Uno unashinganyeka ngwove vyuma navikapwa kanawa kulutwe tahi? Vatu vavavulu veji kutwalaho lika kumika chamokomoko naukalu vali nakumona makumbi ano. Kutala twatela kufwelela chikupu ngwetu vyuma navikapwa kanawa kulutwe tahi? Eyo! Mbimbiliya yatufwelelesa ngwayo kulutwe natukapwa nachiyoyelo chamwaza.

•  Uno Mbimbiliya yatuhana lutalililo muka?

•  Kutala chakutamo kufwelela ngwetu jishiko jamuMbimbiliya najikatesamo tahi?

•  Uno evi vyuma twatalilila navikatesamo ngachilihi?

•  Uno evi vyuma twatalilila navikatesamo lwola muka?

•  Uno kutalilila vyuma yatushika Mbimbiliya chinahase kukukafwa ngachilihi makumbi ano?

 Mbimbiliya yahanjika hatoma ngwayo vatu vali nakumona ukalu waunene chikuma. Oloze yatufwelelesa ngwayo ukalu wosena tuli nakumona, naukakuma kulutwe. Kekesa havyakutalilaho vino:

•   Ukalu: Kuhona jizuvo

   Vyuma Yahanjika Mbimbiliya: “Navakatunga jizuvo javo, kaha navakatwamangamo.”—Isaya 65:21.

   Omwo nachikapwa kulutwe: Vatu navakalivwisa kuwaha kutwama mujizuvo javo.

•   Ukalu: Kuhona milimo nauhutu

   Vyuma Yahanjika Mbimbiliya: “Vaze ngwasakula navakalivwisanga kuwaha milimo yamavoko avo.”—Isaya 65:22.

   Omwo nachikapwa kulutwe: Vatu vosena navakalivwisanga kuwaha kuzata milimo yamwaza.

•   Ukalu: Kuhengesa chiyulo

   Vyuma Yahanjika Mbimbiliya: “Vilolo navakayulanga nachiyulo chakwoloka.”—Isaya 32:1.

   Omwo nachikapwa kulutwe: Kumona vatu ulumbi mwomwo yachikova chavo, nachiyoyelo chavo chipwe mwomwo yautu, navakachifumisako haya myaka yosena. Kaha vatu vosena navakapwanga vavalemu.

•   Ukalu: Zala namusongo wazala

   Vyuma Yahanjika Mbimbiliya: “Hamavu nahakapwanga mbuto jamanona jakulisala. Hajipili hosena nahakapwanga mbuto jamanona jajivulu.”—Samu 72:16.

   Omwo nachikapwa kulutwe: Vatu vosena navakapwa navyakulya vyamwaza vyavivulu chikuma. Kaha naumwe wauchi mwakasavala nazala chipwe kuviza musongo wazala.

•   Ukalu: Uhwanga naulyanyi

   Vyuma Yahanjika Mbimbiliya: “Navakatwamanga mutu himutu mwishi yamuvinyo wenyi, mwishi yamukuyu wenyi, Kaha naumwe wauchi mwakavevwisa woma.”—Mika 4:4.

   Omwo nachikapwa kulutwe: Vatu vosena navakapwa vakukingiwa mwomwo vaka-kuhuka vosena navakavafumisako, oloze “vaka-kwoloka navakaheta mavu.”—Samu 37:10, 29.

•   Ukalu: Jita

   Vyuma Yahanjika Mbimbiliya: “Lifuchi limwe kalyeshi kukakajila lifuchi likwavo jipoko jamikwaleko, Kaha kaveshi kukalinangula cheka jitako.”—Isaya 2:4.

   Omwo nachikapwa kulutwe: Hamavu hosena nahakapwa kuunda. (Samu 72:7) Kakweshi mutu mwakalishona mwomwo yakufwisa mutu azanga chipwe kuseza membo avo mwomwo yajitako.

•   Ukalu: Kuviza namisongo

   Vyuma Yahanjika Mbimbiliya: “Mulifuchi lize kamweshi kukapwa mutu mwakamba ngwenyi: “Nguli nakukola.”—Isaya 33:24.

   Omwo nachikapwa kulutwe: Vatu kaveshi kukapwa cheka vitonji chipwe kuvizako. (Isaya 35:5, 6) Mbimbiliya yashika nawa ngwayo “kufwa kacheshi kukapwako chekako.”—Kusoloka 21:4.

