Mwaka himwaka kweji kupwanga mindenda yayivulu chikuma. Numba tuhu mindenda yimwe yapwa yayindende, oloze mindenda yayivulu yinahase kwenyeka chikuma vyuma nakulingisa vatu vayande nakufwa. Shimbu jimwe yeji kunehanga jipeho janyamanganda jajinene jize jeji kwenyekanga vihela vyakutulungalwiji, nakujiha vatu vavavulu vatwama kuvihela kana. Uno Mbimbiliya yahanjikilile chimweza vyeyi mindenda yayinene tahi?

Muchihande chino

•  Uno Mbimbiliya yahanjikilile chimweza vyamindenda tahi?

•  Uno mindenda yinakusoloka makumbi ano yili nakutesamo upolofweto wamuMbimbiliya tahi?

•  Uno vyuma yahanjikilile chimweza Mbimbiliya hamindenda vyakwata ngachilihi hali etu?

•  Vishinganyeka vyakuhenga kutalisa kuupolofweto wamuMbimbiliya namindenda

 Yesu avulukile vyamindenda muupolofweto uze vasoneka muMbimbiliya. Mazu ahanjikile vawasoneka mumikanda yitatu yamuMbimbiliya:

 “Lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo, kaha kuvihela vyeka navyeka nakukapwa zala, namindenda.”—Mateu 24:7.

 “Lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo, kaha kuvihela vyeka navyeka nakukapwa mindenda. Nakukapwa nawa zala.”—Mako 13:8.

 “Nakukapwa mindenda yayinene, kaha kuvihela kweka nakweka nakukapwa zala namisongo yachihita.”—Luka 21:11.

 Yesu ahanjikilile chimweza ngwenyi “mindenda yayinene” nayikasoloka “kuvihela vyeka navyeka” halwola luze nakukapwa jijita, najizala, namisongo yachihita. Vyuma vyosena evi vili nakusolola nge vatu vali nakuyoyela mulwola luze vavuluka ngwavo, “chikukulwishi chakatwamino kamyaka yino” chipwe ngwetu “makumbi akukuminyina.” (Mateu 24:3; WaChimoteu 2, 3:1) Kweseka nakulava chamuMbimbiliya “makumbi akukuminyina” aputukile mu 1914, kaha kanda akume.

 Eyo. Vyuma apolofwetele Yesu kuhakilako vene navyuma ahanjikile kutalisa kumindenda, vili nakusoloka makumbi ano. Kufuma vene mu 1914, kunapunga mindenda yakuhambakana 1,950 yize yinajihi vatu vakuhambakana hajimiliyoni jivali. a Tala mindenda yimwe yinasolokanga mumyaka yakalinwomu.

 2004—Kalungalwiji waIndia. Mundenda waunene chikuma walingishile kupwenga peho yanyamanganda yayinene yize yahetele kumafuchi amavulu nakujiha vatu kafwe 225,000.

 2008—China. Mundenda waunene wenyekele membo amavulu najimbaka, kaha vatu vawana nge wajihile vatu kafwe 90,000, nakulemeka vatu 375,000, nakupuzula jizuvo javatu vavavulu.

 2010—Haiti. Mundenda waunene natumindenda tweka twatundende yajihile vatu vakuhambakana 300,000, nakupuzula jizuvo javatu vavavulu chikuma.

 2011—Japan. Mundenda waunene chikuma najipeho janyamanganda vyajihile vatu kafwe 18,500 nakulingisa vatu vavavulu vaseze membo avo. Kaha nawa vyenyekele chihela chakakahya kakezi chaFukushima chize chalingishile kupwenga peho yayipi chikuma. Omu mwahichile myaka 10, vatu kafwe 40,000 kavahashile lika kukinduluka kumembo avo aze apwile kwakamwihi nachihela kanako mwomwo yapeho yayipi yize yapwileko.

 Vyuma yahanjikilile chimweza Mbimbiliya hamindenda vyatukafwa tutachikize vyuma navisoloka kalinwomu. Yesu ambile ngwenyi: “Omu namukamona vyumevi vili nakusoloka, katachikizenu ngwenu Wangana waKalunga uli kwakamwihi.”—Luka 21:31.

 Mbimbiliya yalumbununa ngwayo, Wangana waKalunga yapwa fulumende yamwilu, kaha Yesu Kulishitu ikiye apwa Mwangana waWangana kana. Ou ukiko Wangana uze Yesu anangwile tumbaji twenyi valombenga.—Mateu 6:10.

 Omu Wangana waKalunga naukaputuka kuyula hamavu, Kalunga mwakafumisako ukalu wakulijila wakufwana nge mindenda, kaha kayeshi kukajiha cheka vatuko. (Isaya 32:18) Kaha nawa mwakafumisako ukalu wosena uze uli nakwenyeka mijimba yavatu navishinganyeka vyavo, uze unakwiza mwomwo yamindenda. (Isaya 65:17; Kusoloka 21:3, 4) Nge unakusaka kutachikiza vyavivulu, kaha tanga chihande chakwamba ngwavo “Uno Wangana waKalunga Naukatesamo Vyuma Muka?”