Vatu vavavulu vali nakushinganyeka ngwavo kakweshi jila yakukumishilamo ukalu navamona vatu mu 2024. Oloze kuli vyuma vinahase kutukafwa tutalilile vyuma vyamwaza kulutwe. Kulihi tunahase kuwana vyuma kana?

 Mbimbiliya yatushika ngwayo Kalunga mwakakumisa ukalu uze uli nakusoloka nge kaweshi kukakumako. Kalinwomu ngana, Kalunga “[mwahunda] masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.”—Kusoloka 21:4.

•   Nge uli nakusaka kutachikiza vyavivulu kutalisa kujishiko jamuMbimbiliya, kaha tanga chihande chakwamba ngwavo “Lutalililo Lwakukapwa Nakuyoya Chamwaza Kulutwe.”

 Mbimbiliya nayikukafwa utalilile vyuma vyamwaza kulutwe nakukukafwa wechenga kuhomba nakupwa jino uwakuhililila. (Wavaka-Loma 15:13) Jindongi jatwama muMbimbiliya najikukafwa ulipike naukalu unahase kumona wakufwana nge uhutu, kukulinga mwamupi kuli vaka-kuhengesa chiyulo, namisongo.

•   Wana omwo jishiko jamuMbimbiliya jakafwile lunga umwe apwenga wakuunda nakupwa wakuwahilila chamokomoko naukalu wauhutu. Tala vindiyo yakwamba ngwavo Juan Pablo Zermeño: Yehova Angukafwile Ngupwenga naKuyoya Chamwenemwene.

•   Wana omwo Mbimbiliya yinahase kukukafwa nge uli nakulihana milonga chipwe kuhomba chipwe kulizakamina chipwe nge unafwisa mutu wazanga. Tanga chihande chamuChingeleshi chakwamba ngwavo “Can I Find Words of Comfort in the Bible?”

•   Tala umone omwo mutu uze apwile liswalale uze alivulukile ngwenyi apwile mutu uze kazakaminenga vatuko, awanyine jino lutalililo muMbimbiliya. Tala vindiyo yamuChingeleshi yakwamba ngwavo I Put Down My Rifle.

 Linga vyuma vize navikulingisa natanga yove mupwenga vakuwahilila muno 2024. Linangula vyavivulu kutalisa kujila yinahase kukukafwilamo Mbimbiliya. Acheseke kulinangula Mbimbiliya nayetu hawana wakanyombo. Naulinangula omwo Kalunga nahase ‘utwame mukuunda’ oholyapwa “[nakukayoya] kanawa kulutwe nakupwa nalutalililo.”—Yelemiya 29:11.