MuJuly 2022, vavilikanga ngwavo mukaye kosena mwapwanga peho yizuma chikuma:

•   “Mulifuchi lyaChina vatu vanavalweze ngwavo mujinganda kafwe 70 namupwa cheka peho yizuma chikuma uno kakweji.”—July 25, 2022, CNN Wire Service.

•   “MuEurope, misenge yili nakuliwemena mwomwo yapeho yizuma chikuma.”—July 17, 2022, The Guardian.

•   “LyaSondo, mujinganda jajivulu jakumututuko, nakumusamuko nasali yimwe yakumulauko mulifuchi lyaUSA, mwapwanga peho yizuma chikuma yize kanda yichipwengaho lyehi mulifuchi kana.”—July 24, 2022, The New York Times.

 Mwomwo ika vyuma kana vili nakusolokela? Uno ano mavu nawalyenyeka nakulingisa vatu vahone kutwamaho tahi? Vyuma muka yahanjika Mbimbiliya?

 Eyo. Eji jipeho jizuma jiliko, jili nakusolola hatoma ukalu uze vavuluka muMbimbiliya ngwavo naukapwangako mumakumbi etu. Chakutalilaho, Yesu apolofwetele ngwenyi natumonanga “vyuma vyakwivwisa vatu woma.” (Luka 21:11) Eyi peho yizuma chikuma yili nakwivwisa vatu woma nakuvalingisa vashinganyeke ngwavo vatu navenyeka kaye.

 Nduma. Kalunga atengele mavu mangana hatwamenga vatu haya myaka yosena. (Samu 115:16; Muka-kwambulula 1:4) Keshi kwitavila vatu venyeke mavuko, oloze ‘mwakenyeka vaze veji kwenyekanga mavu.’—Kusoloka 11:18.

 Shinganyeka haupolofweto uvali uze wasolola vyuma vikwavo vize ashika Kalunga:

•   “Pambo nalifuchi lyaumu navikalisamba, Kaha likundu nalikawahilila nakutemwina jitemo jasalafwone.” (Isaya 35:1) Kalunga keshi kuketavisa vatu vakalingise ano mavu kupwa angana vene akuhona chuma chakuyoya numba chimweko, oloze mwakawahisa vyuma vize vanenyeka vatu.

•   “Weji kuzakamanga mavu Hakuwalingisa apwenga nawilo nakwima vyuma vyavivulu chikuma.” (Samu 65:9) Kalunga mwakakisula ano mavu kupwa palachise.

 Hakusaka utachikize omu kwalumuka chajingonde chili nakutesamo upolofweto wamuMbimbiliya, tanga chihande chamuchingeleshi chakwamba ngwavo “Climate Change and Our Future—What the Bible Says.”

 Hakusaka utachikize jishiko jamuMbimbiliya jize jasolola nge mavu navakawawahisa, tanga chihande chakwamba ngwavo “Iya Mwayovola Mavu?”