“Numba tuhu musongo waCOVID-19 unakeheleka, oloze kacheshi nakulumbununa nge unakumu wosenako. Ngocho twatela kulizanga vyamusongo weka wachihita uze naukeza kulutwe.”—Dr. Tedros Adhanom Ghebreyesus, mukulwane waliuka lyaWorld Health Organization, May 22, 2023.

 Vatu vavavulu vachili nakumona ukalu wakumujimba chipwe wamuvishinganyeka mwomwo yamusongo waCOVID-19. Uno jifulumende namauka atala hakulikangula chavatu nawalizanga vyamusongo weka wachihita chipwe kukumisa ukalu wakuhona kulikangula uze tuli nakumona oholyapwa tahi?

 Mbimbiliya yavuluka fulumende yize nayikalingisa vatu vakapwe vakulikangula kumujimba. Yahanjika ngwayo “Kalunga wamwilu mwakahakako wangana,” chipwe ngwetu fulumende. (Ndanyele 2:44) Omu fulumende kana nayikayulanga, ‘kakweshi kukapwa mutu mwakamba ngwenyi: “Nguli nakukola.”’ (Isaya 33:24) Vatu vosena navakapwa vakulikangula, kaha nawa navakapwa nangolo ngana jize vapwile najo omu vapwile vakweze.—Yopa 33:25.