•   Ukalu: Kwenyeka mavu

   Vyuma Yahanjika Mbimbiliya: “Pambo nalifuchi lyaumu navikalisamba, Kaha likundu nalikawahilila nakutemwina jitemo jasalafwone.”—Isaya 35:1.

   Omwo nachikapwa kulutwe: Kaye kosena nakakapwa palachise ngana muze ajinyine Kalunga hakavanga.—Kuputuka 2:15; Isaya 45:18.

 Unahase kushinganyeka ngwove kajeshi kukatesamoko. Oloze tuli nakukukolezeza ukekese kanawa vyuma yahanjika Mbimbiliya vize navikasoloka kulutwe. Mwomwo ika? Jishiko jamuMbimbiliya jalihandununa najishiko javatu. Jishiko jamuMbimbiliya jafuma kuli Kalunga. Talenu vyuma vyatela kutulingisa tujifwelele:

•   Kalunga atamo kumufwelela. Mbimbiliya yamba ngwayo Kalunga ‘kongako.’ (WaChituse 1:2) Kaha nawa Kalunga kaha ikiye atwama nauhashi wakuhanjika vyuma navikasoloka kulutwe. (Isaya 46:10) MuMbimbiliya mwatwama unjiho wakusolola nge vyuma vyosena vize eji kuhanjikanga Kalunga vyeji kutesangamo. Nge uli nakusaka kutachikiza yayivulu, kaha tala vindiyo yakwamba ngwavo Uno Tunahase Kufwelela Ngachilihi Ngwetu Mbimbiliya Yapwa yaMuchano?

•   Kalunga atwama nangolo jakufumisako ukalu wetu. Mbimbiliya yahanjika ngwayo Kalunga atwama nangolo jakulinga “vyeshovyo nasake.” (Samu 135:5, 6) Kulumbununa nge kakweshi vyuma vimwe vinahase kuhonesa Kalunga kutesamo jishiko jenyiko. Kaha chachinenenyi, Kalunga ali nakusaka kutukafwa mwomwo atuzanga.—Yowano 3:16.

 Oloze unahase kulihulisa ngwove, ‘Kachi nge Kalunga asaka kutukafwa kaha nawa atwama nangolo jakutukafwa, kaha mwomwo ika tuli nakumwena ukalu wauvulu ngana?’ Hakusaka kukumbulula chihula kana, tala vindiyo yakwamba ngwavo Mwomwo Ika Kalunga Etavishila Kuyanda?

 Kalunga mwakazachisa Wangana wenyi uze wapwa fulumende yamwilu mangana akatesemo vyuma ashika. Atongola Yesu Kulishitu kupwa Muka-kuyula Wangana kana, kaha namuhane ngolo jakulama mavu navatu. Omu Yesu apwile hano hamavu, okile vaveji, nakulisa vatu, nakuunjisa peho nakusangula vafu. (Mako 4:39; 6:41-44; Luka 4:40; Yowano 11:43, 44) Shikaho asolwele vyuma mwakalinga hakupwa Mwangana waWangana waKalunga.

 Tala vindiyo yakwamba ngwayo Wangana waKalunga Chuma Muka? mangana ulinangule omu Wangana waKalunga naukakukafwa.

 Kalinwomu. Twatachikiza ngachilihi ngocho? Mbimbiliya yahanjikilile chimweza vinjikizo navikasolola nge Wangana waKalunga kalinwomu uputuke kuyula hamavu. (Luka 21:10, 11) Vinjikizo kana tunakuvimona makumbi ano.

 Hakusaka kulinangula vyavivulu, tanga chihande chakwamba ngwavo “Lwola Muka Wangana waKalunga Naukayula haMavu?”

 Muka-kusoneka Mbimbiliya umwe afwanyishile vyuma twatalilila vize yatushika Mbimbiliya ‘kuchikungo chawato chakwimikisa myono yetu.’ (WavaHepeleu 6:19.) Ngana muze chikungo chakwimikisa wato cheji kulingisanga wato wimane nge kuli nyamanganda, mukiko navyuma vatushika muMbimbiliya vinahase kutukafwa tuzame omu tuli nakumona ukalu makumbi ano. Lutalililo lwetu lunahase kukinga vishinganyeka vyetu, nakutulingisa tuwahilile nakupwa vakulikangula.—Wavaka-Tesolonyika 1, 5:8.