Vyuma Muka Yahanjika Mbimbiliya Kutalisa kuUkalu Wakuhona Meya Amwaza Mukaye Kosena?
Tuvosena twasakiwa meya amwaza numba tuyoye. Oloze António Guterres twamina waliuka lya UN ambile ngwenyi, “hakuwana nge meya mukaye kosena ali nakukehelako lika, ngocho kulutwe natukapwa muukalu waunene chikuma wakuhona meya amwaza.” Oholyapwa ngana mukaye muli vatu vavavulu chikuma vaze chili nakukaluwila kuwana meya amwaza akunwa.
Strdel/AFP via Getty Images
Kutala nakukapwa lwola vatu vosena navakapwa nameya akutamo tahi, nyi natutwalangaho lika kumona ukalu wakuhona meya? Vyuma muka yahanjika Mbimbiliya?
Vyuma yatushika Mbimbiliya kutalisa kukupwa nameya
Mbimbiliya yatushika ngwayo likumbi limwe ukalu wakuhona meya navakaufumisako. Nakukapwanga meya amwaza amavulu chikuma.
“Mupambo namukajikuka meya, kaha mulikundu namukapwanga vana vatulwiji. Hamavu aumu nahakapwanga vijiva vyameya, hamavu akuzeneka meya nahakapwanga tuselwoke vameya.”—Isaya 35:6, 7.
Mwomwo ika twatela kufwelela elu lushiko lwamuMbimbiliya? Ivwa vyuma yahanjika Mbimbiliya hachuma chimwe chakulipwila kutalisa kujila vatengelamo ano mavu.
Vyuma yahanjika Mbimbiliya kutalisa kumavu nomwo eji kulitungululanga meya
“[Kalunga katengele mavu] chawanako, oloze awatengele ngwenyi hatwamenga vatu.”—Isaya 45:18.
Hakuwana nge Kalunga atengele mavu mangana hapwenga vyuma vyakuyoya, ngocho awatengele mujila yize nayilingisa hapwenganga meya amwaza amavulu.
“[Kalunga] eji kukokanga mamata ameya. Kaha hinawalikonda nakupwa vula yakufuma kumbundu, kufumaho mavwi eji kulovolanga meya, kaha hinawanokela hamavu hali vatu.”—Yopa 36:27, 28.
Echi chisoneka chalumbununa jila Yehova atengelamo mavu mangana kupwenganga vyuma vize navilingisa kupwenga meya amwaza amavulu nakuwatomesa. Meya aze eji kukakumukanga hamavu namutulwiji, eji kulikondanga nakunoka kupwa vula. Kaha echi cheji kulingisanga kupwenga lika meya amwaza akunwa vatu natunyama.—Muka-kwambulula 1:7; Amose 5:8.
“Nangukamihana vula hangonde yayo. Lifuchi nawa nalikalovolanga jimbuto, kaha mitondo yamuchipapa nayikemanga mihako.”—VyavaLevi 26:4.
Kalunga ashikile ngwenyi mwakakisula vaIsalele vakushikulu vaze vapwile vaka-kulima, hakuvahananga jimbuto jajivulu, mwomwo avafwelelesele meya akutamo. Atachikiza ngwenyi kwaha jimbuto jajivulu chapendamina hakupwa navula yakutamo.
Vyuma vize Kalunga alingilile vaIsalele vakushikulu vikiko mwalinga kalinwomu hamavu hosena. (Isaya 30:23) Oloze makumbi ano, mumafuchi amavulu muno mukaye, ukalu wakuhona meya uli nakutohwelako, kaha chuma chimwe chili nakuneha ukalu kana shina kukeha chajivula. Vyuma muka vikwavo vize yahanjika Mbimbiliya kutalisa kuvyuma vinahase kukumisa ukalu wakuhona meya makumbi ano?
Jila naukakuminamo ukalu wakuhona meya
Mbimbiliya yahanjika ngwayo Kalunga mwakazachisa Wangana wenyi mangana akakumise ukalu vali nakumona vatu hano hamavu, kuhakilako vene naukalu wakuhona meya. (Mateu 6:9, 10) Wangna waKalunga wapwa hifulumende yize nayikayula hano hamavu hosena. (Ndanyele 2:44; Kusoloka 11:15) Shikaho Wangana kana naukalinga vyuma vize jili nakuhona kulinga jifulumende javatu. Chuma kana shina kufumisako vyuma vize vyeji kunehanga ukalu wakuhona meya.
