TONENUNGA!
Kuloza Vatu HamaShikola—Vyuma Muka Yahanjika Mbimbiliya?
Ha 24 May 2022, mumbaka yayindende yaUvalde yamunganda yaTexas mu U.S.A. mwasolokele ukalu waunene chikuma. Lipapilo lyamijimbu lyaThe New York Times lyambile ngwalyo, “lunga umwe alozele vaka-shikola 19 namilongeshi vavali . . . hashikola yaRobb.”
Chaluvinda, ukalu wakufwana ngana unalisale chikuma. Lipapilo lyamijimbu lya USA Today lyambile ngwalyo, mwaka wali muUnited States kaha “valozanga vatu hajishikola mapapa 249. Totala kana yatohwanga chikuma kuhambakana myaka yosena kufuma kafwe mu 1970.”
Mwomwo ika ulyanyi kana weji kusolokelanga? Vyuma muka navikukafwa umike muukalu kana? Uno ulyanyi naukakuma tahi? Mbimbiliya yakumbulula evi vihula.
Mwomwo ika ulyanyi unakuvulilako chikuma mukaye?
Mbimbiliya yavulukile ano makumbi tuli nakuyoyelamo ngwayo “makumbi akukuminyina,” muze vatu kaveshi ‘kukazanga vakwavoko’ kaha nawa navakapwa “vaka-ukenya,” kulumbununa nge navakapwa vaka-ulyanyi. Vaze vanakusolola vilinga kana “navayanga nakupihilako lika.” (WaChimoteu 2, 3:1-5, 13) Hakusaka ulinangule vyavivulu, tanga chihande chili muChingeleshi chakwamba ngwavo “Did the Bible Predict the Way People Think and Act Today?”
Vatu vavavulu veji kulihulisanga ngwavo, ‘Mwomwo ika Kalunga eji kwechelelanga ukalu wakufwana nge kuliloza kumashikola usoloke?’ Hakusaka utachikize omwo yakumbulula Mbimbiliya, tanga chihande chakwamba ngwavo “Mwomwo Ika—Vyuma Vyavipi Vyeji Kusolokelanga kuVatu vaVilinga Vyamwaza?”
Vyuma muka navikukafwa umike muukalu kana?
“Vyuma vyosena vize vasonekele hakavanga vavisonekelele kutunangula etu, mangana kuhichila . . . mukuvendejeka chamuVisoneka tuhase kupwa nalutalililo.”—Wavaka-Loma 15:4.
Jindongi jamuMbimbiliya jinahase kukukafwa umike mukaye kano kaulyanyi. Hakusaka uwane mijimbu yayivulu, tanga mangazini yaTonenu! yaChingeleshi yili namutwe wakwamba ngwavo “Will Violence Ever End?”
Hakusaka uwane mijimbu nayikafwa visemi vakafwe vana vavo vahone kwivwa woma mwomwo yamijimbu yayipi vali nakwivwa chipwe kutala hamivwimbimbi, tanga chihande chamuChingeleshi chakwamba ngwavo “Disturbing News Reports and Your Children.”
Uno ulyanyi naukakuma tahi?
“Mwakavapululula kuluyanjisa nakuulyanyi.”—Samu 72:14.
“Jipoko javo jamikwale navakajifululula nakupwa matemo akulimisa, makunga avo navakawafululula nakupwa jipoko jakunongesa kumitondo. Lifuchi limwe kalyeshi kukakajila lifuchi likwavo jipoko jamikwaleko, kaha kaveshi kukalinangula cheka jitako.”—Mika 4:3.
Kalunga mwakalinga vyuma vize kaveshi kuhasa kulinga vatuko. Wangana wenyi wamwilu naukenyeka vitwa vyosena vyajita nakukumisa ulyanyi wosena. Hakusaka utachikize vyuma vyavivulu vize Wangana waKalunga naukalinga, tanga chihande chakwamba ngwavo “‘Nakukapwa Kuunda Chamwenemwene’ muWangana waKalunga.”