“Ukalu wakuviza muwongo uli nakuvula chikuma kuvanyike, kaha chuma chachinene chili nakuneha ukalu kana shina internet.”—Dr. Vivek Murthy, U.S. surgeon general, New York Times, June 17, 2024.

 Uno visemi navahasa ngachilihi kukinga vana vavo kukuzachisa internet mujila yayipi? MuMbimbiliya mwatwama jindongi jinahase kuvakafwa.

 Tala eji jindongi jamuMbimbiliya.

 “Mutu wakuzangama eji kuhehwojolanga jijila jenyi josena.”—Vishimo 14:15.

 Hakuwana nge kuzachisa internet cheji kunehanga ukalu, kanda kulusuka kwitavisa mwanove aputuke kuyizachisako. Shimbu kanda witavise mwanove aputuke kuzachisa internet, watela kumona ngwove nakolo nakuheta haseteko yakulikanyisa kulinga vyuma vimwe, nakusakula kanawa masepa nakulihenda kukutalanga vyuma vyavipi.

•   Nge uli nakusaka kulinangula vyavivulu, tanga chihande chamuChingeleshi chakwamba ngwavo “Should My Child Use Social Media?” nachakwamba ngwavo “Teaching Your Teenager Social Media Safety.”

 “Zachisenunga kanawa lwola lwenu.”—Wavaka-Efwesu 5:16.

 Nge nawitavisa vana vove vazachisenga internet, kaha watela kuvahana jishimbi nakuvalumbunwina omwo jishimbi kana najivakinga. Hakanga mangana kuli mwanove mangana umone nge chili nakusakiwa kumulweza akeheseko kuzachisa internet, kachi nge naumona vilinga vyenyi vinaputuka kwalumuka.

•   Zachiza vindiyo yavyakufunjejeka yakwamba ngwavo Pwenunga Vakuvanguluka Hakulituminanga Mijimbu haMakina mangana ukafwe mwanove azachisena kanawa internet.

 Mbimbiliya yahanjika ngwayo tuli nakuyoyela “[mu]lwola lwalukalu.” (WaChimoteu 2, 3:1-5) Chipwe ngocho, yatwama nawa najindongi jakutukafwa tulipike naukalu natumona. Kuli vihande vyamuMbimbiliya vanenyikilako muchihande chino vyakuzomboka ha 20 vize navikafwa visemi navana vavo kutalisa kuvyuma vinahase kuvanehela ukalu wamuvishinganyeka.