TONENUNGA!
2022: Mwaka waVihuli—Vyuma Muka Yahanjika Mbimbiliya?
Mumwaka wa 2022, tunevunga chikuma mijimbu yajijita, nauhutu naukalu wakulijila. Mbimbiliya yikiko kaha yalumbununa ovyo ukalu kana uli nakusolokela.
Ovyo vyalingisanga ukalu wasolokanga mu 2022 upwengako
Ukalu wasolokanga mumwaka unakumu unasolola hatoma nge tuli nakuyoyela mumakumbi aze vavuluka muMbimbiliya ngwavo “makumbi akukuminyina.” (WaChimoteu 2, 3:1) Makumbi kana aputukile mu 1914. Tala omwo vyuma vinasolokanga vinalifwane navyuma yahanjikilile chimweza Mbimbiliya:
“Jijita.”—Mateu 24:6.
“Mwaka wa 2022, himwaka wavihuli uze jita yinakinduluka muEurope.” a
Tala chihande chakwamba ngwavo “Lifuchi lyaRussia Linalukuka Lifuchi lyaUkraine.”
“Zala.”—Mateu 24:7.
“Mumwaka wa 2022 muli zala yize kanda yisolokengaho lyehi.” b
Tala chihande chakwamba ngwavo “Jita Yili muLifuchi lyaUkraine Yinalingisa Kulya Chikaluhwe Mukaye Kosena.”
“Misongo yachihita.”—Luka 21:11.
“Musongo waPolio (kalepa) unasangumuka cheka, kaha musongo wavimbulu vavuluka ngwavo monkeypox uli nakutohwelako chikuma oku nawa musongo waCOVID-19 uli nakutwalaho lika kujiha vatu. Echi chinasolola nge misongo kana yapwa yayipi chikuma kaha nawa kuyoya chavatu chili muponde.” c
Tala chihande chakwamba ngwavo “Vatu Vakuheta kuJimiliyoni 6 Vanafu kuMusongo waCOVID-19.”
“Vyuma vyakwivwisa vatu woma.”—Luka 21:11.
“Kuzuma chikuma, navyanga nakakahya namavaji. Vatu vavavulu, navanukanga lika nonga yamu 2022 mwomwo yajiponde jajivulu jize jenyekanga vyuma vyavivulu, nakujiha vatu vavavulu chikuma, nakulingisa nawa jimiliyoni javatu mukaye kosena vaseze membo avo.” d
Tala chihande chakwamba ngwavo “MuKaye Kosena Muli Peho Yizuma Chikuma.”
“Jipindangano [chipwe “vikokojola,” kwinyikila].”—Luka 21:9.
“Hakuwana nge vatu vapihililanga chikuma mwomwo yakukaluhwa chachiyoyelo nakutohwa chajindando javyuma, echi chavalingisanga vafumbukile jifulumende mumwaka wa 2022.” e
Tala chihande chakwamba ngwavo “Vyuma Muka Yahanjika Mbimbiliya Kutalisa kuKunyina chaJindando muKaye Kosena?”
Vyuma muka navisoloka mumwaka nawizaho?
Naumwe wauchi nahase kuhanjika vyuma vyosena navisoloka mumwaka wa 2023. Oloze chuma twatachikiza shina ngwetu kalinwomu Wangana waKalunga chipwe ngwetu fulumende yamwilu yizenga nakufumisako ukalu wosena uli nakusoloka muno mukaye. (Ndanyele 2:44) Fulumende kana nayikafumisako vyuma vyosena vyeji kulingisanga vatu vayande nakutesamo vyuma ajinyine Kalunga kutalisa kumavu.—Mateu 6:9, 10.
Tuli nakukulembelela ukavangize mazu ahanjikile Yesu Kulishitu, nakutwalaho lika ‘kutona’ mangana umone omwo vyuma vinakusoloka muno mukaye vili nakutesamo upolofweto wamuMbimbiliya. (Mako 13:37) Nge uli nakusaka kutachikiza vyavivulu, kaha tutumine mangana ulinangule omwo Mbimbiliya yinahase kukukafwa oholyapwa nomu yinahase kukukafwa natanga yove mutalilile vyuma vyamwaza.
a Ha 8 December 2022, Jill Lawless ambile ngwenyi: “Mwaka wa 2022, himwaka wavihuli uze jita yinakinduluka muEurope.”—AP News.
b Liuka lyaWorld Food Programme lyasonekele chihande chakwamba ngwavo “Mukaye Kosena Muli Zala.”
c Ha 22 September , 2022, Lawrence O. Gostin, JD ambile ngwenyi: “Kuyoyela muLwola lwaMisongo yaChihita—Kufuma ku COVID-19 tunayi kumusongo waMonkeypox, naPolio, naMisongo yeka.”—JAMA Health Forum.
d Ha 24 October 2022, Martina Igini ambile ngwenyi: “Vyuma Muka Vinalingisanga Mungonde yaNonga ya 2022 Mupwenga Jiponde Jajivulu?”—Earth.Org.
e Ha 8 December 2022, Thomas Carothers naBenjamin Feldman vambile ngwavo: “Kukaluhwa chaChiyoyelo Chalingisanga Vatu Mukaye Vafumbukile Jifulumende.”—Carnegie Endowment for International Peace.