Twamina waliuka lyaWorld Bank Group ahanjikile mulipoti lyamuJune 2022 ngwenyi: “Chiyoyelo mukaye kosena chinakaluhwa chikuma. Kaha nawa makumbi ano jindando javyakulya jili nakunyina chikuma, oloze vatu vali najimbongo jajindende jakulanda vyuma kana.”

 Liuka lyaInternational Monetary Fund linambe ngwalyo: “Jindando jamaji amujiminyau navyakulya jinanyinyi chikuma nakulingisa chiyoyelo chavatu vamumafuchi auhutu chikaluhwe.”

 Mbimbiliya yatukafwa tutachikize vyuma vinakulingisa chiyoyelo chikaluhwe, nomwo tunahase kumika muukalu kana nakutukafwa tutachikize omwo navakaufumisako.

•   Mbimbiliya yahanjika ngwayo tuli nakuyoyela “hamakumbi akukuminyina.”—WaChimoteu 2, 3:1.

•   Yesu ahanjikile ngwenyi “vyuma vyakwivwisa vatu woma” navikasoloka hamakumbi ano tunakuyoyelamo. (Luka 21:11) Kunyina chajindando javyuma chinakulingisa vatu valizakamine chikuma. Vatu vanakulizakamina hachiyoyelo chavo chakulutwe numba nge vanahase kukazakamanga jitanga javo.

•   Mukanda waKusoloka wahanjikile chimweza ngwawo jindando javyakulya najikanyina mulwola luno tuli nakuyoyelamo. “Ngwevwileho lizu lyakwamba ngwavo: ‘Kwate yimwe yatiliku, ndando yayo ndenali yimwe, kaha jikwate jitatu jambale, ndando yajo ndenali yimwe.’”—Kusoloka 6:6.

 Hakusaka utachikize vyavivulu “hamakumbi akukuminyina” nahaupolofweto wamumukanda waKusoloka, tala vindiyo yakwamba ngwavo, Kaye Kanalumukanga Kufuma Vene mu 1914 nakutanga chihande chakwamba ngwavo “Uno Vaka-kutambuka haTuvalu Vawana Vemanyinako Ika?”

•   “Navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo. Kaveshi kukatunga jizuvo javo mangana veka vakatwamengamoko, kaveshi kukalima mangana veka vakalyenga vyuma vanalimiko.”—Isaya 65:21, 22.

•   “Hamavu nahakapwanga mbuto jamanona jakulisala. Hajipili hosena nahakapwanga mbuto jamanona jajivulu.”—Samu 72:16.

•   “Yehova nambe ngwenyi: ‘Hakuwana nge vaka-kukalikiza vali nakuvashinyinyika, kaha vaka-kuhutwa nawa vali nakulishimwoka, ngocho nangukatuka.’”—Samu 12:5. a

 Kalinwomu Kalunga afumiseko ukalu wakukaluhwa chachiyoyelo mukaye kosena. Hakusaka utachikize omu Kalunga mwakalinga ngocho, tanga chihande chakwamba ngwavo “Uno Vatu Vosena Vanahase Kupwa naChiyoyelo Chamwaza Tahi?”

 Mbimbiliya yinahase kukukafwa uwane mwakulingila makumbi ano omu jindando jili nakunyinyilako. Uno yinahase kukukafwa ngachilihi? Yinahase kukukafwa utachikize mwakuzachishila kanawa jimbongo. (Vishimo 23:4, 5; Muka-kwambulula 7:12) Hakusaka utachikize vyavivulu, tanga chihande chakwamba ngwavo “Kingenu Vyuma Vyenu” nechi chakwamba ngwavo “Mwakuyoyela Nge Uli naJimbongo Jajindende.”