Vatu vavavulu mukaye vali nakushinganyeka ngwavo nachiwaha nge vatu navecha kuzachisa vyuma vyosena vyakufuma kutunyama.

•   “Vatu vamwe vashinganyeka ngwavo chapwa chakuhenga mutu kujiha kanyama mangana alyenga chipwe kufumisako lilambu lyakutunga uvwalo, chipwe kumuzachisa milimo yeka.”—The Vegan Society.

 Vatu vamwe veji kulihendanga kukuzachisa tunyama mukala jila mwomwo yakusaka kuvakinga, chipwe kulihenda kumisongo, chipwe mwomwo yakwitava chavo.

•   “Kukana kuzachisa tunyama mukala jila chalihandununa nakuhona kulya vyuma vimwe, mwomwo vachimona kupwa chuma chize mwalinga mutu mwomwo yakwitava chenyi chipwe mwomwo yakuchimona kupwa himajilo, chipwe mwomwo yakusaka kuwahisa vyuma mukaye.”—Britannica Academic.

 Uno kukana kuzachisa vyuma vyosena vyakufuma kutunyama chinahase kwalumuna ano mavu tahi? Vyuma Muka Yahanjika Mbimbiliya?

 Mbimbiliya yasolola ngwayo Tengi yetu Yehova a Kalunga amona vatu kupwa vavalemu kuhambakana tunyama, kaha nawa ahana vatu wata hali tunyama. (Kuputuka 1:27, 28) Halwola lumwe, Kalunga etavishile vatu valyenganga tunyama. (Kuputuka 9:3) Chipwe ngocho, ketavisa vatu vayanjisenga tunyamako.—Vishimo 12:10.

 Kwesena naMbimbiliya, mutu himutu atela kulisakwila kulya nyama chipwe chiku. b Kusakula kulya nyama chipwe kukana keshi chikiko nachilingisa Kalunga atwivwile kuwahako. (Wavaka-Kolinde 1, 8:8) Kakwatela kupwa mutu mwahana mukwavo mulonga hachuma nasakulako.—Wavaka-Loma 14:3.

 Mbimbiliya yasolola ngwayo jila natusakula kuyoyelamo kayeshi kuhasa kukumisa ukalu mukayeko. Ukalu wauvulu tuli nakumona uli nakwiza mwomwo yavaka-mapolitiki namauka vali nakutunga vatu namauka avaka-kusekasana amukaye aze kaweshi kuhasa kulinga vyuma vyakwolokako. Mbimbiliya yahanjika ngwayo:

•   “Vyuma vinahenge kaveshi kuhasa kuvyololako.”—Muka-kwambulula 1:15.

 Tengi yetu mwakakumisa ukalu tweji kumonanga. Mbimbiliya yahanjika mujila yachifwanyisa hakulumbununa vyuma mwakalinga.

•   “Jino ngwamwene melu amahya namavu amahya, mwomwo melu akulivanga namavu akulivanga vinafumuko lyehi, kaha kalungalwiji keshiko chekako.”—Kusoloka 21:1.

 Kalunga mwakafumisako jifulumende javatu, chipwe ngwetu “melu akulivanga,” nakuneha “melu amahya,” Wangana wenyi wamwilu. Wangana wenyi naukafumisako “mavu akulivanga,” kulumbununa vatu vakuhuka, kaha naukayula “mavu amahya,” chipwe ngwetu vaze veji kuliluulanga kuWangana wenyi.

 Muchiyulo chaWangana waKalunga hakiko kaha vatu navakatwamanga mukuunda natunyama, nakulama kanawa mavu.—Isaya 11:6-9.