisa kanawa mawana ajimbongo, tweji kuwawahisanga kuswa kumwe. Kaha nawa tweji kuhakanga awa makina muvikasha vyakukola kuchina nawalyenyeka kaha nawa nevi vikasha veji kuviwahisanga kachi nge chili nakusakiwa.

 Vatu vaze kavapwa vinjihoko vanalikomokelanga hakumona omwo makina etu anazatenga kanawa hakukunguluka changalila. Chakutalilaho, hakukunguluka changalila chimwe muka-milimo umwe uze azachila kukapani yimwe yayinene yavaka-kwazana mijimbu muno mukaye, alikomokelele hajila jasolokelelengamo jivindoyo jetu najila vajitalishililengamo. Jonathan uze eji kutokejekanga nakuzachila kumakina hakukunguluka changalila ambile ngwenyi “Uze lunga alikomokelele chikuma omu atachikijile ngwenyi vatu vaze vapwile nakuzachila kumakina kavapwa vakuluwa mumulimo kanako oloze vosena valisulwile kaha kuzata. Ambile ngwenyi kapani yenyi yeji kumbatanga makumbi atanu numba vakumise kutokejeka makina aze twatokejekele mulikumbi limwe nachimbwa.” Kuchihela chikwavo kwapwililile kukunguluka changalila, mukulwane wachihela kana ambile ngwenyi, “Hachihela chino hanezanga vakuluwa muvyamyaso najivindiyo, oloze kanda lyehi ngumonengaho vatu vali nachinyingi nauhashi vakufwana nge yenuko.”

 Kutala munanganyala kumakina akutalisa jivindiyo hakukunguluka changalila tahi? Pamo muli nakwivwa ngana muze evwile David uze atwama muEngland uze ambile ngwenyi: “Nguli namyaka yakusemuka 88 kaha hamyaka yoseneyi mukuyoya chami, ngunapunga kukukunguluka changalila. Oloze oholyapwa, chili nakungwashiwila chikuma kuhaka mangana kupolongalamu yosena. Jivindiyo jili nakulingisa tumone nge kukunguluka chili nakutambuka washi, kaha nawa vyuma vali nakunangula vili nakwivwakana kanawa.” Micheal, uze atwama mulifuchi lyaNigeria ambile ngwenyi, “Hakuwana nge vandumbwetu vali nakwivwa kanawa vyuma ali nakuhanjika ndumbwetu kuutenda nakutala kanawa jivindiyo, chili nakuvakafwa vatwaleho lika kuhaka mangana kupolongalamu.”

 Omu namupwa kuKukungulunga chaNgalila chipwe chaKulipwila chakwamba ngwavo, “Vilikenunga Mujimbu Wamwaza” wanenuko lwola lwakushinganyeka milimo vakilikitanga vandumbwetu mangana mwivwenga nakumona kanawa polongalamu yosena. Tuli nakumisakwilila chikuma hawana wenu wajimbongo, kuhakilako vene nauze mweji kuhananga kuzachisa donate.pr418.com, uze unatukafwe tutesemo vyuma vyosena evi. Twasakwililako mwane.