Liuka lyaWorld Health Organization (WHO) lyahanjikanga ngwalyo, vatu vanafu kumusongo waCOVID-19 kufuma haze waputukile nakuheta ha 23 May 2022,vanahete kujimiliyoni 6.27. Chipwe ngocho, ha 5 May 2022 liuka lyaWorld Health Organization lyahanjikile ngwalyo, chinasoloka nge kunafu vatu vavavulu kuhambakana totala kaneyi. Lyahanjikile nawa ngwalyo, kufuma mu 2020 nakuheta mu 2021, “vatu vakuheta kafwe jimiliyoni 14.9 vanafu mwomwo yakuviza musongo waCOVID-19 chipwe mwomwo yakupwa navinjikizo vyamusongo kana.” Uno Mbimbiliya yahanjikaho vyuma vimwe haukalu waunene ngana tahi?

•   Yesu ahanjikilile chimweza ngwenyi “hamakumbi akukuminyina” nakukapwanga “misongo yachihita.”—Luka 21:11; WaChimoteu 2, 3:1.

 Upolofweto waYesu uli nakutesamo makumbi ano. Hakusaka ulinangule vyavivulu, tanga chihande chakwamba ngwavo, “Vinjikizo Muka Vyasolola Nge Tuli Nakuyoyela ‘muMakumbi Akukuminyina’?”

•   “Kalunga muka-kuvendejeka chosena . . . eji kutuvendejekanga muvyeseko vyetu vyosena.”—Wavaka-Kolinde 2, 1:3, 4.

 Mbimbiliya yinavendejeka vatu vavavulu vaze vanafwisa vatu vaze vazanga. Linangule vyavivulu muchihande chakwamba ngwavo “Vyuma Navimikafwa Nge Munakulishona—Vyuma Mwatela Kulinga” nechi chakwamba ngwavo “Vyuma Navikafwa Chikuma Vaze Vanakulishona.”

•   “Wangana wove wizenga. Mwaya muchima wove mulingiwe mwilu, nahamavu nawa.”—Mateu 6:10.

 Kalinwomu “Wangana waKalunga” uwahise vyuma mangana kukazeneke kupwa “mutu mwakamba ngwenyi: ‘Nguli nakukola.’” (Mako 1:14, 15; Isaya 33:24) Hakusaka utachikize kanawa eyi fulumende yamwilu navyuma nayikalinga, tala vindiyo yakwamba ngwavo Wangana waKalunga Chuma Muka?

 Tunakulombo ove natanga yove mulinangule vyavivulu muMbimbiliya mangana mutachikize jindongi najishiko jamwaza jatwamamo.