Vatu vavavulu vanalizakamina chikuma omu vatu vali nakwenyeka mavu navyuma vyakuyoya vyatwamaho. Vatu vaze valinangula chikuma vyuma vyamavu navyuma vyatwamaho, vanambe ngwavo makumbi ano vatu vali nakujiha tunyama nakwenyeka chikuma mitondo kuhambakana muze chapwile kunyima.

 Uno vatu navenyeka mavu tahi? Uno vanahase kuyoya chakuzeneka kwenyeka mavu tahi?

 Vatu valinangula chikuma vafwelela ngwavo vatu vanahase kukinga mavu, nakuyoya chakuzeneka kuwenyeka. Vaka-kuhehwojola vamwe veji kuhanjikanga ngwavo hakusaka vatu vakinge mavu vatela kwalumunako vyuma vimwe chakuzeneka kukwata kumashinde. Vyuma kana shina:

•   Kunangula vatu omu vanahase kuzakaminamo mavu, namisenge, navijiva vyameya natulungalwiji.

•   Kuzachisa jijila jeka jakuliminamo najijila jeka jakupwilamo nakakahya kakezi.

•   Kulyanga chikuma vyakulya vyakutumba, nakukehesako kulya chikuma nyama navayishi nakuhona kwenyeka kulya.

•   Kwitavila ngwavo kuyoya chamwaza kachapendamina hakupwa navikumba vyavivuluko.

 Ove unashinganyeka ngachilihi? Kutala nachipwa chamangana kufwelela ngwetu jifulumende, navaka-kusekasana navatu veka vanahase kuzachila hamwe tahi? Nyi unashinganyeka ngwove lizangamina, nalifwi nakuhona kutachikiza ukalu naufuma muvyuma navasakula kulinga, vinahase kuvahonesa kuzachila hamwe?—WaChimoteu 2, 3:1-5.

 Mbimbiliya yatufwelelesa ngwayo ano mavu kaveshi kukawanongesa. Yalumbununa ovyo vatu kaveshi kuhasa kuyovola mavuko, nakulumbununa nawa vyuma vinakusakiwa kwalumunako. Kaha nawa yahanjika omu nachikapwa kwalumuka kana.

 Ovyo vatu kaveshi kuhashila kuyovola mavuko. Yehova a Kalunga atengele mavu, kaha ahanyine vatu mulimo wakuwalama. (Kuputuka 1:28; 2:15) Vanahase kuzata kanawa ou mulimo, kachi nge navapendamina hali Tengi yavo avatwaminyine nakukavangiza jishimbi jenyi. (Vishimo 20:24) Oloze vakanyine Yehova nakusaka kulimanyina. (Muka-kwambulula 7:29) Vatu kavatwama nangolo jakulama mavu chakuzeneka kuvatwaminyina kuli Yehovako. Shikaho numba nge navatesamo vyuma vimwe, oloze kaveshi kuhasa kufukila chikumako.—Vishimo 21:30; Yelemiya 10:23.

 Kwalumuka chize chinakusakiwa. Kalunga afwila kulingisa vatu vechenga kwenyeka mavu. (Kusoloka 11:18) Keshi kukakafwa jifulumende chipwe vatu vakeche kwenyeka mavuko, oloze mwakavafumisako. (Kusoloka 21:1) Evi vikiko Yehova ahanjikila ngwenyi: “Tala! Nangulingisa vyuma vyosena kupwa vyavihya.”—Kusoloka 21:5.

 Omu nachikeza kwalumuka kana. Yehova mwakashishisa jifulumende javatu nafulumende yamwilu yize vavuluka ngwavo Wangana waKalunga. Eyi fulumende navakatwaminyina kuli Yesu Kulishitu, ikiko nayikayulanga hamavu.—Ndanyele 2:44; Mateu 6:10.

 Wangana waKalunga naukanangula vatu vakakavangizenga jishimbi jaKalunga. Omu vatu navakatachikiza Tengi yavo nakukavangiza jishimbi jenyi, kaha navakahasa kulama kanawa jino mavu. (Isaya 11:9) Mbimbiliya yalumbununa omu fulumende yaKalunga, nayikakafwa vatu nayikayula vakalivwise kuwaha kuyoya nakuyoya mujila yize kayeshi kukenyeka mavuko. Fulumende yaKalunga nayikalinga vyuma vino:

•   Nayikahana vatu vosena vyakulya.—Samu 72:16.

•   Nayikawahisa vyuma vyakutenga vize vinalyenyeka.—Isaya 35:1, 2, 6, 7.

•   Nayikalingisa vatu natunyama vakatwame hamwe mukuunda.—Isaya 11:6-8; Hozeya 2:18.

•   Nayikafumisako jiponde jakulijila.—Mako 4:37-41.

 Tachikiza ngwavo Wangana waKalunga kalinwomu ulinge vyuma kana. Nge uli nakusaka mijimbu yayivulu, kaha tanga chihande chakwamba ngwavo “Lwola Muka Wangana waKalunga Naukayula haMavu?”