Ha 24 February 2022 nachimene, lifuchi lyaRussia lyatumine maswalale vakalukuke lifuchi lyaUkraine, numba tuhu vatwamina vamukaye vanafwilanga kukanyisa eyi jita. Uno vikokojola kana vinahase kulingisa ngachilihi kaye kosena kapwenga muukalu? António Guterres uze apwa twamina waliuka lyaUnited Nations ahanjikanga kalinwomu ngwenyi: “Vatu vavavulu navayanda chikuma kaha nawa vyuma vyavivulu navilyenyeka chikumanyi mumafuchi amuEurope. Kaha nawa mafuchi amavulu mukaye kosena kaweshi kupwa akukingiwako.”

•   Yesu Kulishitu ahanjikilile chimweza ngwenyi “lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo.” (Mateu 24:7) Tanga chihande chakwamba ngwavo “Vinjikizo Muka Vyasolola Nge Tuli Nakuyoyela ‘muMakumbi Akukuminyina’?” mangana uwane omu jijita jiliko makumbi ano jili nakutesamo upolofweto waYesu wamuMbimbiliya.

•   Mukanda wamuMbimbiliya waKusoloka wafwanyisa jijita kuli muka-tambukila “hakavalu uchila nge kakahya” uze nawa eji kufumisanga “kuunda hamavu.” (Kusoloka 6:4) Tanga chihande chakwamba ngwavo “Uno Vaka-kutambuka haTuvalu Vawana Vemanyinako Ika?” mangana uwane omu jijita jiliko makumbi ano jinakutesamo upolofweto kana.

•   Mukanda waNdanyele wahanjikilile chimweza kulizungisa “chamwangana wakunote” “namwangana wakusulo.” (Ndanyele 11:25-45) Tala vindiyo yakwamba ngwavo Kutesamo chaUpolofweto WamuMukanda waNdanyele Kapetulu 11 mangana uwane ovyo lifuchi Russia navaka-kulikundwiza tunahase kuvavulukila ngwetu vapwa mwangana wakunote. a

•   Mukanda waKusoloka wahanjika nawa “hajita yahalikumbi lyalinene lyaKalunga Wangolo Josena.” (Kusoloka 16:14, 16) Chipwe ngocho, jita kana kayeshi kukapwa yamafuchi ngana eji jijita jiliko makumbi anoko. Tanga chihande chakwamba ngwavo “Uno Jita yaAlamangetone Yapwa Ika?” mangana utachikize vyavivulu kutalisa kujita kana.

•   Mbimbiliya yahanjika ngwayo Kalunga “mwakumisa jijita hamavu hosena.” (Samu 46:9) Tanga chihande chamuchingeleshi chakwamba ngwavo, “A Real Hope for a Better Tomorrow” (Lutalililo Lwamwenemwene lwaVyuma Vyamwaza) mangana uwane vyuma vyamwaza vize atushika Kalunga.

•   Yesu anangwile tumbaji twenyi valombenga ngwavo Wangana waKalunga wizenga. (Mateu 6:9, 10) Ou Wangana wapwa fulumende yamwilu yize nayikatesamo vyuma ajina Kalunga kulingila vatu hamavu. Chuma chimwe chize Kalunga ajina shina kuneha kuunda mukaye kosena. Hakusaka kutachikiza vyuma vyamwaza naukakulingila Wangana kana, tala vindiyo yakwamba ngwavo Wangana waKalunga Chuma Muka?

 MuUkraine mwatwama Vinjiho jaYehova vakuzomboka 129,000. Ava Vinjiho vapwa ngana mwaVinjiho vamumafuchi eka vaze veji kulondezezanga Yesu hakuhona kwazana muvihande vyamapolitiki chipwe kuzunga jita. (Yowano 18:36) Vinjiho jaYehova mukaye kosena, vanakutwalaho kwambulula ngwavo “mujimbu wamwaza waWangana” ukiko naukafumisako ukalu wosena kuhakilako vene najijita. (Mateu 24:14) Tuli nakukulomba ututumine ulinangule mujimbu wamuMbimbiliya walutalililo.