TONENUNGA!
Vinjiho jaYehova Vavavulu Vavajihile muLwola lwaJita Yize Yalalishile Vatu—Vyuma Muka Yahanjika Mbimbiliya?
Ha 27 January, 2023, vatu vavavulu navakanuka likumbi kwapwile Jita Yize Yajihile Vatu Vavavulu. [International Holocaust Remembrance Day] Ukenya navyuma vyavipi vize vyasolokele myaka yakuzomboka 75 kunyima vinahase kukulingisa ulihulise ovyo Kalunga etavishilile kupwenga jita kana.
Hakusaka utachikiza vyuma yahanjika Mbimbiliya, tanga chihande chakwamba ngwavo “Mwomwo Ika Kwapwilile Jita Yakujiha Vatu Vavavulu? Mwomwo Ika Kalunga Azenekele Kuhonesa Jita Kana?”
VaYuleya vakiko vayanjishile chikuma mujita kana. Vatu vavavulu vavajihile, kaha nawa vatu vamumazavu eka vavajihile halwola lwajita kana. Havatu vaze vajihile hapwile naVinjiho jaYehova, vaze vayanjishile mwomwo yamuchano wamuMbimbiliya uze vetavila.
Hakusaka utachikize vyavivulu tanga chihande chakwamba ngwavo “Vyuma Muka Vyasolokele Kuli Vinjiho jaYehova muLwola lwaJita Yize Yalalishile Vatu?”
Vyuma Twatalilila Kulutwe
Vatu vavavulu veji kwivwanga woma ngwavo kulutwe kunahase kwiza jita yize nayikajiha vatu vavavulu chikuma. Oloze Mbimbiliya yatulweza ngwayo kulutwe kakweshi kukapwa ukalu wakufwana nganako.
“Yehova nambe ngwenyi, ‘Ngunatachikiza vyuma nguli nakushinganyeka hali enu. Nguli nakushinganyeka kumitwamisa mukuunda, keshi kuminehela lupiko, mangana mukayoye kanawa kulutwe nakupwa nalutalililo.’”—Yelemiya 29:11. a
Vyuma kanevi twatalilila navikatesamo omu Yehova Kalunga mwakafumisako upi, nakuwahisa vyuma vyosena. Kalinwomu:
Afumiseko vaka-kuhuka vaze veji kulinganga vyuma vyavipi kuli vakwavo.—Vishimo 2:22.
Afumiseko ukalu uze uli nakuyanjisa vatu.—Kusoloka 21:4.
Asangule vaze vafwa.—Yowano 5:28, 29.
Watela kufwelela mazu alutalilia vatushika muMbimbiliya. Hakusaka utachikize ovyo watela kulingila ngcho, tuli nakukulomba ulinangule Mbimbiliya hawana wakanyombo.
a Yehova likiko lijina lyaKalunga.—Samu 83:18.