Kulizakamina chikuma chinahase kukunehela ukalu kumujimba namuvishinganyeka. Kaha nawa chinahase kukunehela ukalu waunene kuhambakana uze walizakaminanga.

•  Kehesako kutanga chipwe kwivwilila kumijimbu yayipi. Kawatela kufwila kutachikiza kala mujimbu unasolokako. Kutanga chipwe kwivwilila chikuma kumijimbu yayipi chinahase kukwivwisa woma nakukuhombesa.

   Lundongi lwamuMbimbiliya: “Muchima wakuhomba weji kukumisanga ngolo jamutu.”—Vishimo 17:22.

   “Chapwa chachashi kupwa natato yakwivwilila kumijimbu yayihya namijimbu yayipi, oloze tato kana yeji kunehanga ukalu. Kangwalizakamina chikuma nge kangweshi nakwivwilila chikuma kumijimbuko.”—John.

   Vyuma watela kushinganyekaho: Mapapa kangahi wasaka kwivwilila kumijimbu?

•  Linganga vyuma walitomena. Kachi nge unahinduka kaha lyako vyakula, nakuzata milimo yakukanda, nakusavalanga halwola walitomena. Kunoneka vyakulinga nachikukafwa ushinganyekenga kanawa, nakukukafwa ukeheseko kulizakamina.

   Lundongi lwamuMbimbiliya: “Vyuma veji kujinanga vaka-mangana vyeji kufukilanga.”—Vishimo 21:5.

   “Omu musongo wachihita waCOVID-19 waputukile, ngwechele kukavangiza vyuma ngwanonekele nakuputuka kuzachisa lwola lwami kuvyuma vize kavyangunganyalishileko. Ngwasakiwile kuzachisa kanawa lwola lwami, ngocho ngwanonekele vyuma ngwatelele kulinga hakumbi hakumbi.”—Joseph.

   Vyuma watela kushinganyekaho: Uno wanoneka vyuma vize vyeji kukukafwanga utesemo vyuma vyavilemu hakumbi hakumbi tahi?

•  Shinganyekanga havyuma vyamwaza. Kushinganyeka havyuma watelanga kulinga chipwe havyuma vyavipi vinahase kukakusolokela, navikulingisa ulizakamine chikuma. Oloze shinganyeka havyuma vivali chipwe vitatu vize vinahase kukwivwisa kuwaha.

   Lundongi lwamuMbimbiliya: “Sololenunga kusakwilila chenu.”—Wavaka-Kolose 3:15.

   “Kutanga Mbimbiliya cheji kungukafwanga nguhone kutanga chipwe kwivwilila mijimbu yayipi, nakungulingisa ngushinganyekenga havyuma vyamwaza. Vatu vanahase kushinganyeka ngwavo kacheshi kungukafwako, oloze cheji kungukafwanga chikuma.”—Lisa.

   Vyuma watela kushinganyekaho: Kutala weji kushinganyekanga kaha havyuma vyavipi vili nakusoloka mukuyoya chove nakuhona kushinganyeka havyuma vyamwaza tahi?

•  Shinganyekelangako vakwenu. Chapwa chachashi kulihandula kuli vakwetu nge tunahombo. Muchishishisa chakulinga ngocho, shinganyeka omu unahase kukafwa vaze vali muukalu.

   Lundongi lwamuMbimbiliya: “Kanda kuhakanga kulutwe vyuma mwasaka enu kahako, oloze navyuma vasaka vakwenu nawa.”—Wavaka-Fwilipi 2:4.

   “Kulingilako vakwetu vyuma vimwe cheji kungulingisanga nguwahilile. Omu ngweji kuvalingilanga vyuma navivevwisa kuwaha, cheji kungukafwanga ngukeheseko kuhomba, nakuhona kupwa nalwola lwakulizakamina.”—Maria.

   Vyuma watela kushinganyekaho: Havatu vaze watachikiza, veya vali nakusakiwa kukafwa chikuma, kaha vyuma muka unahase kulinga mangana uvakafwe?

•  Pwako uwakulikangula. Linyukenga kumujimba nakuwana lwola lwakunoka. Lyakonga kulya chize nachikafwa mujimba ulikangule. Kuzata nangolo ulikangule kumujimba, nachikukafwa umone kuyoya mujila yamwaza nakukukafwa nawa uhone kulizakamina.

   Lundongi lwamuMbimbiliya: “Kulinyuka kumujimba cheji kunganyalisanga.”—WaChimoteu 1, 4:8, kwinyikila chamwishi.

   “Ami namwanami walunga katwalinyukila kumujimba haweluka ngana muze twalingilengako, ngocho tweji kulinyukilanga jino muzuvo. Echi chinatukafwe tulivwise kuwaha nakulisolwela likoji.”—Catherine.

   Vyuma watela kushinganyekaho: Kutala uli nakusakiwa kwalumunako vyuma vimwe kutalisa kukulya nakulinyuka kumujimba mangana upwenga uwakulikangula tahi?

 Vatu vavavulu vanakavangizanga vishina tunashimutwila mangana vakeheseko kulizakamina. Vananganyala nawa hakulinangula jishiko jamuMbimbiliya jakukapwa nakuyoya chamwaza kulutwe. Tala chihande chakwamba ngwavo “Uno Wangana waKalunga Naukalinga Vyuma Muka?”