Ukalu: Kwalumuka chajingonde chili nakuhonesa meya kulitungulula kanawa. Kahechi chili nakulingisa kupwenga vyanga namavaji amanene, najivula jamishilinjinji chipwe kuvula chameya mutulungalwiji.
Mwakuukumishila: Wangana waKalunga naukawahisa vyuma atenga Kalunga mangana yino pulaneti yetu yikapwe cheka ngana muze yapwile hakavanga. Kalunga atushika ngwenyi: “Tala! Nangulingisa vyuma vyosena kupwa vyavihya.” (Kusoloka 21:5) Muvihela vyaumu namukapwa meya amwaza amavulu, kahechi nachikalingisa vyuma vyakuyoya vikapwe nakuvihela kuze kavyeshi makumbi anoko. (Isaya 41:17-20) Wangana waKalunga uze vayula kuli Yesu Kulishitu naukalingisa vyuma vyakutenga vikahone kuneha ponde.
Omu Yesu apwile hano hamavu, aunjishile peho yanyamanganda, kahechi chatulingisa tutachikize ngolo jize vamuhana kuli Kalunga. (Mako 4:39, 41) Omu Kulishitu mwakayulanga mwaMwangana waWangana waKalunga, kakweshi kukapwanga ukalu wakulijilako. Vatu navakalivwisa kuwaha kuunda namukingo wamwenemwene, mwomwo kaveshi kukevwanga cheka woma wakala ukaluko.
Ukalu: Vatu vaze veji kulinganga vyuma chakuzeneka kushinganyeka, namauka aze eji kufwilanga kulinganyalisa avene, ali nakupihisa tulwiji navijiva natuselwoke vameya, nakulingisa kuhone kupwa meya amwaza.
Mwakuukumishila: Kalunga mwakatomesa ano mavu nakukalingisa tulwiji, navijiva natulungalwiji vikapwe ngana muze vyapwile hakavanga. Ano mavu nawakapwa palachise. Mbimbiliya yahanjika ngwayo: “Pambo nalifuchi lyaumu navikalisamba, kaha likundu nalikawahilila nakutemwina jitemo jasalafwone.”—Isaya 35:1.
Vyuma muka navikasolokela vaze kavamona ano mavu navakwavo vatu kupwa vyavilemuko? Kalunga ashika “[kukanongesa] vaze veji kunongesanga mavu.”—Kusoloka 11:18, kwinyikila chamwishi; Vishimo 2:21, 22.
Ukalu: Vatu vali nakuzachisa meya mujila yayipi, nakulingisa jino meya amwaza akume washi.
Mwakuukumishila: Wangana naukalingisa mwaya muchima waKalunga ‘mukalingiwe hano hamavu’ keshi mwaya kujina chavatuko. (Mateu 6:9, 10) Wangana waKalunga naukanangula kanawa vatu vaze naukayula. Hali Isaya 11:9 vasonekaho ngwavo, “hamavu hosena nahakazala nachinyingi chakumutachikiza Yehova.” a Hakuwana nge vatu navakapwa nechi chinyingi, nakuzanga chikuma Kalunga navyuma vize atenga, ngocho navakazakamanga kanawa yino pulaneti yetu yamwaza navyuma vize vyatwamaho.
Hakusaka utachikize vyuma naukalinga Wangana waKalunga, tala chihande chakwamba ngwavo “Uno Wangana waKalunga Naukatesamo Vyuma Muka?”
Tanga Isaya kapetulu 35 mangana uwane omwo ano mavu navakawalumuna kupwa palachise.
Tala vindiyo yakwamba ngwavo Mwomwo Ika Kalunga Atengelele Mavu? mangana ulinangule vyuma ajinyine Kalunga hakutenga mavu navatu.
a Yehova likiko lijina lyaKalunga. (Samu 83:18) Tala chihande chakwamba ngwavo “Yehova Ikiye Iya?”