TONENUNGA!
Kukeha chaVyakulya Mukaye Kosena Mwomwo yaJita naKwalumuka chaJingonde—Vyuma Muka Yahanjika Mbimbiliya?
Jita yili muUkraine, hamwe kaha nakwalumuka chajingonde vili nakulingisa chipwenga chachikalu kutwala vyakulya kuvihela kuze vili nakusakiwa mukaye kosena. Chuma kana chili nakukaluhwila chikuma vatu vamumafuchi akuhutwa muze mwatwama vyakulya vyavindende.
“Vikokojola nakwalumuka chajingonde nakunyina chajindando jamaji navyuma vyeka, vili nakulingisa chipwenga chachikalu kulima vyakulya vyavivulu nakuvitwala kuze vili nakusakiwa.”—António Guterres, twamina waliuka lyaUnited Nations, July 17, 2023.
“Vakuluwa vanahanjika ngwavo hakuwana nge lifuchi lyaRussia linakane kutwalaho kulama chivwasano valikashile chakwitavisa kutwala vyakulya kumafuchi kuze vilinakusakiwa, nachilingisa zala yitohwe mukaye, nakulingisa jindando javyakulya jinyine chikuma mumafuchi akuhutwa, chikumanyi mafuchi akunote yaAfrica nakuMiddle East.”—Atalayar.com, July 23, 2023.
Tala vyuma yahanjika Mbimbiliya hakukeha chavyakulya nahachiyoyelo chakulutwe.
Mbimbiliya yahanjikilile chimweza vyakukeha chavyakulya
Yesu apolofwetele ngwenyi: “Lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo, kaha kuvihela vyeka navyeka nakukapwa zala.”—Mateu 24:7.
Mumukanda waKusoloka wahanjika havaka-kutambuka hatuvalu vawana. Muka-kutambuka hakavalu umwe emanyinako jijita. Muli ikiye mwakavangijile mukwavo uze emanyinako zala yakalombolombo, lwola luze vyakulya navikakeha nakuvilanda handando yayinene chikuma. “Ngwamwene kavalu wilava, kaha uze atwamineho apwile nachipezaliso mulivoko lyenyi. . . . [Ngwevwile] lizu lyakwamba ngwavo: ’Kwate yimwe yatiliku, ndando yayo ndenali yimwe, kaha jikwate jitatu jambale, ndando yajo ndenali yimwe.’”—Kusoloka 6:5, 6.
Ou upolofweto wakukeha chavyakulya uli nakutesamo mumakumbi ano vavuluka muMbimbiliya ngwavo “makumbi akukuminyina.” (WaChimoteu 2, 3:1) Hakusaka kulinangula vyavivulu kutalisa ‘kumakumbi akukuminyina’ navaka-kutambuka hatuvalu vawana vaze vavuluka mumukanda waKusoloka, tala vindiyo yakwamba ngwavo Kaye Kanalumukanga Kufuma Vene mu 1914 nachihande chakwamba ngwavo “Uno Vaka-kutambuka haTuvalu Vawana Vemanyinako Ika?”
Uno Mbimbiliya yinahase kukukafwa ngachilihi?
MuMbimbiliya mwatwama jindongi jamwaza jize jinahase kukukafwa ulipike naukalu wakufwana nge kutohwa chajindando javyakulya chipwe vene kukeha chavyakulya. Tala vyakutalilaho vimwe muchihande chakwamba ngwavo “Mwakuyoyela Nge Uli naJimbongo Jajindende.”
Mbimbiliya yatuhana nawa lutalililo ngwayo vyuma navikawaha kulutwe. Yatufwelelesa lwola luze “Hamavu nahakapwanga mbuto jamanona jakulisala,” kaha vatu vosena navakapwanga nakulya chachivulu (Samu 72:16) Hakusaka ulinangule vyavivulu kutalisa kulutalililo kanelu lwakulutwe navyuma vyatela kukulingisa ulufwelele, tanga chihande chamuChingeleshi chakwamba ngwavo “A Real Hope for a Better Tomorrow.”