Vatu vakuheta kafwe kujimbiliyoni 5, vakiko pamo vanatale ngunja yaLupasa lwaKaye (FIFA World Cup) yize yaputukanga ha 20 November nakuheta ha 18 December 2022. Vatu vavavulu vashinganyeka ngwavo kuhema chakufwana ngana, chinahase kuneha vyuma vyamwaza vyavivulu keshi kulingisa kaha vatu mukaye vapwenga vakulinungako.

•   “Kuhema chakufwana ngana chatwama nangolo jakwalumunako vyuma vimwe mukaye. Chatwama nangolo jakukolezeza vatu, nangolo nawa jakulingisa vatu valinunge mujila yakukomwesa.”—Nelson Mandela, uze apwile twamina walifuchi lyaSouth Africa.

•   “Ngunja yakumahinji . . . yeji kulingisanga vatu vatwame mukulinunga mwomwo yeji kuvalingisanga vapwenga nalutalililo, nakupwa vakuwahilila nakulizanga nawa navakwavo.”—Gianni Infantino, twamina waliuka lyaFIFA. a

 Uno Lupasa lwaKaye lwangunja nakuhema cheka chakufwana ngana vinahase kulingisa vatu valinunge tahi? Kutala nakukapwa kuunda nakulinunga chamwenemwene tahi?

 Ngunja yauno mwaka yinalingisa vatu vashinganyeke vyuma vyavivulu keshi ngunja kahako. Eyi ngunja yinalingisa vatu vahanjike chikuma halisesa vatwama nalyo vatu, nahakulitala havikova nahakukaluhwa chachiyoyelo.

 Chipwe ngocho vatu vavavulu veji kulivwisanga kuwaha kutala kuhema chakufwana nge ngunja yakufwila lupasa lwakaye. Numba tuhu vatu navasaka ngwavo ngunja kana yivalingise valinunge, oloze kayeshi kuhasa kuneha kulinunga chamwenemweneko. Kuhema chamuyachou cheji kusololanga vihandwa muvishinganyeka vyavatu navilinga vyavo, vyuma vize yavuluka Mbimbiliya ngwayo navikasoloka “hamakumbi akukuminyina.”—WaChimoteu 2, 3:1-5.

 Mbimbiliya yatufwelelesa ngwayo vatu mukaye kosena navakapwa vakulinunga. Yashika ngwayo, vatu mukaye kosena navakapwa vakulinunga omu navakavayulanga kufulumende yamwilu yize vavuluka ngwavo “Wangana waKalunga.”—Luka 4:43; Mateu 6:10.

 Yesu Kulishitu uze apwa Mwangana waWangana kana mwakalingisa hamavu hosena hakapwe kuunda. Mbimbiliya yamba ngwayo:

•   “Vaka-kwoloka navakafukilanga, kaha nakukapwa kuunda chamwenemwene.”—Samu 72:7.

•   “Mwakapululula vaka-kuhutwa vaze vali nakutwa kawelele . . . Mwakavapululula kuluyanjisa nakuulyanyi.”—Samu 72:12, 14.

 Namakumbi ano, vyuma anangwile Yesu vili nakulingisa vatu vavavulu chikuma vamumafuchi 239 vapwenga vakulinunga. Vatu kana vanafungulula chijindo. Nge uli nakusaka kutachikiza vyavivulu, kaha tala vihande vyakwamba ngwavo “Honesenu Chijindo Kutanda.”