Vatu vavavulu veji kuhanjikanga chikuma hachihande chakunongesa kano kaye. Veji kushinganyekanga ngwavo vyuma vyosena vize vyatwamaho navakavinongesa. Vatu vamwe vafwelela ngwavo chikupu vene kano kaye navyuma vyosena navakavinongesa, chikumanyi nge vanatange mijimbu yinakuhanjika havyuma vino:

•   “Tunatachikiza chikupu ngwetu kunahase kupwa jita yamata amatendazungu. Jita kana yinahase kwepuka mukukasumuna, chipwe mwomwo yakuchisakula, chipwe mwomwo yakuhona kulivwasana.”—Bulletin of the Atomic Scientists.

•   “Hamyaka 10 yinahichimo, mukaye munapunga jipeho janyamanganda, nakakahya kamumusenge, navyanga, nakulyenyeka chavyuma vyamukalungalwiji, nakuzuma chikuma namavaji.”—National Geographic.

•   “Vambimba makumbi vali nakuvulilako chikuma muAfrica.”—The Associated Press.

 Uno vyuma vyosena vyatwama hano hamavu navakanongesa tahi? Vyuma muka yahanjika Mbimbiliya?

 Nduma. Mazu aKalunga atufwelelesa ngwawo mavu nawapwangako lika. (Muka-kwambulula 1:4) Shikaho Kalunga keshi kukanongesa mavu aze atengeleko, oloze ‘mwakenyeka vaze veji kwenyekanga mavu.’—Kusoloka 11:18.

 Mbimbiliya yamba ngwayo “kaye” kaze nakakakuma, shina vatu vaze veji kulikanganga kuli Kalunga nakulinga vyuma vafwila vavene. Ngana muze chapwile mumakumbi aNowa, Kalunga mwakanongesa ‘vaka-kumuzamukila.’—WaPetulu 2, 2:5; 3:7.

 Hali WaYowano 1, 2:17, vamba ngwavo: “Kaye kali nakuhita hamwe nakufwila chako.” Eyi vesi yasolola nge Kalunga mwakanongesa vaka-kulikanga kuli ikiye, keshi mavu aveneko.

 Mbimbiliya kayatulweza lwola nakakakuma kayeko. (Mateu 24:36) Chipwe ngocho, yasolola ngwayo kukuma chinapandama. Mbimbiliya yahanjikilile chimweza vyuma vino:

•   Vinjikizo yakufwana nge jijita, nazala, namisongo yachihita, namindenda yayinene, navikasoloka “kuvihela vyeka navyeka.”—Mateu 24:3, 7, 14; Luka 21:10, 11; Kusoloka 6:1-8.

•   Vatu mukaye navakalizanga chikuma vavene. Chakutalilaho navakapwa “vaka-kuzanga jimbongo,” “vaka-kuhona kusakwilila,” kaha nawa navakapwa “vaka-kuhona muchima wakulikanyisa vavene.”—WaChimoteu 2, 3:1-5.

 Vatu vavavulu vetavila ngwavo, kufuma vene mumwaka wa 1914, vyuma mukaye vili nakupihilako lika ngana muze yahanjikilile chimweza Mbimbiliya. Kaha nawa kukuma chinapandama. Kachi nge unakusaka mijimbu yayivulu, kaha tanga chihande chamuchingeleshi chakwamba ngwavo, “Vyuma Muka Yahanjika Mbimbiliya Kutalisa kuMwaka wa 1914?” nachakwamba ngwavo “Vinjikizo Muka Vyasolola Nge Tuli Nakuyoyela ‘muMakumbi Akukuminyina’?”

 Mukanda wamakumishilo muMbimbiliya wahanjika “halwola lwakusolola Mwata Yesu,” luze nalukasolola hatoma nge Yesu atwama nangolo jakufumisako vilinga vyavipi vyosena nakufweta vaze veji kulemesanga Kalunga.—Wavaka-Tesolonyika 2, 1:6, 7; WaPetulu 1, 1:7, 13.

 Mukanda wamakumishilo muMbimbiliya vauvuluka ngwavo Kusoloka, mwomwo wasolola vyuma navikasoloka kulutwe. (Kusoloka 1:1) Mumukanda kana mwatwama mujimbu wamwaza, kaha watuhana lutalililo. (Kusoloka 1:3) Wasolola nge Kalunga mwakafumisako vilinga vyavipi nakulingisa ano mavu kupwa palachise. Halwola kana, vatu vosena kaveshi kukavizanga, chipwe kuyanda chipwe kufwako.—Kusoloka 21:3, 4.

 Kutala unakusaka kulinangula vyuma vyamwaza yatushika Mbimbiliya tahi? Vinjiho jaYehova navakukafwa hakulinangulanga navo Mbimbiliya hawana wakanyombo. Nge chinahase, kaha vatumine lelo.