TONENUNGA!
Vaka-sayasi Vanaswenyesa Loloji Yakusolola Likumbi lyaUkalu Waunene—Vyuma Muka Yahanjika Mbimbiliya?
Ha 24 January 2023, vaka-sayasi vaswenyesanga Loloji Yakusolola Likumbi lyaUkalu Waunene a kwakamwihi nahakachi kaufuku. Loloji kana yemanyinako kukuma chakano kaye.
“Loloji Yakusolola Likumbi lyaUkalu Waunene yemanyinako ukalu uze navakamona vatu wakulinehela vavene. LyaChivali, vaka-sayasi vaswenyesanga likumbi kana hakachi kaufuku, mwomwo yajita yize yasolokele mulifuchi lyaUkraine, namata amatendazungu nakupihilako chajingonde.”—AFP International Text Wire.
“Vaka-sayasi vahanjikanga lyaChivali ngwavo ‘Loloji Yakusolola Likumbi lyaUkalu Waunene’ vanahakilako jisekondi 90 shimbu kanda mukachi kaufuku mangana kunongesa chizenga.”—ABC News.
“Vaka-sayasi vamumafuchi akulisezaseza valiwanyine hamwe nakuhuhumuna vatu ngwavo chili nakusoloka nge vatu vanahase kulinongesa vavene.”—The Guardian.
Uno vatu kalinwomu vavanongese hamwe kaha nayino pulaneti yetu tahi? Uno twatela kwivwa woma wavyuma vili nakwiza kulutwe tahi? Vyuma muka yahanjika Mbimbiliya?
Vyuma vili nakwiza kulutwe
Mbimbiliya yamba ngwayo, “mavu nawapwangako haya myaka yosena” kaha nawa vatu “navakatwamangaho haya myaka yosena.” (Muka-kwambulula 1:4; Samu 37:29) Shikaho, vatu kaveshi kukenyeka yino pulaneti chipwe kuyilingisa hakahone kutwama vatuko.
Chipwe ngocho Mbimbiliya yahanjika vyakukuma chakaye. Chakutalilaho, yahanjika ngwayo “kaye kali nakuhita.”—WaYowano 1, 2:17.
Hakusaka utachikize vyuma yahanjika Mbimbiliya kutalisa kukukuma chakaye, tanga chihande chakwamba ngwavo “Uno Kaye Nakakakuma Tahi? Uno Mbimbiliya Yahanjikilile Chimweza Vyakunongesa Kano Kaye Tahi?”
Hakusaka utachikize vyuma yahanjika Mbimbiliya kutalisa kuvyuma vili nakusoloka mukaye, tanga chihande chakwamba ngwavo “Lwola Muka Nakakakuma Kano Kaye?”
Kutwalaho kumona vyuma mujila yamwaza
Mbimbiliya yinahase kutukafwa tutwaleho lika kumona vyuma mujila yamwaza chamokomoko naukalu uli nakusoloka mukaye. Mujila muka?
MuMbimbiliya mwatwama mangana amwenemwene. (WaChimoteu 2, 3:16, 17) Chakutalilaho, tanga chihande chamuChingeleshi chakwamba ngwavo “Omu Unahase Kukehesako Kulizakamina” mangana umone omwo Mbimbiliya yinahase kukukafwa utwaleho lika kumona vyuma mujila yamwaza numba nge uli nakumona ukalu.
Mbimbiliya yatushika vyuma vyamwaza kulutwe. (Wavaka-Loma 15:4) Yalumbununa vyuma tunahase kumona oholyapwa nakulutwe nawa, kahechi cheji kutukafwanga tuunde muchima chamokomoko naukalu uli nakusoloka makumbi ano.
Hakusaka unganyale vyavivulu muMbimbiliya, tuli nakukulomba ulinangule Mbimbiliya hawana wakanyombo.
a “Loloji Yakusolola Likumbi lyaUkalu Waunene vayihakako mangana yikwafwe vatu vatachikize ngwavo likumbi lyakunongesa kano kaye kuzachisa vyuma vali nakutunga vatu linapandama. Yapwa hanjikiso yachifwanyisa yize yeji kwanukisanga vatu ukalu vatela kuzachilaho, kachi nge vali nakusaka kutwalaho kuyoyela hano hapulaneti.”—Bulletin of the Atomic Scientists.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno Jita yaAlamangetone Yapwa Ika?
Lizu Alamangetone lyasoloka kaha kamwe muMbimbiliya, oloze jita kana vayivuluka chikuma muVisoneka.
ESSENTIAL BIBLE TEACHINGS
Mwomwo Ika Kalunga Etavishila Kuyanda?
Vatu vavavulu vasaka kutachikiza ovyo chijindo nakuyanda vinavulila muno mukaye. Mbimbiliya yavuluka vyuma vyalingisa chijindo nakuyanda vivule muno mukaye, kaha vyuma yahanjika vinahase kutuvendejeka.
TONENU
Kunangula Chize Chatukafwa Tutalilile Vyamwaza
Ivwenu vyuma vyamwaza atushika kukatulingila Kalunga kulutwe.
ESSENTIAL BIBLE TEACHINGS
Mwomwo Ika Kalunga Atengelele Mavu?
Kaye ketu kapwa kamwaza chikuma. Katwama kwakusuku nalikumbi, kaha vakaseteka kanawa, keji kunyengumukanga chindende chindende. Mwomwo ika Kalunga atengelele mavu mujila kaneyi?
VYAYETU
Lomba Vakutambukile
Shimutwilenu chihula chimwe chamuMbimbiliya chipwe kulinangula vyavivulu hali Vinjiho jaYehova.
