Yehova asaka kunangula vatu jenyi. Echi chikiko chalingisa liuka lyenyi lihakeko mashikola amavulu aze eji kunangulanga vatu jenyi, vazatenga kanawa milimo veji kuvahananga. Shikola yimwe shina, Shikola yaVaka-Kwambulula Wangana (SKE). Mumyaka yakalinwomu, liuka lyaKalunga linalumunangako vyuma vyakulinangula nakuwahisa havihela haze heji kupwilanga mashikola. Chuma chachilemu vafwila shina kukafwa vaka-shikola valinangulenga kanawa nakukafwa nawa vaka-kunangula chivashiwile kunangulanga. Uno mawana enu anakutukafwa ngachilihi tutesemo chuma kana?

 Hamyaka yayivulu, mashikola amuliuka anapwilanga hajiZuvo jaWangana nahajiZuvo jaKukunguluka Chachinene. Uno vyuma muka vinalingisa vatunge chipwe kutungulula vihela vyavivulu hapwilenga kaha mashikola amuliuka? Talenu vyuma vino vinalingisa.

 Vili nakusakiwa chikuma. Christopher Mavor Muka-Kukafwa muKomiti yaMulimo yaLizavu lyaKutwaminyina ambile ngwenyi, “Jiofesi jaMutango jajivulu jinatulwezenga ngwajo kuli nakusakiwa vandumbwetu vavavulu vakuzata chikuma muwande. Chakutalilaho, mu 2019 mutango waBrazil wambile ngwavo, kwapwile nakusakiwa vandumbwetu vakuheta kafwe 7,600 vaze navaya kushikola ya SKE mangana vazate milimo yakulisezaseza mungalila yamutango wavo.” Mutango waUnited States nawa wapwile nakusakiwa vapayiniya vakulindunuka vavavulu vaze navanangula vakwavo mwakuzachila kuvihela vyasanga, nakwakusulikila jimbopolo nakwambulwila nawa mutumenga. Kuli nawa nakusakiwa vandumbwetu vaze navazachila kuLipatimende Lyatala haMulimo waKutunga namujiKomiti jaKulivwasana naVipatela. Vandumbwetu vaze navaya kushikola ya SKE vanahase kuzata milimo kaneyi.

 Kuvula chavaka-shikola. Mitango yayivulu yinatambulanga jifwamu jajivulu javandumbwetu vali nakusaka kuya kushikola, kuhambakana haseteko yize vanahase kwitavila. Chakutalilaho, mumwaka umwe kaha mutango waBrazil watambwile jifwomu jakuheta ku 2,500 javandumbwetu vasakile kuya kushikola ya SKE. Oloze hakuwana nge vapwile navihela vyavindende haze heji kupwilanga mashikola, mutango watelele kwitavisa kaha vandumbwetu 950 vezenga kushikola kana.

 Vihela vyamwaza vyakutwamamo. Nge mashikola ali haZuvo yaWangana Chipwe haZuvo yaKukunguluka Chachinene, kakavulu vaka-shikola veji kutwamanga kujizuvo javandumbwetu. Jijila kana jeji kuzatanga kanawa mungalila muze kamwavula kupwa mashikola chikuma mwaka himwakako. Oloze mungalila muze mweji kupwanga chikuma mashikola, chinahase kukaluwila vandumbwetu kutambwila vaka-shikola kujizuvo javo hatukweji vavavulu mumwaka. Shikaho evi vihela vali nakutunga vali nakuhakaho nashikola muze navalinangwilanga mangana yipwenga kwakamwihi navaka-shikola. Kaha nawa vali nakuvitunga mujila yize nayikafwa vaka-shikola valinangule kanawa.

 Kutunga shikola yimwe nakutunga jizuvo jakusavala vaka-kunangula navaka-shikola vakuheta ku 30 navyuma vyeka vyasakiwa vili nakusakiwa jimiliyoni jajindola ja U.S., jajivulu chikuma kweseka nangalila navavavitungila navyuma vyeka.

 Kakavulu jishikola kana veji kujitungilanga kwakamwihi nanganda yayinene kuze kakwatwama chikuma vyemako oloze nawa kwatela kupwa kwakamwihi namukwakwa wamwaza. Kakavulu veji kutungilanga kungalila kuze kunavulu vaka-kwambulula vaze vanahase kukafwa milimo yakuwahisa chihela navyakuzachisa.

 Havihela kana veji kuhakangaho nazuvo yakulamina mikanda, navihela vyakutangila, najikopyuta navinoma vyeka. Kakavulu veji kuhakangaho nawa kapete kakulila vaka-shikola navaka-kuvanangula. Veji kuhakangaho nawa vihela vyakutamo vyakuhemena navyakulinyukila kumujimba.

 Shikola yakulinangwilamo yikiko veji kuhakangako chikuma muchima. Troy uze azachila kuLipatimende Lyatala haMulimo waKutunga Mukaye Kosena lyahaWarwick, New York ambile ngwenyi, “Twalombele Lipatimende lyaMashikola aTeokalasi litukafwe mwakutungila mashikola aze nawakafwa vaka-shikola valinangulenga kanawa. Ava vandumbwetu vatuhanyine jindongi jakutalisa kukutohwa chashikola, namanongo twatela kuhakamo navisaji vyajivindiyo navyamazu.” Zoltán uze apwa muka-kunangula mushikola yaSKE muHungary ahanjikile kutalisa kumakina avivumo ngwenyi: “Hakavanga katwapwilenga najimayikolofwoniko, ngocho lwola lwosena twanukishilenga vaka-shikola vahanjike nakutambakana. Oloze ukalu kana unakumu mwomwo hamesa himesa hali mayikolofwoni.”

 Uno kutunga vihela mujila kaneyi chinakafwe ngachilihi vaka-shikola navaka-kuvanangula? Angela uze ayile kushikola ya SKE muPalm Coast, Florida, U.S.A., ambile ngwenyi,: “Chihela kana chamwaza chikuma, vyuma vyosena vanavitungu kanawa, jila vanatungilamo shikola natupete vakusavala yili nakukafwa vaka-shikola vatange kanawa.” Csaba uze apwa muka-kunangula vaka-shikola muHungary uze awahililile chikuma kulila hamwe navaka-shikola ambile ngwenyi, halwola lwakufwana ngana “vaka-shikola veji kupwanga vakukasununaka nakutulweza vyuma vanahichimo. Kahechi cheji kutukafwanga tutachikize kanawa vaka-shikola, nakutulingisa tuvanangule kweseka navyuma vali nakusakiwa.”

 Vaka-shikola navaka-kuvanangula vanakumona jila yamwaza vanakutungilamo evi vihela vyamashikola kupwa hikukisula chakufuma kuli Yehova uze apwa ‘Muka-kunangula Wamunene.’ (Isaya 30:20, 21) Ndumbwetu wapwevo wamuPhilippines uze ayile kushikola ya SKE yize yapwilili hachihela chize vatungulwile ambile ngwenyi: “Kuwaha chashikola kana chatulingishile tulimone kupwa tuvangeji jaYehova vakulipwila. Ali nakusaka tulivwise kuwaha omu tuli nakulinangula Mazu enyi.”

 Veji kutunganga nakutungulula vihela vyamashikola nakutwalaho lika kuvilama kanawa mwomwo yamawana enu, amwe aze mweji kuhananga kuzachisa donate.pr418.com. Tunamisakwilila hamuchima wenu wakuhana.