Mwakuhonesela Ukalu waKwivwa Uli haKutunga Masepa—Uno Mbimbiliya Yinahase Kukukafwa Ngachilihi?
Mu mwaka wa 2023 vatu vavavulu chikuma valipikanga naukalu wakwivwa uli. Uno unahase kufungulula ngachilihi ukalu kana?
Vivek Murthy uze apwa mukulwane wavandotolo jamaswalale vamu U.S. ambile ngwenyi: “Kachi nge natwivwa uli nakulihandula kuli vakwetu, kaha tunahase kulinehela ukalu kumujimba nakuhona kupwa vakuwahilila.” Ambile nawa ngwenyi: “Kuli vyuma vimwe tunahase kulinga. Hakumbi hakumbi twatela kulinganga vyuma vyavindende vize navizamisa usepa wetu navakwetu.” a
Uli kaweza kaha mwomwo yakulihandula kuli vakwetuko. Vatu vamwe veji kwivwanga uli numba vene nge vali hakachi kavatu vavavulu. Oloze Mbimbiliya yinahase kutukafwa chamokomoko navyuma vize navitwivwisa uli. MuMbimbiliya mwatwama jindongi jize jinahase kutukafwa tuhonese ukalu wakwivwa uli hakuzamisa usepa wetu navakwetu.
Uno jindongi jamuMbimbiliya jinahase kukukafwa ngachilihi?
Shimutwilanga kanawa navakwenu. Echi kachasakiwa kaha kulwezanga vakwenu omwo uli nakwivwako, oloze watela kupwa nawa umuka-kwivwilila kanawa. Kachi nge nausolola ngwove wazakama vakwenu kaha usepa wenu nauzaminako chikuma.
Lundongi lwamuMbimbiliya: “Kanda kuhakanga kulutwe vyuma mwasaka enu kahako, oloze navyuma vasaka vakwenu nawa.”—Wavaka-Fwilipi 2:4.
Likatenga usepa navatu vakulisezaseza. Likate usepa navatu vaze vapwa vakulwane chipwe vanyike kuhambakana yove chipwe vatu vavisemwa vyeka chipwe vakumafuchi eka.
Lundongi lwamuMbimbiliya: “Kasununenu chikuma michima yenu.”—Wavaka-Kolinde 2, 6:13.
Hakusaka utachikize mijimbu yayivulu yomwo unahase kuzamishilamo usepa wove navakwenu, tanga chihande chamuChingeleshi chakwamba ngwavo “Satisfying Our Hunger for Friendship.”
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.
Pamo Nauzanga Nawa
KUKUNGULUKA
Vyuma Muka Vyeji Kusolokanga haZuvo yaWangana?
Ingilenu muZuvo yaWangana mumone vyuma vyeji kusolokanga.
