Uno kaweshi najimbongo jajivuluko mwomwo yakukaluhwa chachiyoyelo tahi? Misongo yachihita, naukalu wakulijila, navikokojola vyamapolitiki najijita vinahase kuneha uhutu mulifuchi. Numba tuhu kuhona kupwa najimbongo jakutamo cheji kuhombesanga, oloze jindongi jamuMbimbiliya jinahase kukukafwa utachikize mwakuyoyela nge uli najimbongo jajindende.

 Lundongi lwamuMbimbiliya: “Ngunalinangula lyehi . . . mwakutwamina navyuma vyavivulu namwakutwamina chakuzeneka vyuma.”—Wavaka-Fwilipi 4:12.

 Numba nge kaweshi najimbongo ngana jize wapwile najo hakavangako, oloze unahase kulinangula mwakuyoyela kweseka najimbongo uli najo. Kachi nge nawitavila washi omu vili vyuma, kaha nachikwashiwila hamwe natanga yove kwalumunako vyuma mukuyoya.

 Yitavila vakukafwe kufulumende nakumauka eka aze ali nakukafwa vaze vali muukalu. Yako washi ukalisonekese, mwomwo kakavulu vaka-kukafwa kana vatwama nakashimbu kakandende kakusoneka vatu.

 Lundongi lwamuMbimbiliya: “Kachi nge vatu kavatwamine pungako, vyuma vanajinyi kulinga vyeji kukuminamo, oloze vyuma vyeji kutesangamo nge vaka-kulweza mangana vanavulu.”—Vishimo 15:22.

 Shimutwila omwo vili vyuma namuka-mahyove navana vove. Kushimutwila mujila yamwaza, nachikafwa vosena mutanga vatachikize ukalu wenu nakulinga vyuma vinakusakiwa. Shikaho nge namuzachila hamwe mwatanga muhone kupwa nalwenyeka, kaha namuzachisa kanawa jimbongo.

 Lundongi lwamuMbimbiliya: “Twama hamavu nakulava jimbongo.”—Luka 14:28.

 Kachi nge kaweshi najimbongo jajivuluko, kaha nachipwa chamangana kutwama hamavu nakukekesa umone omwo weji kuzachishilangamo jimbongo jove josena. Hakusoneka vyuma unakusaka kulanda, vangila kusoneka jimbongo weji kupwanga najo kakweji hikakweji kweseka nomu vili vyuma. Kufumaho soneka vyuma vyosena navisakiwanga mukakweji, navize weji kwenyekelanga jimbongo, numba tuhu unejiva ngwove nawecha kuvilanda. Hajimbongo nauzachisanga kakweji hikakweji hakilaho najize nauzachisanga nge kunasoloka ukalu chipwe vyuma vyeka vyakukasumuna.

 Vyuma navikukafwa: Nge unakusaka kutachikiza omu weji kuzachisanga jimbongo jove, kaha kanda kuvulyama kusoneka tuvyuma twatundende tuze wavula kulandako. Naulikomokela hakutachikiza jimbongo weji kuzachisanga hakulanda tuvyuma kana. Chakutalilaho, lunga umwe awanyine nge eji kuzachisanga jimbongo jajindola jajivulu hakulanda jinjungamu.

 Lundongi lwamuMbimbiliya: ‘Kekesenu mumone vyuma vyavilemu.’—Wavaka-Fwilipi 1:10.

 Pezalisa jimbongo uli najo kuvyuma unakusaka kulanda nakumona vize unahase kufumisa hamukana mangana vize mulanda vitenga mujimbongo uli najo. Kekesa vyuma vino:

•   Jiminyau. Nge watwama najiminyau jajivulu, kutala unahase kulanjisaho jimwe tahi? Kachi nge watwama naminyau yize yeji kuzachisanga maji chikuma, kutala unahase kuyilanjisa nakulanda yize kayazachisa maji chikumako tahi? Kutala nachihashiwa kulanjisa jiminyau jove nakuzachisanga kinga chipwe minyau yavatu vosena tahi?

•   Kulihizumuna. Kutala unahase kwecha kutalila mivwimbimbi haInternet, chipwe kufwetela chisaji chamivwimbimbi halwola kaweshi najimbongo jajivuluko tahi? Kutala kuliko jijila jeka munahase kuzachishilamo jimbongo jajindende kuvyuma kana tahi?

•   Meya, nakakahya kakezi, namaji. Shimutwilenu mwatanga omu munahase kukehesako jimbongo mweji kuzachisanga kumeya, nakukakahya kakezi, nakumaji amuminyau. Kujimanga manongo nakuhonanga kushimbula hakusana chinahase kukukafwa uhone kuzachisa jimbongo jajivulu.

•   Vyakulya. Lihende kulilanga kuzuvo yakulanjishila vyakulya, oloze lyakonga kulya chakutelekela kuzuvo yove. Shinganyekela chimweza vyuma naulya, kaha nge chinahase landa nakuteleka vyakulya vyavivulu, nakulya vize wasezangaho. Shimbu kanda uyenga nakulanda, sonekela chimweza vyuma uli nakusaka kuchina kulanda vyuma chamulanjila. Landanga vyakulya vinalisale mungalila yenu vize vili nandando yayindende. Kanda kulandanga chikuma vyausekesekeko, kaha nawa unahase kulimako litepa.

•   Vyakuvwala. Landanga vyakuvwala nge vyamwaka vinafu, keshi kulanda kaha mwomwo unamono vyavihyako. Landanga vyuma veji kulanjisanga kusongo yamwaka chipwe kulanda vyuma vize vanazachisako lyehi oloze vyakukola. Anyikanga uvwalo wove hatambo mangana vyumenga namusana muchishishisa chakuzachisa likina lize nalizachisa chikuma kakahya kakezi nameya.

•   Vyuma Naukalanda. Shimbu kanda ulande vyuma vimwe, lihulise ngwove: ‘Kutala nguli najimbongo jakutamo jakulanda evi vyuma tahi? Uno nguli nakuvisaka chikuma tahi?’ Kutala ngunahase kuzachisa lika vinoma, namakina chipwe jiminyau jamwaka muchishishisa chakulanda vyeka tahi? Uno unahase kulanjisa vyuma vize kawazachisako chipwe vize kavyeshi nakusakiwako tahi? Kulinga ngocho, nachikukafwa washiwiseko vyuma nakulama jimbongo jove.

 Vyuma navikukafwa: Kachi nge jimbongo weji kupwanga najo jinakehe mukukasumuna, echi chinahase kukulingisa wechenga vyuma vyeji kukwenyekelanga jimbongo vyakufwana nge makanya, nanjuka nawala. Kwecha vyuma kana nachikukafwa ulame jimbongo nakupwa nachiyoyelo chamwaza.

 Lundongi lwamuMbimbiliya: “Vawahilila vaze vejiva ngwavo vasaka vyuma vyakushipilitu.”—Mateu 5:3.

 Mbimbiliya yatukolezeza ngwayo: “Mangana apwa mukingo, nge omu jimbongo japwa mukingo. Oloze eyi yikiko nganyo yachinyingi: Mangana eji kulamanga kuyoya chayauze ali nawo.” (Muka-kwambulula 7:12) Mangana kana atwama Mumbimbiliya, kaha vatu vavavulu vanawane nge kukazachisa mangana kana cheji kuvakafwanga vakeheseko kulizakamina hajimbongo.—Mateu 6:31, 32.