Mutu uze nalizakamina  a apwa mutu uze ali nakwivwa chikuma woma, uze mwahinduka chimene chakuzeneka ngolo, chipwe uze ali nakuhanjika chikuma havyuma nalizakamina.

 Nge vatu vamwe vanalizakamina, veji kuhitanga muukalu tunavuluka. Oloze vaka-kuhehwojola vanawane nge omu keshi mukiko chapwa kuli vatu vamweko chikumanyi malunga. Mukuhehwojola chimwe vambile ngwavo, “malunga veji kunwanga chikuma wala namaundu akupendesa kachi nge vanalizakamina. Shikaho tunahase kumona mutu ngwetu chitakwa, kumana chiku nalizakamina kaha. Kakavulu kulizakamina cheji kulingisanga malunga vapihililenga nakusulakananga washi.”

 Chipwe ngocho, malunga vosena kavalizakamina mujila yoyimweko. Chamokomoko nomu mwalingilamo mutu, oloze tachikiza ngwove ukalu wakulizakamina uli nakuvulilako ‘mumakumbi ano akukuminyina aze anapu amakalu.’ (WaChimoteu 2, 3:1) Kutala Mbimbiliya yinahase kukukafwa nge unalizakamina tahi?

 MuMbimbiliya mwatwama vyuma vyamwaza vize vinahase kukukafwa kachi nge unalizakamina. Tala vyakutalilaho vitatu.

1.  1. “Kanda namulizakamina vyalikumbi lyahameneko, mwomwo likumbi lyahamene nalikapwa navyalyo vyakulizakamina. Likumbi hilikumbi lili naukalu walyo.”—Mateu 6:34.

    Mwalumbunukila Mazu Kana: Nachipwa chamangana kuhona kulizakamina chikuma havyuma vize vinahase kutusolokela (chipwe vize pamo kavyeshi kukatusolokela) mukuyoya chetuko. Kakavulu vyuma vize tweji kulizakaminanga ngwetu navitusolokela kavyasolokako. Kaha lwola lumwe vyuma vinahase kupwa kanawa.

    Eseka echi: Anuka vyuma vyavipi vize washinganyekele ngwove navisoloka, oloze kavyasolokeleko. Kekesa vyuma unalizakamina oholyapwa, nakukekesa kanawa umone ukalu vinahase kukunehela.

2.  2. “Nge omu chikungo nachihotola chikungo chikwavo, Mukiko mutu nahase kuhotola mukwavo.”—Vishimo 27:17.

    Mwalumbunukila Mazu Kana: Vakwetu vanahase kutukafwa nge tunalizakamina kachi nge natuvalweza ukalu wetu. Vanahase kutulwezako vyuma vyavakafwile omu vapwile muukalu kana. Kaha nawa vanahase kutukafwa tumone vyuma mujila yeka.

    Eseka echi: Shinganyeka mutu uze nahase kukukafwa, nahase kupwa numba sepa lyove uze amwene ukalu nge wove. Muhulise vyuma vyamukafwile navize kavyamukafwileko.

3.  3. “Mbilenu kulizakamina chenu chosena hali ikiye, mwomwo amizakama.”—WaPetulu 1, 5:7.

    Mwalumbunukila Mazu Kana: Kalunga azakama chikuma vaze vali nakuyanda. Atulweza tulombenga kuli ikiye nakumulweza vyuma vyosena vize tunalizakamina.

    Eseka echi: Soneka vyuma vili nakukulingisa ulizakamine. Kufumaho lomba Kalunga nakumulweza vyuma unasoneka, nakulumbununa ukalu wove wosena nakumulomba nawa akukafwe muukalu kana.

 Mbimbiliya kayatulweza kaha mwakuhonesela kulizakaminako, oloze yatushika nawa ngwayo kulizakamina navakachifumisako haya myaka yosena. Uno nachikapwa ngachilihi ngocho?

 Wangana waKalunga naukafumisako vyuma vyeji kulingisanga vatu valizakamine. (Kusoloka 21:4) Kaha nawa muchiyulo chaWangana waKalunga katweshi kukanuka cheka kulizakamina chetuko, kaha nawa katweshi kukahomba chekako.—Isaya 65:17.

 Omu mukiko “Kalunga uze eji kuhananga kuunda” asaka mukayoye. (Wavaka-Loma 16:20) Atulweza ngwenyi: “Ngunatachikiza vyuma nguli nakushinganyeka hali enu. Nguli nakushinganyeka kumitwamisa mukuunda, keshi kuminehela lupiko, mangana mukayoye kanawa kulutwe nakupwa nalutalililo.”—Yelemiya 29:11.