Vatu mukaye kosena vanalizakamina mwomwo yaulyanyi unakusoloka mumapolitiki.

•   Mulifuchi lyaMexico vajihanga vatu 39 muvikokojola vyavaka-mapolitiki chuma chize kanda chisolokengaho lyehi, kaha nawa kwapwanga vilinga vyeka vyaulyanyi vize vyahonesanga vatu vavavulu kwazana mukuvwota chapwangako mumwaka wa 2023 na 2024.

•   MuEurope munasoloka ulyanyi wauvulu mwomwo yamapolitiki, kuhakilako vene nakusaka kujiha twamina wavilolo jaliuka lyajishimbi wamuSlovakia ha 15 May, 2024.

•   Vatu vamuUnited States vanalikomokela chikuma, mwomwo Donald Trump uze apwile twamina walifuchi vasakanga kumujiha ha 13 July, 2024.

 Mwomwo ika ulyanyi unavulila ngana mumapolitiki? Uno naukakuma tahi? Vyuma muka yahanjika Mbimbiliya?

 Mbimbiliya yahanjikilile chimweza ngwayo mulwola tuli nakuyoyelamo luze vavuluka ngwavo “makumbi akukunyiminyina,” vatu navapwanga navilinga vize navineha ulyanyi nakuhona kulivwasana.

•   “Hamakumbi akukuminyina nahakapwa lwola lwalukalu. Mwomwo vatu navakapwa . . . vaka-kuhona kusakwilila, vaka-kuhona kushishika, . . . vaze kaveshi kwitavila vivwasanoko, . . . vaka-ukenya, . . . vaka-kusolola vakwavo, vaka-kunjinjavala, vaka-kulivwimba.”—WaChimoteu 2, 3:1-4.

 Mbimbiliya yahanjikilile nawa chimweza ngwayo muno mulwola tuli nakuyoyela namupwanga vaka-kulikanga kufulumende nachimbalanganyi mumapolitiki. (Luka 21:9, kwinyikila chamwishi) chipwe ngocho, ulyanyi wamumapolitiki navihandwa navikakuma.

 Mbimbiliya yalumbununa ngwayo Kalunga mwakafumisako jifulumende josena nakujishishisa nafulumende yenyi yamwilu.

•   “Kalunga wamwilu mwakahakako wangana uze . . . naukachika mawangana [eka] osena awa nakuwanongesa, kaha ukiko naukapwangako haya myaka yosena.”—Ndanyele 2:44.

 Wangana waKalunga naukakafwa vatu vakapwe vakulinunga nakuneha kuunda mukaye kosena.

•   Muka-kuyula Wangana kana, Yesu Kulishitu, vamuvuluka ngwavo “Mwata waKuunda,” kaha muchiyulo chenyi “kuunda kacheshi kukakuma[ko].”—Isaya 9:6, 7.

•   Namakumbi ano vatu vaze vayula kuWangana kana vali nakulinangula mwakutwamina mukuunda. Mbimbiliya yahanjika havatu kana ngwayo: “Jipoko javo jamikwale navakajifululula nakupwa matemo akulimisa, makunga avo navakawafululula nakupwa jipoko jakunongesa kumitondo. Lifuchi limwe kalyeshi kukakajila lifuchi likwavo jipoko jamikwaleko, kaha kaveshi kukalinangula cheka jitako.”—Isaya 2:3, 4.

 Hakusaka ulinangule vyavyivulu, tanga chihande chakwamba ngwavo “Uno Wangana waKalunga Naukatesamo Vyuma Muka?” nakutala vindiyo yakwamba ngwavo Wangana waKalunga Chuma Muka?