TONENUNGA!
Ovyo Twatela Kupwila naLutalililo mu 2023—Vyuma Muka Yahanjika Mbimbiliya?
Omu unaputuka mwaka wa 2023, tuvosena tuli nakutalilila kupwa nachiyoyelo chamwaza navaka-tanga yetu. Mwomwo ika twatela kupwila nalutalililo?
Mbimbiliya yeji kuhananga lutalililo
MuMbimbiliya mwatwama mujimbu wamwaza wakutulweza ngwavo ukalu tuli nakumona oholyapwa wakashimbu kakandende, kaha nawa kalinwomu ukume. Mbimbiliya “[vayisonekelele] kutunangula etu, mangana kuhichila . . . mukuvendejeka chamuVisoneka tuhase kupwa nalutalililo.”—Wavaka-Loma 15:4.
Hakusaka utachikize vyuma vyavivulu vatushika muMbimbiliya, tanga chihande chamuChingeleshi chakwamba ngwavo “A Real Hope for a Better Tomorrow.”
Lutalililo luze lunahase kukukafwa oholyapwa
Lutalililo lwamuMbimbiliya lwapwa nge “chikungo chawato chakwimikisa kuyoya chetu.” (WavaHepeleu 6:19, kwinyikila chamwishi.) Lutalililo kana lunahase kutujikijisa. Lunahase kutukafwa tumike muukalu tuli nakumona oholyapwa nakumona vyuma mujila yamwaza, nakuwana kuwahilila chakwilila. Chakutalilaho:
Wana omwo lutalililo lwamuMbimbiliya lwakafwile lunga uze chakaluhwilile kumbila tato yenyi. Tala vindiyo yakwamba ngwavo Kangwasuulukilenga Mukuyoya Chamiko.
Tala omwo lutalililo lwamuMbimbiliya lunahase kutukafwa kachi nge tunafwisa mutu twazanga. Tala vindiyo yakwamba ngwavo Vyuma Navivendejeka Vaze Vali naKulishona.
Zamisanga lutalililo lwove
Vatu vavavulu veji kutalililanga vyuma vyamwaza, oloze chapwa chachikalu kufwelela ngwavo vyuma vatalilila navikatesamo. Oloze omu keshi mukiko vyapwa navyuma vatushika muMbimbiliyako. Mwomwo ika? Mwomwo jishiko jamuMbimbiliya jafuma kuli Yehova Kalunga a “ou ahona kwonga.” (WaChituse 1:2) Yehova kaha ikiye atwama nangolo jakutesamo jishiko jenyi josena. Kaha nawa nahase “[kulinga] vyeshovyo nasake.”—Samu 135:5, 6.
Tuli nakukukolezeza unganyale kulutalililo lwamwenemwene lwamuMbimbiliya. Chuma nachikukafwa ufwelele chikuma lutalililo kana shina “[kukekesanga] kanawa Visoneka.” (Vilinga 17:11) Tachikiza vyavivulu hakulinangula Mbimbiliya hawana wakanyombo. Pwako nalutalililo lwamwenemwene mu 2023.
a Yehova likiko lijina lyaKalunga.—Samu 83:18.