TONENUNGA!
Mwomwo Ika Vihande VyaMapolitiki Vinakuhandunwina Vatu?—Vyuma Muka Yahanjika Mbimbiliya?
Vihande vyamapolitiki vili nakuhandununa vatu mukaye kosena. Mu 2022 vaka-Pew Research Center vawananga nge “vakulwane vakuheta kujipaseti 65% vamumafuchi 19, vahanjikanga ngwavo vatu vali nakulifumbukila chikuma mwomwo yakulihandununa chamauka amapolitiki.”
Kutala unamono ngwove mauka kana ali nakuneha vihandwa okwo watwama tahi? Mwomwo ika? Ukalu kana unahase kukuma ngachilihi? Tala vyuma yahanjika Mbimbiliya.
Muchima uze weji kunehanga vihandwa
Mbimbiliya yahanjikilile chimweza ngwayo mumakumbi ano, aze vavuluka ngwavo “makumbi akukuminyina,” vatu navakapwa namuchima uze naukalingisa chikapwe chachikalu kulinunga.
“Hamakumbi akukuminyina nahakapwa lwola lwalukalu. Mwomwo vatu navakapwa vaka-kulizanga vavene, . . . vaze kaveshi kwitavila vivwasanoko.”—WaChimoteu 2, 3:1-3.
Numba tuhu vatu vavavulu vali nakuzata nangolo mangana jifulumende jizate kanawa, oloze chochimwe jifulumende kajeshi nakuzata kanawako. Vaze vakwechi vishinganyeka vyakulihandununa, kavahasa kuzachila hamwe navakwavo mangana vakumise ukaluko. Kaha echi chinakutesamo vyuma yahanjikilile chimweza Mbimbiliya kushikulu.
“Mutu nashinyinyika mukwavo mutu mangana amuyanjise.”—Muka-kwambulula 8:9.
Chipwe ngocho, Mbimbiliya yatulweza omwo naukakuma ukalu kana. Nakukapwa fulumende yize navakayula kuli mutu uze mwakahasa kufumisako ukalu vali nakumona vatu makumbi ano.
Twamina wakutamo uze azakama vatu
Mbimbiliya yatulweza twamina wakulipwila uze atamo kukumisa ukalu, ngwayo: Yesu Kulishitu. Yesu atwama nangolo, nawata namuchima wakufwila kuneha kuunda nakulinunga mukachi kavatu.
“Mumakumbi enyi, vaka-kwoloka navakafukilanga, kaha nakukapwa kuunda chamwenemwene.”—Samu 72:7.
“Vaka-mafuchi vosena navakamuzachilanga.”—Samu 72:11.
Yesu apwa twamina wakutamo mwomwo eji kuzakamanga vatu nakusaka kuvakafwa, chikumanyi vaze vali nakuyanjisa kuli vakwavo.
“Mwakapululula vaka-kuhutwa vaze vali nakutwa kawelele, navaka-kukalikiza navaze vazeneka mutu wakuvakafwa. Mwakevwila keke vaka-kukalikiza navaka-kuhutwa, mwakalwila myono yavaka-kuhutwa. Mwakavapululula kuluyanjisa nakuulyanyi.”—Samu 72:12-14.
Linangule vyavivulu haWangana waKalunga uze wapwa fulumende yamwilu yize vali nakuyula kuli Yesu. Wana omwo unahase kunganyala kuchiyulo chaWangana kana, najijila unahase kuukundwijilamo.
Tala vindiyo yakwamba ngwavo Wangana waKalunga Chuma Muka?
Tanga chihande chakwamba ngwavo “Wangana waKalunga hiFulumende Yakuzeneka Vilinga vyaMaswekeza.”