Uno Vatu Vosena Vanahase Kupwa naChiyoyelo Chamwaza Tahi?
Vatu vamumafuchi amavulu vali nakutambakananga mumikwakwa ngwavo chiyoyelo chinakaluhwa chikuma. Kaha musongo wachihita wa COVID-19 unalingisa chiyoyelo chavatu chikaluhwileko chikuma mwomwo yakuvakanyisa kutambwojoka, nakukaluhwa chavyuma, nakuhona kuwana jijila jamwaza jakuvokilamo. Shikaho echi chinalingisa nawa kupwanga chihandwa hakachi kavapichi navihutu.
Uno ukalu wakukaluhwa chachiyoyelo uze uli mukaye, naukakuma tahi? Eyo. Mbimbiliya yahanjika vyuma mwakalinga Kalunga mangana akafumiseko ukalu wosena tuli nakumona.
Ukalu uze Kalunga mwakafumisako
Ukalu: Jifulumende javatu kajawanyine jijila jakulingisa vatu vosena vapwenga nachiyoyelo chamwazako.
Omu mwakaukumisa: Kalunga mwakafumisako jifulumende javatu nakuhakako fulumende yenyi yize vavuluka ngwavo Wangana waKalunga. Kaha nayikayula mwilu nahamavu hosena.—Ndanyele 2:44; Mateu 6:10.
Vyuma navikafumamo: Hakuwana nge Wangana waKalunga naukayula hano hamavu hosena, ngocho naukawahisa vyuma hamavu hosena. Vatu kaveshi cheka kukahutwa chipwe kukayandako. (Samu 9:7-9, 18) Oloze navakalivwisa kuwaha milimo yamavoko avo nakukapwa vakuwahilila najitanga javo. Mbimbiliya yashika ngwayo: “Navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo. Kaveshi kukatunga jizuvo javo mangana veka vakatwamengamoko, kaveshi kukalima mangana veka vakalyenga vyuma vanalimiko.”—Isaya 65:21, 22.
Ukalu: Vatu kavahasa kulihenda kuukalu uze weji kuvalingisanga vayande nakuhona kupwa navyuma vasakiwa mukuyoyako.
Omu mwakaukumisa: Kalunga mwakazachisa Wangana wenyi mangana akafumiseko vyuma vyeji kulingisanga vatu vevwenga woma nakuvalingisa vahone kupwa vakukingiwa.
Vyuma navikafumamo: Omu Wangana waKalunga naukayulanga, vatu kaveshi kukamona ukalu uze weji kuvalingisanga vatokese vyuma vyakulikafwa navyoko. Chakutalilaho, kakweshi kukapwa jijita, nakukaluhwa chavyakulya namisongo yachihitako. (Samu 46:9; 72:16; Isaya 33:24) Kalunga amba ngwenyi: “Vatu jami navakatwamanga kuvihela vyakuunda, navakatwamanga kuvihela vyakukingiwa, nakuvihela vyakulu.”—Isaya 32:18.
Ukalu: Vatu veji kuvalyapulanga kuvatu valizangamina nalwiso.
Omu mwakaukumisa: Vatu vaze mwakayulanga Kalunga muWangana wenyi, navakalisolwelanga zangi yamwenemwene hakuhaka vyuma vasaka vakwavo kulutwe.—Mateu 22:37-39.
Vyuma navikafumamo: Omu Wangana waKalunga naukayulanga, vatu navakalondezezanga Kalunga hakusolwela vakwavo zangi yize “kayeshi kufwila vyuma vyayo yiveneko.” (Wavaka-Kolinde 1, 13:4, 5) Mbimbiliya yamba ngwayo: “Kupili yami yajila kaveshi kukenyekako chipwe kupihisako mwomwo hamavu hosena nahakazala nachinyingi chakumutachikiza Yehova a nge muze kalungalwiji azala nameya.”—Isaya 11:9.
Mbimbiliya yasolola ngwayo tuli nakuyoyela mumakumbi akukuminyina akatwamino kamyaka yino. Kaha kalinwomu, Kalunga atesemo lushiko lwenyi lwakufumisako ukalu wosena uze weji kunehanga uhutu. b (Samu 12:5) Oloze oholyapwa, jindongi jamuMbimbiliya jinahase kukukafwa utwaleho lika kumika omu uli nakumona ukalu wakukaluhwa chachiyoyelo. Chakutalilaho, tanga chihande chakwamba ngwavo: “Mwakuyoyela Nge Uli naJimbongo Jajindende” nechi chakwamba ngwavo “Kumona Jimbongo Mujila Yamwaza.”
a Yehova lyapwa lijina lyaKalunga ngana muze vasolola muMbimbiliya.—Samu 83:18.
b Kachi nge uli nakusaka kutachikiza ovyo watela kufwelela Mbimbiliya, kaha tala chihande chakwamba ngwavo: “Mbimbiliya hiMukanda Wahanjika Vyuma vyaMuchano.”