TONENUNGA!
2023: Mwaka waKulizakamina—Vyuma Muka Yahanjika Mbimbiliya?
Mumwaka wa 2023, munalingiwanga vyuma vize vinasolola hatoma nge tuli nakuyoyela mulwola luze Mbimbiliya yavuluka ngwayo “makumbi akukuminyina.” (WaChimoteu 2, 3:1) Tala omwo vyuma vinakusoloka vinalitombo navize yahanjikile Mbimbiliya ngwayo navikasoloka mumakumbi ano.
Mbimbiliya navyuma vili nakusoloka mukaye
“Jijita namijimbu yajijita”—Mateu 24:6.
“Vikokojola vili nakuvula chikuma kumafuchi amavulu muno mukaye.” a
Tala chihande chakwamba ngwavo “Uno Iya Mwalwila Vatu?” nachakwamba ngwavo “Jifulumende Mukaye Kosena Jinazachisa Jimbongo jaJindola Jakuhambakana ha $2 Tililiyoni kuMulimo waUswalale.”
“kuvihela vyeka navyeka nakukapwa mindenda.”—Mako 13:8.
“Putu vene kumaputukilo amwaka wa 2023, kunapunga mindenda yayinene 13 yakuhambakana jimagnitude 7 mukaye kosena, mumwaka kana munasoloka mindenda yayivulu chikuma kuhambakana myaka yosena.” b
Tala chihande chakwamba ngwavo “MuTurkey NamuSyria Mwapwanga Mindenda Yayinene.”
“Vyuma vyakwivwisa vatu woma.”—Luka 21:11.
“Lwola lwakuzuma chakaye lunakumu; kuneza jino lwola lwakuliteleka chakaye.”—António Guterres, UN secretary-general. c
Tala chihande chakwamba ngwavo “Kuzuma Chikuma muNgonde yaNonga mu 2023.”
“Zala.”—Mateu 24:7.
“2023: Mwaka ukwavo uze vatu vanalizakamina mwakuwanyina vyakulya mangana vazakame jitanga javo.” d
Tala chihande chakwamba ngwavo “Kukeha chaVyakulya Mukaye Kosena Mwomwo yaJita naKwalumuka chaJingonde.”
“Lwola lwalukalu.”—WaChimoteu 2, 3:1.
“Mukaye kosena kafwe mutu umwe havatu 8 ali naukalu wakuviza muwongo.” e
Tala chihande chakwamba ngwavo “Kulisala chaUkalu waKuviza muWongo kuVakweze.”
Uno vyuma muka navisoloka mu 2024?
Naumwe wauchi natachikiza vyuma navisoloka mu 2024. Oloze vyuma vili nakusoloka mukaye vili nakusolola nge Wangana waKalunga chipwe ngwetu fulumende yamwilu nayikashisa jifulumende javatu nakufumisako vyuma vyosena vinakulingisa vatu vayande.—Ndanyele 2:44; Kusoloka 21:4.
Oholyapwa nge tunalizakamina, twatela kupendamina hali Kalunga atukafwe. Mbimbiliya ngwayo:
“Ngweji kufwelelanga muli ove kachi nge ngunevu woma.”—Samu 56:3.
Natusolola ngachilihi ngwetu twafwelela Kalunga? Tuli nakukukolezeza ulinangule jishiko jamuMbimbiliya jize jahanjika vyachiyoyelo chakulutwe omu kakweshi kukapwa kuyandako. Eseka kulinangula Mbimbiliya hawana wakanyombo umone omu ove natanga yove munahase kunganyala kujishiko jamuMbimbiliya.
a Foreign Affairs, “A World at War: What Is Behind the Global Explosion of Violent Conflict?” vausonekele kuli Emma Beals naPeter Salisbury, October 30, 2023.
b Earthquake News, “Year 2023: Number of Major Earthquakes on Course for Record,” May, 2023.
c United Nations, “Secretary-General’s Opening Remarks at Press Conference on Climate,” July 27, 2023.
d World Food Programme, “A Global Food Crisis.”
e World Health Organization, “World Mental Health Day 2023,” October 10, 2023.